ការនាំចេញផលិតផលកាត់ដេរថយចុះ តែផលិតផល​មិនមែនកាត់ដេរកើនឡើង នៅត្រីមាសទី១ឆ្នាំ២០២១

របាយការណ៍​គយ បានឲ្យដឹងទៀតថា នៅ៣ខែមកនេះ ការនាំចេញ​ផលិតផល​កាត់ដេរ​មានការធ្លាក់ចុះជាង ៥% ដោយសម្រេចបាន​ទឹកប្រាក់​ជាង​២ពាន់៥រយលាន​ដុល្លារអាមេរិក ស្របពេល​ផលិតផល​មិនមែនកាត់ដេរវិញ សម្រេចបាន​ទឹកប្រាក់ជាង​៨៨៧លាន​ដុល្លារ កើនឡើង​ដល់៣០០លាន​ដុល្លារ ឬស្មើនឹង​កំណើន​ជាង​៥២%។

ផលិតផល​មិនមែនកាត់ដេរ រួមមាន​ដូចជា​ កង់ គ្រឿងបំណែក​អេឡិចត្រូនិក បង្គុំខ្សែភ្លើង គ្រឿងបន្លាស់រថយន្ដ អំពូលលម្អ កុងផ្លាកេ និងផលិតផល​ឧស្សាហកម្ម​ផ្សេងៗទៀត។

កំណើន​ប្រសើរ​នៃផលិតផល​មិនមែនកាត់ដេរ​ទាំងនេះ ត្រូវបាន​អគ្គនាយកដ្ឋានគយ និងរដ្ឋាករ​មើលឃើញថា វាបាន​ឆ្លុះបញ្ចាំង​​ពី​លទ្ធផល​នៃការអនុវត្ត​គោលនយោបាយ​របស់រាជរដ្ឋាភិបាល ក្នុងការ​ធ្វើពិពិធកម្ម​វិស័យឧស្សាហកម្ម​នៅកម្ពុជា។