នៅក្នុងកិច្ចសម្ភាសន៍ដែលលោកជំទាវ យក់ សម្បត្តិ បានឲ្យដឹងថា គណៈកម្មការចំពោះកិច្ចនៃលទ្ធកម្មវ៉ាក់សាំងគឺបានប្រជុំពិភាក្សាចំនួនពីរដងរួចមកហើយនៅក្នុងការព្យាយាមស្វែងរកនូវប្រទេសមួយចំនួន ដែលកម្ពុជាអាចមានលទ្ធភាពនៅក្នុងការបញ្ជាទិញបាន ហើយចំពោះមុខនេះ កម្ពុជាក៏កំពុងតែធ្វើការតាមរយៈស្ថានទូតរបស់កម្ពុជាប្រចាំប្រទេស ជប៉ុន ឥណ្ឌា កូរ៉េ រួមទាំងអង់គ្លេសផងដែរ នៅក្នុងការបញ្ជាទិញវ៉ាកសាំងប្រភេទ AstraZenecaនៅតាមបណ្ដារោងចក្រនៅប្រទេសទាំងអស់នោះ ហើយលោកស្រីរំពឹងថា នៅសប្ដាហ៍នេះ ឬក៏អាចសប្ដាហ៍ក្រោយកម្ពុជា នឹងទទួលបានការឆ្លើយតបពីខាងស្ថានទូតកម្ពុជាដែលប្រចាំនៅតាមបណ្ដាប្រទេសទាំង៤នោះ។
បើតាមលោកជំទាវ យក់ សម្បត្តិ បានបន្ថែមទៀតកម្ពុជាត្រូវការវ៉ាក់សាំង AstraZeneca មិនតិចជាង ២ទៅ៤លានដូសសម្រាប់ការចាក់ដូសទី៣ ឬដូសជំរុញនេះ។
អត្ថបទគួរចាប់អារម្មណ៏
គួរបញ្ជាក់ផងដែរថា របាយការណ៍របស់ក្រសួងសុខាភិបាល នៅថ្ងៃទី០៧ សីហា ឆ្នាំ២០២១ កម្ពុជាបានចាប់ផ្ដើមនូវយុទ្ធនាការ ការចាក់វ៉ាក់សាំង AstraZeneca ដូសជំរុញ ឬដូសទី៣ ដល់ជូនគ្រូពេទ្យជួរមុខ និងមន្ត្រីរាជការ នៃខេត្តចំនួន៧ ដែលមានព្រំប្រទល់ជាប់ប្រទេសថៃ និងរាជធានីភ្នំពេញផងដែរ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ កាន់តែមានប្រសិទ្ធភាពខ្ពស់។
គិតមកត្រឹមថ្ងៃទី ១១ ខែ សីហា ឆ្នាំ២០២២ កម្ពុជាបានសម្រេចការការចាក់វ៉ាក់សាំងជូនប្រជាជនដែលមានអាយុ១៨ឆ្នាំឡើងទៅបាន ៨១%ហើយនៅក្នុងគោលដៅប្រជាជន ១០លាននាក់។ ការចាក់សម្រាប់កុមារ និងយុវវ័យបានចំនួនជាង ២០% នៃគោលដៅប្រជាជនសរុប ២លាននាក់នៅទូទាំងប្រទេស។ រីឯអ្នក បានទទួលការចាក់វ៉ាក់សាំងដូសទី៣ ឬដូសជំរុញវិញ បានដល់ជាង១០ម៉ឺននាក់ហើយ៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
