នៅក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងារបន្តរបស់ក្រសួងទេសចរណ៍» នាទីស្តីការគណៈរដ្ឋមន្ត្រីនាព្រឹកថ្ងៃនេះ ឯកឧត្តម ទិត ចន្ថា រដ្ឋលេខាធិការប្រចាំការនៃក្រសួងទេសចរណ៍ បានថ្លែងថា ចំណូលពីភ្ញៀវទេសចរអន្តរជាតិនៅឆ្នាំនេះ អាចនឹងបាត់បង់ប្រមាណ១០%។ឯកឧត្តម ទិត ចន្ថា មានប្រសាសន៍ថា «កាលពីឆ្នាំ២០១៩ យើងធ្លាប់បានចំណូលពីភ្ញៀវទេសអន្តរជាតិ ប្រមាណ៥ពាន់លានដុល្លារអាមេរិក ដូច្នេះប្រសិនបើយើងបាត់១០% នៃភ្ញៀវនៅឆ្នាំ២០២០នេះ នោះចំណូលនឹងធ្លាក់ចុះទៅតាមនោះដែរ នេះតាមការប៉ាន់ប្រមាណរបស់យើង និងគ្រាន់តែជាសិក្សាជំហានដំបូងទេ»។
ឯកឧត្តម ទិត ចន្ថា រដ្ឋលេខាធិការប្រចាំការនៃក្រសួងទេសចរណ៍
ឯកឧត្តមបានបន្តថា« យើងមានការប្រើប្រាស់កញ្ចប់ទស្សនាប្រកបដោយការលើកទឹកចិត្ត ឧទាហរណ៍ទៅទស្សនានៅខេត្តសៀមរាប ៣ថ្ងៃ ចឹង ក្នុងនោះមានសណ្ឋាគារ មានអាហារ ការដឹកជញ្ជូន -ល- ចឹងផ្នែកឯកជនគាត់ចូលរួមជាមួយរាជរដ្ឋាភិបាល ដោយចុះថ្លៃប៉ុន្មានភាគរយចឹងទៅ ពេលគ្រាន់យកចំណេញតិចតួចទប់ជាមួយនឹងការចំណាយរបស់គាត់ ក៏ជាការរួមចំណែកមួយយ៉ាងមានសារៈសំខាន់ដែរ»។
បើប្រៀបធៀបផលប៉ះពាល់លើវិស័យទេសចរណ៍ដោយសារវីរុស Covid19នេះ ជាមួយនឹងជំងឺសសារដែលបានផ្ទុះកាលពីអំឡុងឆ្នាំ២០០៣ វិញ ឯកឧត្តម ទិត ចន្ថា បានបញ្ជាក់ថា វាផលប៉ះពាល់ប្រហាក់ប្រហែលគ្នា។ «កាលពីជំងឺសារ ២០០២ ទៅ២០០៣ហ្នឹង យើងក៏ថយ១០%ដែរ ប៉ុន្តែទេសចរយើងកាលហ្នឹងតិចទេ គឺកាលឆ្នាំ២០០៣ហ្នឹង យើងទទួលបានខ្ទង់៧០០ពាន់នាក់ទេ តែឥឡូវគឺ ៦,៦លាននាក់។ អញ្ចឹងកាលណុង បើ៧០០ពាន់នាក់ យើងបាត់តែ៧០ពាន់នាក់ទេ តែឥឡូវភ្ញៀង ៦,៦ លាននាក់ យើងបាត់ដល់ទៅ៦៦០ពាន់នាក់ឯណោះ។» នេះបើតាមប្រសាសន៍គូសបញ្ជាក់របស់ឧត្តម ទិត ចន្ថា។
អត្ថបទគួរអាន
យ៉ាងណាមិញ កាលពីពេលថ្មីៗនេះ ប្រមុខរាជរដ្ឋាភិបាលកម្ពុជាក៏ បានបើកសន្និសីទពិសេសមួយជាមួយបណ្តាក្រសួងនានា ដើម្បីចាត់វិធានការជាបន្ទាន់ ក្នុងការដោះស្រាយវិបត្តិមួយចំនួន ដែលបានកើតឡើងដោយសារការផ្ទុះនៃវីរុស Covid 19និងការដកផ្នែកខ្លះនៃEBA ។
ក្រសួងទេសចរណ៍បានដាក់ចេញនូវវិធានការសំខាន់ៗចំពោះមុខចំនួន៤ ដោយសកម្មភាពអនុវត្តចំនួន៩០សកម្មភាព ដើម្បីឆ្លើយតប ជំរុញការដោះស្រាយ និងទប់ទល់នឹងបញ្ហាវីរុស Covid19 ដែលកំពុងតែជះឥទ្ធិពលដល់វិស័យទេសចរណ៍នាពេលនេះ។ វិធានការទី១ ការជំរុញសកម្មភាពទេសចរណ៍ផ្ទៃក្នុង(ជំរុញឲ្យមានកំណើនភ្ញៀវទេសចរក្នុងស្រុក)។ វិធានការទី២ បន្តស្វាគមន៍លំហូរភ្ញៀវទេសចរអន្តរជាតិ ដោយមិនមានការបិទ ឬរឹតបន្តឹងអ្វីទាំងអស់។ វិធានការទី៣ ការអភិវឌ្ឍហេដ្ឋារចនាសម្ព័ន្ធគោលដៅទេសចរណ៍សំខាន់ៗ។ និងវិធានការទី៤ គឺ ជួយដល់ប្រជាពលរដ្ឋទាំងជានិយោជក និងនិយោជិត ដែលធ្វើការពាក់ព័ន្ធនឹងវិស័យទេសចរណ៍ ឧទាហរណ៍ដូចជាការលើកលែងពន្ធសម្រាប់ផ្ទះសំណាក់ និងសណ្ឋាគារជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
