ម្ចាស់ហាងលីហួរប្ដូរប្រាក់ និងលក់គ្រឿងអលង្ការ លោកស្រី ស៊ាង លីម បានបញ្ជាក់ឲ្យដឹងថា នៅអំឡុងពេលមានរោគរាតត្បាតកូវីដ-១៩នេះ ពលរដ្ឋដែលមកទិញ ឬលក់មាស គឺមានការថយចុះគួរឲ្យគាត់សម្គាល់។ លោកជំទាវថា កាលពីមុន ហាងរបស់គាត់ធ្លាប់មានភ្ញៀវចេញចូលទិញឬលក់មាសចន្លោះប្រមាណ ៧០ទៅ៨០នាក់ក្នុងមួយថ្ងៃ តែមកទល់ឥឡូវនេះ មានតែប្រមាណ ១០នាក់ប៉ុណ្ណោះក្នុងមួយថ្ងៃ។ ការថយចុះនេះ ត្រូវបានម្ចាសហាងប្ដូរប្រាក់ និងលក់គ្រឿងអលង្ការរូបនេះ អះអាងថា គឺដោយសារតែពលរដ្ឋមានការភ័យខ្លាចការឆ្លងមេរោគកូវីដ-19 មិនសូវហ៊ានចេញដើរនោះទេ ទាល់តែមានការចាំបាច់។
លោកស្រី សាង លីម មានប្រសាសន៍ថា «អូនអើយ នៅទីផ្សារស្ងាត់ជ្រាបទេអូនអើយ មនុស្ស (អ្នកចូលទិញ ឬលក់មាស) ធ្លាប់មាន៧០ នាក់ ៨០នាក់ ឥឡូវមានតែ១០នាក់ទេអូន។ រាល់ដងមានមនុស្សច្រើនទៅ យើងមានទីផ្សារអញ្ចឹងទៅ ឥឡូវវាអត់អ្នកទិញ អត់អ្នកលក់អូន»។
អត្ថបទទាក់ទង!
បើទោះបីជាមួយរយៈមកនេះ ហាក់ស្បើយភ្ញៀវជាងមុនក៏ដោយចុះ
ប៉ុន្ដែ បើតាមម្ចាស់ហាងប្ដូរប្រាក់ និងលក់គ្រឿងអលង្ការលី ហួរ បានគូសបញ្ជាក់ថា តម្លៃមាសគឺមិនមានការថយចុះទេ
នៅតែកើនឡើងដដែល។ ជាក់ស្ដែង សម្រាប់តម្លៃមាសទិញចូលនៅថ្ងៃនេះ គឺមានតម្លៃ ១.៩៤០ ដុល្លារក្នុងមួយតម្លឹង
និងលក់ចេញវិញក្នុងតម្លៃ ១.៩៦០ ដុល្លារ ក្នុងមួយតម្លឹង។ តម្លៃនេះ គឺមានការកើនឡើងប្រមាណ
២០ដុល្លារក្នុងមួយតម្លឹងបើធៀបនឹងកាលពីប៉ុន្មានថ្ងៃមុន។
លោកស្រី គង់ ពិសី ម្ចាស់ហាងមាសពេជ្រហេងហេង នៅរាជធានីភ្នំពេញ បានគូសបញ្ជាក់ដែរថា នៅមួយរយៈចុងក្រោយនេះ សកម្មភាពទិញលក់មាសរបស់ពលរដ្ឋ គឺហាក់មានការថយចុះតិចជាងមុនបន្តិចមែន ប៉ុន្ដែ មិនសូវជាធ្លាក់ខ្លាំងទេ។ លោកស្រីបន្ថែមថា កាលពីឆ្នាំមុន នៅខែមេសានេះ គឺជាពេលដែលលក់មាសដាច់ខ្លាំង ប៉ុន្ដែ សម្រាប់ឆ្នាំនេះ គឺហាក់ស្ងប់ស្ងាត់ ព្រោះតែមានបញ្ហាកូវីដ-១៩។
លោកស្រី គង់ ពិសី មានប្រសាសន៍ថា «ការលក់ចេញ (មាស) បើប្រៀបធៀបទៅពីមិនទាន់មានរឿងជំងឺនេះកើតឡើង គឺឆ្នាំទៅ ខែធម្មតា ខែនេះ យើងនៅលក់ដាច់ យើងលក់ដាច់ខ្លាំង ប៉ុន្ដែដល់តែពេលមានជំងឺនេះកើតឡើង គឺធ្លាក់ចុះដែរ ប៉ុន្ដែធ្លាក់ចុះនៅតិចនៅឡើយ មិនទាន់ថាធ្ងន់ធ្ងរពេកទេ។ ហើយមានអ្នកមកលក់ដូរ ដូចថា ជីវភាពល្មមៗគាត់លក់ចាយអីខ្លះដែរ ប៉ុន្ដែដូចថា នៅតិចដែរមិនទាន់ខ្លាំងក្លានៅឡើយ ប៉ុន្ដែបើតទៅមុខទៀតយ៉ាងម៉េចខ្ញុំក៏អត់ដឹងដែរចា!»។
ទាក់ទងនឹងរឿងទីផ្សារមាសនេះដែរ បើយើងក្រឡេកទៅមើលប្រទេសថៃឯណោះវិញ នៅអំឡុងពេលមានវិបត្តិកូវីដ-១៩នេះ គេសង្កេតឃើញពលរដ្ឋថៃនៅក្នុងក្រុងបាងកក នៅតែបន្ដនាំគ្នាយកមាសទៅលក់នៅហាងលក់មាស ដោយកាលពីប៉ុន្មានថ្ងៃមុននេះ មានការឈតម្រង់ជួរព្រោងព្រាតនៅមុខហាងមាសក្នុងក្រុងបាងកកដើម្បីរង់ចាំលក់មាស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
