តាមទិន្នន័យបង្ហាញថា នៅ១១ខែ ឆ្នាំ២០២០ ការនាំចេញរបស់កម្ពុជាទៅអាមេរិកសម្រេចបានដល់ ៦ពាន់លានដុល្លារ ហើយបើធៀបនឹង១១ខែឆ្នាំ២០១៩ គឺបានកើនឡើងដល់ទៅ១ពាន់១រយលានដុល្លារអាមេរិកឯណោះ។ ប៉ុន្ដែ ការនាំចូលអាមេរិកមកកម្ពុជាវិញ នៅ១១ខែ ឆ្នាំ២០២០ មានត្រឹមតែជាង ៣១២លានដុល្លារអាមេរិក ធៀបនឹង១១ខែឆ្នាំ២០១៩ ធ្លាក់ចុះជាង១៧០លានដុល្លារអាមេរិក។
មន្ត្រីនាំពាក្យក្រសួងពាណិជ្ជកម្មកម្ពុជានាពេលកន្លងទៅនេះ បានឲ្យដឹងថា ការនាំចេញរបស់កម្ពុជាទៅអាមេរិក មិនបានរងផលប៉ះពាល់ដោយសារកូវីដ-១៩នោះទេ។ ប្រទេសកម្ពុជា មានផលិតផលនាំចេញសំខាន់ៗទៅអាមេរិកដូចជា វាយនភណ្ឌ ស្បែកជើង សម្ភារសម្រាប់ការធ្វើដំណើរ កង់ និងផលិតផលកសិកម្ម។ រីឯនាំចូលពីអាមេរិកមកវិញ មានដូចជា យានយន្ដ ចំណីសត្វ និងគ្រឿងម៉ាស៊ីន។
អត្ថបទទាក់ទង
យ៉ាងណាក៏ដោយចុះ បើតាមសេចក្ដីជូនដំណឹងរបស់សមាគមរោងចក្រកាត់ដេរកម្ពុជា កាលពីថ្ងៃទី ៦ ខែមករា បានឲ្យដឹងថា ដោយសារតែប្រព័ន្ធអនុគ្រោះពន្ធទូទៅ GSP ដែលផ្ដល់ដោយអាមេរិកត្រូវបានផុតសុពលភាពកាលពីថ្ងៃទី ៣១ ខែធ្នូ ឆ្នាំ២០២០ បានតម្រូវឲ្យផលិតផលសម្រាប់ការធ្វើដំណើរទាំងអស់របស់កម្ពុជា ដែលនាំចេញទៅអាមេរិកនឹងតម្រូវឲ្យបង់ពន្ធនាំចូលរហូតដល់ប្រព័ន្ធអនុគ្រោះពន្ធរបស់អាមេរិកមួយនេះ ត្រូវបានផ្ដល់សុពលភាពឡើងវិញ។ បើទោះបីយ៉ាងណា អ្នកនាំចូលទំនិញទៅអាមេរិក អាចនឹងទទួលបានប្រាក់ពន្ធ ដែលខ្លួនបានបង់នោះ ត្រឡប់មកវិញ នៅពេលដែលការផ្ដល់ភាពអនុគ្រោះពន្ធ GSP នឹងត្រូវបន្ដផ្ដល់ជូនឡើងវិញនាពេលឆាប់ៗនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
