កម្ពុជា រកឃើញមេរោគបំប្លែងថ្មី«អូមីក្រុង»លើកដំបូងលើជនខ្មែរទើបត្រឡប់ពីក្រៅប្រទេស

បើតាមប្រភពខាងលើ ករណីវិជ្ជមានលើស្ត្រី អាយុ២៣ឆ្នាំ និងមានផ្ទៃពោះផងនោះ ត្រូវបានរកឃើញមានវីរុសកូវីដ១៩ បំប្លែងថ្មី «អូមីក្រុង» មានស្រុកកំណើត នៅក្រុងបាវិត ខេត្តស្វាយរៀង។ តាមការបញ្ជាក់របស់ក្រសួងសុខាភិបាល ស្ត្រីខាងលើ បានធ្វើដំណើរតាមជើងហោះហើរ ពីប្រទេសហ្គាណា ឆ្ពោះទៅកាន់ទីក្រុងឌូបៃ និងបន្តដំណើរពីទីក្រុងឌូបៃ មកប្រទេសថៃ ទើបហោះហើរពីប្រទេសថៃ មកកម្ពុជា។ នៅពេលស្រ្តីវ័យ២៣ឆ្នាំ រូបនេះ មកដល់អាកាសយានដ្ឋានអន្តរជាតិភ្នំពេញ ក្រុមការងារក្រសួងសុខាភិបាល បានធ្វើតេស្តរហ័សលើវត្ថុសំណាក់ និងរកឃើញវីរុសកូវីដ-១៩ បន្ទាប់មកបានបញ្ជូនសំណាកនោះ ទៅវិទ្យាស្ថានប៉ាស្ទ័រកម្ពុជា ដើម្បីវិភាគបញ្ជាក់រកវីរុសកូវីដ-១៩ បំប្លែងថ្មី អូមីក្រុង។

មេរោគកូវីដ១៩ បំប្លែងថ្មី អូមីក្រុង បានធ្វើឱ្យប្រទេសជាច្រើនលើពិភពលោក បង្កើនការព្រួយបារម្ភព្រោះតែសមត្ថភាពនៃការចម្លងលឿនជាងមេរោគកូវីដ-១៩ធម្មតា ដែលអាចនឹងជះឥទ្ធិពលអវិជ្ជមានលើដំណើរការនៃការស្ដារឡើងវិញនៃសេដ្ឋកិច្ចសាកល។ ដើម្បីទប់ស្កាត់នូវការឆ្លងរាលដាលនៃមេរោគបំប្លែងថ្មី អង្គការសុខភាពពិភពលោក បាននិងកំពុងជំរុញឱ្យបណ្ដាប្រទេសទាំងអស់លើពិភពលោក បង្កើនការចាក់វ៉ាក់សាំងឱ្យលឿន ជូនប្រជាពលរដ្ឋរបស់ខ្លួន ពិសេសជំរុញការចាក់វ៉ាក់សាំងដូសទី៣ ឬដូសជំរុញផងដែរ។

ដោយឡែក សម្រាប់កម្ពុជា គិតមកដល់បច្ចុប្បន្ន មានប្រជាជន ជាង៨៨% ទៅហើយ ក្នុងចំណោមប្រជាជនសរុប ១៦លាននាក់ ដែលបានចាក់វ៉ាក់សាំងគ្រប់២ដូស ខណៈក្រសួងសុខាភិបាលកម្ពុជា បាននិងកំពុងជំរុញការចាក់វ៉ាក់សាំងដូសទី៣ ជូនពលរដ្ឋកម្ពុជា និងកំពុងពិចារណាចាក់ដូសទី៤ បន្ថែមទៀត។

សូមបញ្ជាក់ថា មេរោគកូវីដ-១៩ បំប្លែងថ្មី អូមីក្រុង ត្រូវបានរកឃើញដំបូង នៅប្រទេសអាហ្រិកខាងត្បូង ខណៈគិតដល់ពេលនេះ វត្តមាន អូមីក្រុង បានឆ្លងរាលដាលប្រមាណជាង ៧០ប្រទេសទៅហើយលើពិភពលោក។ ខណៈអង្គការសុខភាពពិភពលោក បានអំពាវនាវឱ្យបណ្ដាប្រទេសទាំងអស់បង្កើនការប្រុងប្រយ័ត្នខ្ពស់ ដ្បិតមេរោគបំប្លែងថ្មី អូមីក្រុង មានកម្រិតគ្រោះថ្នាក់ទាប តែសមត្ថភាពឆ្លងរហ័សជាងកូវីដ-១៩ធម្មតា៕