ប្រជាពលរដ្ឋរស់នៅក្នុងតំបន់ប្រឈមនឹងការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវផ្សេងទៀត ដែលបានកំណត់ដោយក្រសួងសុខាភិបាល ឬរាជរដ្ឋាភិបាល អាចប្រឈមនឹងការព្រមាន ឬពិន័យអន្តរការប្រសិនបើពួកគេល្មើសនឹងការណែនាំ ឬបទបញ្ជាណាមួយពាក់ព័ន្ធការពាក់ម៉ាស និងការរក្សាគម្លាតសុវត្ថិភាព។
មាត្រា២៩នៃអនុក្រឹត្យថ្មីបានចែងដូច្នេះថា៖«ត្រូវព្រមាន និងណែនាំដោយមន្ត្រីក្រសួងសុខាភិបាល ឬអាជ្ញាធរមានសមត្ថកិច្ច ចំពោះបុគ្គលដែលមិនអនុវត្តនូវកាតព្វកិច្ចពាក់ម៉ាស ដែលមានចែងក្នុងមាត្រា៥ ឬកាតព្វកិច្ចរក្សាគម្លាតសុវត្ថិភាពបុគ្គល ដែលមានចែងក្នុងមាត្រា៧នៃអនុក្រឹត្យនេះ។ ក្នុងករណីនៅតែបន្តប្រព្រឹត្តអំពើល្មើសដដែល ត្រូវផ្តន្ទាទោសពិន័យអន្តរការណ៍ពី ២០ម៉ឺនរៀល ទៅ១លានរៀល»។
អត្ថបទទាក់ទង!
ទន្ទឹមនឹងនេះ ពួកគេអាចនឹងរងពិន័យអន្តរការណ៍ទ្វេដង ប្រសិនបើរកឃើញថា នៅតែប្រព្រឹត្តអំពើល្មើសជាលើកទីពីរ បន្ទាប់ពីរងការពិន័យលើកទីមួយរួច។
ក្នុងមាត្រានេះដែរ ក៏បានចែងពីការព្រមាន ឬពិន័យលើបុគ្គលទទួលខុសត្រូវរៀបចំការជួបជុំមនុស្ស ឬសកម្មភាពសង្គមដទៃទៀតដែលមិនគោរពតាមវិធានការរក្សាគម្លាតសុវត្ថិភាពសង្គមផងដែរ។ ក្នុងករណីនៅតែប្រព្រឹត្តអំពើល្មើស ពួកគេត្រូវផ្តន្ទាទោសជាពិន័យអន្តរការណ៍ពី ១លានរៀល ទៅ៥លានរៀល។
មាត្រា៥ នៃអនុក្រឹត្យស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀតបានចែងថា ការពាក់ម៉ាសត្រូវធ្វើជាកាតព្វកិច្ច ដោយផ្អែកតាមសកម្មភាពការងារ ឬស្ថានភាពមុខរបររបស់បុគ្គល ឬទីកន្លែងដែលមានហានិភ័យនៃការចម្លងជំងឺកូវីដ-១៩។ បុគ្គលដែលមានកាតព្វកិច្ចពាក់ម៉ាស និងទីកន្លែងដែលតម្រូវឲ្យមានការពាក់ម៉ាស ត្រូវកំណត់ដោយក្រសួងសុខាភិបាល ដោយផ្អែកលើកម្រិតនៃការឆ្លងរាលដាលនៃជំងឺកូវីដ-១៩។
អនុក្រឹត្យស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀត ដែលមានកម្រាស១០ទំព័រ ៩ជំពូក និង៣៥មាត្រានេះ ត្រូវបានសម្តេចនាយករដ្ឋមន្ត្រី ហ៊ុន សែន ចុះហត្ថលេខាដាក់ឲ្យប្រើប្រាស់នៅថ្ងៃទី១២ ខែមីនា ឆ្នាំ២០២១៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
