របាយការណ៍របស់ក្រសួងពាណិជ្ជកម្ម បានបង្ហាញឲ្យឃើញថា ការនាំចេញទំនិញរបស់កម្ពុជាទៅកាន់ទីផ្សារអន្តរជាតិនៅរយៈពេល៨ខែក្នុងឆ្នាំ២០២១សម្រេចបានជាង១១ពាន់លានដុល្លារអាមេរិកធ្លាក់ចុះជាង៥% បើធៀបនឹងរយៈពេលដូចគ្នាកាលពីឆ្នាំមុន។ ចំណែកការនាំចូលរបស់កម្ពុជានៅក្នុងរយៈពេលដូចគ្នានេះ មានទំហំទឹកប្រាក់ជាង១៨ពាន់លានដុល្លារអាមេរិកឯណោះ កើនជាង៦០% ពោលគឺ នាំចូលរបស់កម្ពុជាមានច្រើនជាងការនាំចេញដល់ទៅជាង៧ពាន់លានដុល្លារអាមេរិកឯណោះ។
ដោយឡែកបើយើងមើលតួលេខនាំចេញសរុបក្នុងខែសីហាតែ១ប៉ុណ្ណោះ ឃើញថានៅ ឆ្នាំ២០២១ សម្រេចបានទំហំទឹកប្រាក់ជាង ១ពាន់៧រយលានដុល្លារអាមេរិកធ្លាក់ចុះជិត១០% បើធៀបនឹងការនាំចេញនៅក្នុងខែកក្កដា ដែលមានទំហំជាងជិត២ពាន់លានដុល្លារអាមេរិក។
អនុរដ្ឋលេខាធិការក្រសួងពាណិជ្ជកម្មឯកឧត្តម ប៉ែន សុជាតិ បានចាត់ទុកការនាំចេញធ្លាក់ចុះជាង៥% នេះថា វាជាបម្រែបម្រួលធម្មតានៃចរន្តពាណិជ្ជកម្ម ហើយឯកឧត្តមរំពឹងថា ការធ្លាក់ចុះនឹងអាចបំពេញបន្ថែមដោយការនាំចេញនៅរយៈពេល៣ខែខាងមុខ។
អត្ថបទទាក់ទង
ឯកឧត្តមបានបញ្ជាក់ប្រាក់ខេមបូណូមីសយ៉ាងដូច្នេះថា៖«ការនាំចេញសម្លៀកបំពាក់ដែលជាទំនិញចម្បងរបស់យើងមានការកើនឡើងបើធៀបនឹង៨ខែឆ្នាំមុន។ ការនាំចេញទូទៅមានការធ្លាក់ចុះបន្តិចក្នុងរង្វង់៥%។ នេះជាបម្រៃបម្រួលធម្មតានៃចរន្តពាណិជ្ជកម្មទូទៅ ដែលអាចនឹងបំពេញបន្ថែមមកវិញដោយការនាំចេញបីបួនខែចុងឆ្នាំ ដែលជាខែមមាញឹក»។
ជាមួយគ្នានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជាយល់ឃើញថា ការនាំចេញមានទំហំតូចជាងការនាំចូល វាបង្ហាញឲ្យឃើញថា សេដ្ឋកិច្ចពុំទាន់ល្អប្រសើរនោះទេ ពោលគឺចរន្តលុយរបស់កម្ពុជាចេញច្រើនជាងលុយដែលកម្ពុជាទទួលបាន។ អ្នកជំនាញរូបនេះបានបន្ថែមថា កត្តានេះហើយបានជារាជរដ្ឋាភិបានខិតខំព្យាយាមបង្កើតកិច្ចព្រមព្រៀងពាណិជ្ជកម្មទ្វេភាគីជាមួយប្រទេសផ្សេងៗ ដើម្បីបង្កើនទំហំការនាំចេញ ក៏ដូចជាទាក់ទាញវិនិយោគិនបរទេសឲ្យមកវិនិយោគនៅកម្ពុជា ក្នុងន័យធ្វើយ៉ាងណាបង្កើនទំហំពាណិជ្ជកម្មជាមួយប្រទេសដៃគូ។
សូមបញ្ជាក់ថា ទំនិញដែលកម្ពុជានាំចេញភាគច្រើនរួមមានផលិតវាយនភណ្ឌ សម្លៀកបំពាក់ កាបូប ស្បែកជើង គ្រឿងអគ្គិសនី ផលិតកសិកម្ម កសិឧស្សាហកម្ម កង់ និងមាសជាដើម។ ប្រទេស ដែលជាទីផ្សារនាំចេញទំនិញធំៗរបស់កម្ពុជា រួមមាន អាមេរិក អឺរ៉ុប ចិន អង់គ្លេស និងប្រទេសអាស៊ានមួយចំនួនទៀតផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
