មន្ត្រីជាន់ខ្ពស់រដ្ឋាភិបាល៖ ទំហំពាណិជ្ជកម្មរវាងកម្ពុជា-ថៃអាចនឹងកើនឡើងថែមទៀតទេ ក្រោយព្រំដែនបើកឲ្យមានការធ្វើដំណើរឡើងវិញ

មន្ត្រីជាន់ខ្ពស់នៃក្រសួងកសិកម្ម និងក្រសួងពាណិជ្ជកម្ម សុទ្ធតែបានមើលឃើញថា ការបើកច្រកទ្វារព្រំដែននេះ នឹងជាឱកាសសម្រាប់កម្ពុជា ដើម្បីបង្កើនទំនាក់ទំនងពាណិជ្ជកម្មទ្វេភាគីជាមួយប្រទេសថៃកាន់តែប្រសើរឡើងមួយកម្រិតទៀត ពិសេសបង្កើនការនាំចេញផលិតផលពីកម្ពុជា ទៅកាន់ប្រទេសថៃតែម្ដង។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានគូសបញ្ជាក់ថា ការបើកច្រកព្រំដែនអន្តរជាតិរវាងកម្ពុជា និងថៃឲ្យពលរដ្ឋអាចធ្វើដំណើរឡើងវិញនេះ នឹងជួយជំរុញថែមទៀតសម្រាប់ការធ្វើពាណិជ្ជកម្មរវាងប្រទេសទាំង២ កាន់តែមានភាពសកម្មជាងមុន ពិសេសឆ្លើយតបនឹងតម្រូវការទីផ្សារក្នុងអំឡុងពេលស្តារសេដ្ឋកិច្ចឡើងវិញក្រោយកូវីដ-១៩ បានធូរស្បើយ។ លើសពីបង្កើនទំនាក់ទំនងល្អ ការបើកច្រកឡើងវិញនេះ ក៏ជាឱកាសសម្រាប់ការនាំចេញកសិផលកម្ពុជា ទៅកាន់ទីផ្សារប្រទេសថៃដែរ។ ខណៈការបញ្ជាទិញនិងការត្រៀមធ្វើសកម្មភាពនាំចេញគឺមានស្រាប់អស់ហើយ។ នេះជាការបញ្ជាក់បន្ថែមរបស់ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។

ជុំវិញនឹងការបើកច្រកព្រំដែនអន្តរជាតិរវាងកម្ពុជា-ថៃនេះដែរ ត្រូវបានឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ បានបង្ហាញការសាទរយ៉ាងពេញទំហឹង។ ក៏ប៉ុន្តែ រដ្ឋមន្រ្តីក្រសួងកសិកម្ម បានសង្កត់ធ្ងន់ថា ការបើកច្រកទ្វារព្រំដែននេះ មិនប្រាកដថា អាចនឹងជួយដោះស្រាយបញ្ហាទីផ្សាររបស់កសិផលខ្មែរ ដែលជួបបញ្ហានាពេលកន្លងមកនោះទេ ដោយសារការនាំចូលផលិតផលនីមួយៗ ទៅប្រទេសថៃ ទាមទារលក្ខខណ្ឌតម្រូវមួយចំនួន ពិសេសទាក់ទងនឹងផលិតផលកសិកម្មតែម្ដង។

ទម្រាំកម្ពុជា អាចនាំកសិផលចូលទៅប្រទេសថៃបាន ចាំបាច់គោរពនូវលក្ខខណ្ឌស្មុគស្មាញមួយចំនួន។ ក្នុងនោះ រួមមាន ការជាប់របាំងភូតគាមអនាម័យ, ត្រូវរង់ចាំឲ្យប្រជាជនថៃប្រមូលផលរួចរាល់សិន ទើបអាចនាំចូលកសិផលពីខាងក្រៅ គួបផ្សំការបិទ-បើកច្រកនាំចេញផលិតផលកសិកម្មជាមួយថៃ មិនទៀងទាត់ ដែលទាំងអស់នេះ គឺជាបញ្ហាប្រឈមខ្លាំងណាស់ សម្រាប់កម្ពុជាលើដំណើរការនាំចេញកសិផលរបស់ខ្លួន ទៅកាន់ទីផ្សារប្រទេសថៃ។ នេះបើតាមការបញ្ជាក់បន្ថែមរបស់រដ្ឋមន្រ្តីក្រសួងកសិកម្ម ឯកឧត្តម វេង សាខុន។

សូមបញ្ជាក់ថា រយៈពេល ៤ខែ ក្នុងឆ្នាំ២០២២ ទំហំពាណិជ្ជកម្មរវាងកម្ពុជា-ថៃ មានប្រមាណ ១ពាន់២រយលានដុល្លារអាមេរិក។ ក្នុងនោះ ទំនិញដែលកម្ពុជា នាំចេញទៅប្រទេសថៃ មានទឹកប្រាក់តែជាង១រយលានដុល្លារប៉ុណ្ណោះ ខណៈទំនិញកម្ពុជា នាំចូលពីប្រទេសថៃវិញមានទំហំទឹកប្រាក់រហូតជាង១ពាន់លានដុល្លារ ឯណោះ។ នេះបើយោងតាមរបាយការណ៍របស់ក្រសួងពាណិជ្ជកម្ម ផ្ដល់ឲ្យសារព័ត៌មានខេមបូណូមីស៕