សរុបចំនួនអ្នកឆ្លងកូវីដ-១៩ ក្នុងព្រឹត្តិការណ៍សហគមន៍ ២៨ វិច្ឆិកា គិតត្រឹមថ្ងៃទី ០១ ខែធ្នូ ឆ្នាំ២០២០ គឺមានចំនួនសរុប ១៧ នាក់ហើយ ដោយក្នុងនោះ កាលពីថ្ងៃទី ៣០ ខែវិច្ឆិកា ក៏បានរកឃើញ៣នាក់ផងដែរ។
គិតតាំងពីថ្ងៃទី ២៩ ខែវិច្ឆិកា ដល់ថ្ងៃទី ០១ ខែធ្នូ ឆ្នាំ២០២០ ក្រសួងសុខាភិបាលបានធ្វើតេស្ដអ្នកប៉ះពាល់សរុបទាំងអស់បានចំនួន ៨.២១២ នាក់ហើយ។ ក្នុងនោះ វត្ថុសំណាកចំនួន ៧.១៣១ នាក់ត្រូវបានវិភាគរួចហើយ ខណៈដែលចំនួនវត្ថុសំណាកនៅសល់ចំនួន ១.០៨១ នាក់ទៀត នឹងត្រូវវិភាគបន្ដនៅថ្ងៃទី ០២ ខែធ្នូឆ្នាំ២០២០នេះ ដោយវិទ្យាស្ថានប៉ាស្ទ័រកម្ពុជា។
អត្ថបទទាក់ទង!
ដោយឡែក ចំពោះអ្នកឆ្លងកូវីដ-១៩ ចំនួន ០៣ នាក់ ដែលជាករណីនាំចូល ដែលត្រូវបានរកឃើញនៅថ្ងៃទី ០១ ខែធ្នូនេះ រួមមាន៖
១៖ បុរសជនជាតិខ្មែរ អាយុ ២៦ឆ្នាំ មានអាសយដ្ឋានស្នាក់នៅស្រុកដងទង់ ខេត្តកំពត ធ្វើដំណើរមកពីប្រទេសជប៉ុន បន្តជើងហោះហើរ នៅប្រទេសកូរ៉េខាងត្បូង មកដល់កម្ពុជានៅថ្ងៃទី១៨ ខែវិច្ឆិកា ឆ្នាំ២០២០ ដែលលទ្ធផលធ្វើតេស្តវត្ថុសំណាកលើកទី ២ នៅថ្ងៃទី១៣ នៃការធ្វើចត្តាឡីស័ករបស់បុរសនេះ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្ន អ្នកជំងឺត្រូវបានដាក់ឱ្យសម្រាកព្យាបាល នៅមណ្ឌលសុខ ភាពចាក់អង្រែ រាជធានីភ្នំពេញ។
២៖ បុរសជនជាតិខ្មែរ អាយុ ៤៦ឆ្នាំ មានអាសយដ្ឋានស្នាក់នៅខេត្តកណ្ដាល ធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី១៨ ខែវិច្ឆិកា ឆ្នាំ២០២០ ដែលលទ្ធផលធ្វើតេស្តវត្ថុសំណាក លើកទី២ នៅថ្ងៃទី១៣ នៃការធ្វើចត្តាឡីស័ករបស់បុរសនេះ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានី ភ្នំពេញ គឺ វិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺត្រូវបានដាក់ឱ្យសម្រាកព្យាបាល នៅមណ្ឌលសុខភាពចាក់ អង្រែ រាជធានីភ្នំពេញ។
៣៖ ស្ត្រីជនជាតិខ្មែរ អាយុ ៣៥ឆ្នាំ មានអាសយដ្ឋានស្នាក់នៅស្រុកទឹកឈូ ខេត្តកំពត ធ្វើដំណើរមកពីប្រទេសចិន មកដល់កម្ពុជានៅថ្ងៃទី១៨ ខែវិច្ឆិកា ឆ្នាំ២០២០ ដែលលទ្ធផលធ្វើតេស្តវត្ថុសំណាកលើកទី២ នៅថ្ងៃទី១៣ នៃការធ្វើចត្តាឡីស័ករបស់ស្ត្រីនេះ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយ បច្ចុប្បន្នអ្នកជំងឺត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
សូមបញ្ជាក់ថា គិតត្រឹមព្រឹកថ្ងៃទី ០២ ខែធ្នូ ឆ្នាំ២០២០ ចំនួនឆ្លងកូវីដ-១៩ សរុបមានចំនួន ៣២៩នាក់ ដោយក្នុងនោះ អ្នកជាសះស្បើយមានចំនួន៣០៤នាក់ (ស្មើនឹង៩២,៤០% ធៀបនឹងចំនួនអ្នកឆ្លងសរុប)។ រីឯអ្នក កំពុងសម្រាកព្យាបាលវិញ មានចំនួន ២៥នាក់ និងមិនមានអ្នកស្លាប់នោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
