នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងបែបនេះ នាឱកាសអញ្ជើញចូលរួមសម្ពោធដាក់ឱ្យប្រើប្រាស់ជាផ្លូវការស្ពានឆ្លងទន្លេមេគង្គ មិត្តភាពកម្ពុជា-ចិន ស្ទឹងត្រង់ក្រូចឆ្មារ និងពិធីបើកការដ្ឋានសាងសង់ផ្លូវជាតិលេខ៧១C នៅថ្ងៃទី២៣ ខែវិច្ឆិកា ដែលជាហិរញ្ញប្បទានរបស់រដ្ឋាភិបាលចិន និងថវិកាបដិភាគមួយចំណែករបស់រាជរដ្ឋាភិបាលកម្ពុជា។
សម្ដេចតេជោ ហ៊ុន សែន បានថ្លែងបញ្ជាក់ថា កម្ពុជា-ចិន មានទំនាក់ទំនងយ៉ាងជិតស្និទ និងរឹងមាំផ្នែកនយោបាយ,ពាណិជ្ជកម្ម,វិនិយោគ និងសេដ្ឋកិច្ច ជាដើម។ សម្តេចនាយករដ្ឋមន្ត្រីក៏បានសង្កត់ធ្ងន់ទៀតថា សមិទ្ធិផលជាច្រើននៅកម្ពុជា សុទ្ធតែមានការរួមចំណែកពីរដ្ឋាភិបាលចិន ពិសេសផ្នែកហេដ្ឋារចនាសម្ព័ន្ធដឹកជញ្ជូននៅកម្ពុជា ដែលរួមចំណែកយ៉ាងសំខាន់លើការងារដឹកជញ្ជូនកសិផលរបស់កសិករទៅកាន់ទីផ្សារ កាត់បន្ថយថ្លៃចំណាយលើមធ្យាបាយដឹកជញ្ជូន និងជំរុញសេដ្ឋកិច្ចកម្ពុជាឡើងវិញ។
បើទោះបីជា កម្ពុជា បានចាត់ទុកប្រទេសចិន ជាផ្អែកដ៏សំខាន់ក្នុងការអភិវឌ្ឍន៍សេដ្ឋកិច្ច និងសង្គម នៅកម្ពុជា ក៏ពិតមែន ប៉ុន្តែ សម្ដេច ហ៊ុន សែន បានសង្កត់ធ្ងន់ថា កម្ពុជា ស្វាគមន៍ជានិច្ចរាល់វិនិយោគគិនដទៃ ដែលចង់វិនិយោគគម្រោងនានា ក៏ដូចជា ផ្នែកហេដ្ឋារចនាសម្ព័ន្ធ នៅកម្ពុជា។ ក្នុងន័យនេះ សម្ដេចចង់បញ្ជាក់ថា កម្ពុជា មិនមែនពឹងពាក់តែលើប្រទេសចិនតែមួយ ដូចការលើកឡើងពីបរទេសនោះទេ។
អត្ថបទគួរអាន
ដោយឡែក ឯកឧត្តម ស៊ុន ថុល ទេសរដ្ឋមន្ត្រីរដ្ឋមន្ត្រីក្រសួងសាធារណៈការនិងដឹកជញ្ជូន បានចាត់ទុកការផ្ដល់ហិរញ្ញប្បទានសម្បទានជំនួយឥតសំណង និងជំនួយបច្ចេកទេសជាបន្ដបន្ទាប់របស់រដ្ឋាភិបាលចិន មកកាន់កម្ពុជា គឺជាការចូលរួមចំណែកដ៏សំខាន់ ក្នុងការស្ដារ និងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូននៅកម្ពុជា សំដៅជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្រឱ្យកាន់តែថយចុះបន្ថែមទៀត។
ជាមួយគ្នានោះ ទេសរដ្ឋមន្ត្រី ស៊ុន ចាន់ថុល ក៏បានសង្កត់ធ្ងន់ដែរថា ស្ពានមិត្តភាពកម្ពុជា-ចិន ស្ទឹងត្រង់ក្រូចឆ្មារ និងផ្លូវជាតិលេខ៧១C ដែលទើបសម្ពោធដាក់ឲ្យដំណើរការនេះ គឺជាគម្រោងយុទ្ធសាស្ត្រប្រទាក់ក្រឡាគ្នាយ៉ាងសំខាន់ សម្រាប់តភ្ជាប់ទំនាក់ទំនងសកម្មភាពពាណិជ្ជកម្ម សម្រួលដល់ការដឹកជញ្ជូនផលិតផលកសិកម្ម និងកសិ-ឧស្សាហកម្ម ឱ្យកាន់តែរហ័ស កាត់បន្ថយការចំណាយ និងចំណេញពេលវេលា។
សូមបញ្ជាក់ថា ស្ពានមិត្តភាពកម្ពុជា-ចិន ស្ទឹងត្រង់ក្រូចឆ្មារ បានចំណាយពេលសាងសង់ចំនួន៤២ខែ និងចំណាយថវិកាជិត៥៧លានដុល្លារ។
តួលេខពីក្រសួងពាណិជ្ជកម្មកម្ពុជា បង្ហាញថា នៅ៩ខែដំបូងនៅឆ្នាំ២០២១ ទំហំពាណិជ្ជកម្ពុជាចិន សម្រេចបានជិត៨ពាន់លានដុល្លារកើនជាង៣៨%ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ កម្ពុជានាំចេញទៅចិនសម្រេចបាន ជាង១ពាន់លានដុល្លារកើនជាង៥២% ខណៈការនាំចូលពីចិនមកវិញមានជាង៦ពាន់៨រយលានដុល្លារកើនជាង៣៦%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
