នេះបើតាមកាគូសបញ្ជាក់ពីសម្តេច តេជោ ហ៊ុន សែន នាយករដ្ឋមន្ត្រី នៃកម្ពុជា នាឱកាស សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា
ថ្លែងនៅក្នុងឱកាសអញ្ជើញក្នុងពិធីប្រគល់-ទទួល អំណោយវ៉ាក់សាំងកូវីដ-១៩ ពីរដ្ឋាភិបាលប្រទេសអ៊ីតាលី នៅថ្ងៃទី ២៥ ខែមេសា សម្តេចតេជោ ហ៊ុន សែន បានគូសបញ្ជាក់ផងដែរថា ស្របពេលដែលជំងឺកូវីដ-១៩ នៅតែបង្កឱ្យមាននូវភាពមិនប្រាកដប្រជា រាជរដ្ឋាភិបាល នឹងបន្តជំរុញយុទ្ធនាការជាតិចាក់វ៉ាក់សាំង ដែលអំណោយវ៉ាក់សាំងកូដ-១៩ ដ៏ថ្លៃថ្លាពីប្រជាជន និងរដ្ឋាភិបាលអ៊ីតាលី នឹងចូលរួមចំណែកយ៉ាងសំខាន់ផងដែរ។ ទន្ទឹមនេះ សម្តេចតេជោ ហ៊ុន សែន បានបញ្ជាក់ឲ្យដឹងដែរថា កម្ពុជានឹងមានវ៉ាក់សាំងមកជាបន្តបន្ទាប់ ដែលនៅសល់ប្រមាណជាង២០លានដូសទៀត ដែលជាការសន្យាផ្តល់ឱ្យរបស់ប្រទេសជាមិត្តភក្តិ ដែលនឹងបញ្ជូនមកកម្ពុជាជាបន្តបន្ទាប់ផងដែរ។
ជាមួយគ្នានេះ សម្តេចតេជោ ហ៊ុន សែន ក៏បានស្នើឱ្យក្រុមគ្រូពេទ្យទាំងខាងកងទ័ព ស៊ីវិល ព្រមទាំងក្រុមគ្រូពេទ្យស្ម័គ្រចិត្ត តម្រង់ឆ្ពោះទៅរកគោលដៅដែលត្រូវចាក់វ៉ាក់សាំងបង្ការជំងឺកូវីដ១៩ ដែលនៅសេសសល់ និងអំពាវនាវជាថ្មីឱ្យប្រជាពលរដ្ឋចាក់វ៉ាក់សាំងដូសទី៣ ដែលជាកាតព្វកិច្ចតម្រូវតែម្តង ដោយកម្ពុជានៅសល់មនុស្សប្រមាណជាង ៦លាននាក់ទៀត ដែលមិនទាន់ចាក់ដូសទី៣ ខណៈពលរដ្ឋជាង១លាននាក់បានចាក់ដូសទី៤ រួចហើយ ដោយគិតត្រឹមថ្ងៃទី២៤ ខែមេសា អត្រាចាក់វ៉ាក់សាំងកូវីដ-១៩ នៅកម្ពុជា មានចំនួនជាង ៩៣% ធៀបនឹងចំនួនប្រជាជនសរុប១៦លាននាក់ផងដែរ។
អត្ថបទគួរអាន
នាឱកាសនេះដែរ សម្តេច បានបញ្ជាក់ផងដែរថា កម្ពុជាសម្តែងនូវអំណរគុណដល់រដ្ឋាភិបាលអ៊ីតាលី ចំពោះកិច្ចខិតខំប្រឹងប្រែងក្នុងការរឹតបន្ដឹងចំណងមិត្តភាព និងជំរុញកិច្ចសហប្រតិបត្តិការរវាងអ៊ីតាលី-កម្ពុជា ទាំងផ្នែកការទូតនិងសេដ្ឋកិច្ច ។ ជាក់ស្តែងកម្ពុជា ស្វាគមន៍យ៉ាងកក់ក្តៅ និងសាទរ ចំពោះការបង្កើតស្ថានកុងស៊ុលកិត្តិយសនៅកម្ពុជានៅក្នុងឆ្នាំ២០២០ និងភាពរីកចម្រើន និងភាពសកម្មនៃសហគមន៍ធុរកិច្ចអ៊ីតាលី ជាពិសេសសមាគមធុរកិច្ចអ៊ីតាលីកម្ពុជា (Italian-Cambodian Business Association-ICBA)ក្នុងការជំរុញ និងលើកកម្ពស់ការវិនិយោគននៅកម្ពុជា។ ស្របពេលជាមួយគ្នានេះដែរ កម្ពុជាក៏សូមវាយតម្លៃខ្ពស់ចំពោះការជំរុញកិច្ចសហប្រតិបត្តិការរវាងអ៊ីតាលី-អាស៊ាន និងសហភាពអឺរ៉ុប-អាស៊ាន ។ ក្នុងនាមប្រធានអាស៊ាននៅក្នុងឆ្នាំ ២០២២ កម្ពុជានឹងបន្តជំរុញកិច្ចសហប្រតិបត្តិការនេះ លើគ្រប់វិស័យឱ្យកាន់តែមានភាពរឹងមាំ ហើយកម្ពុជាក៏សូមលើកទឹកចិត្តដល់សាធារណរដ្ឋអ៊ុតាលី ក៏ដូចជាសហភាពអឺរ៉ុប បន្តជំរុញការធ្វើធុរកិច្ច និងវិនិយោគនៅកម្ពុជា ក៏ដូចជាអាស៊ានបន្ថែមទៀតផងដែរ៕
អត្ថបទ សោម ស្រីពេជ្រ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
