ជាក់ស្ដែង បើយោងតាមរបាយការណ៍ដែលបង្ហាញដោយសមាគមស្វាយចន្ទីវៀតណាមបានឲ្យដឹងថា នៅរយៈពេល ៤ខែ ឆ្នាំ២០២២នេះ វៀតណាមបាននាំចូលគ្រាប់ស្វាយចន្ទីពីកម្ពុជា ក្នុងបរិមាណប្រមាណ ៥០ម៉ឺនតោន ដែលគិតជាទឹកប្រាក់ ៧៦៧លានដុល្លារ មានការថយចុះ ៤៣% បើប្រៀបនឹងរយៈពេលដូចគ្នាកាលពីឆ្នាំ២០២១។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានអះអាងថា ឆ្នាំ២០២២នេះ ការដាំដុះស្វាយចន្ទី បានជួបបញ្ហាជាច្រើន ពិសេសបញ្ហាប្រែប្រួលអាកាសធាតុ និងការបញ្ជាទិញពីវៀតណាម មានការថយចុះ។ ជាក់ស្ដែង នៅរយៈពេល ៤ខែ ឆ្នាំ២០២២នេះ វៀតណាមបាននាំចូលគ្រាប់ស្វាយចន្ទីពីកម្ពុជា ក្នុងបរិមាណប្រមាណ ៥០ម៉ឺនតោន ដែលគិតជាទឹកប្រាក់ប្រមាណ ៧៦៧លានដុល្លារ ថយចុះ ៤៣% បើប្រៀបនឹងរយៈពេលដូចគ្នាកាលពីឆ្នាំ២០២១។ នេះបើតាមទិន្នន័យដែលកត់ត្រាដោយសមាគមស្វាយចន្ទីវៀតណាម។
អត្ថបទគួរអាន
បើតាមការអះអាងរបស់លោក អួន ស៊ីឡុត ទាំងគុណភាព ទិន្នផល និងតម្លៃគ្រាប់ស្វាយចន្ទី នាឆ្នាំនេះសុទ្ធតែបានធ្លាក់ចុះជាងឆ្នាំមុន។ ជាក់ស្ដែង សព្វថ្ងៃ តម្លៃគ្រាប់ស្វាយចន្ទីសើម អាចលក់បានក្នុងតម្លៃ ២ពាន់រៀល ទៅ៤ពាន់រៀល ក្នុងមួយគីឡូក្រាម។ រីឯ គ្រាប់ស្វាយចន្ទីស្ងួតវិញ មានតម្លៃ ១ពាន់៣រយដុល្លារ ទៅ១ពាន់៥រយដុល្លារ ក្នុង១តោន។ បញ្ហាការប្រែប្រួលអាកាសធាតុ គឺជាបញ្ហាចម្បង ដែលធ្វើឲ្យទិន្នផលស្វាយចន្ទី កម្ពុជាឆ្នាំនេះធ្លាក់ចុះ គួបផ្សំការបញ្ជាទិញគ្រាប់ស្វាយចន្ទីពីឈ្មួញវៀតណាម ក៏មានការថយចុះ បានធ្វើឲ្យការនាំចេញគ្រាប់ស្វាយចនន្ទីកម្ពុជា ក្នុងរយៈពេល ៤ខែ ឆ្នាំនេះ ធ្លាក់ចុះរហូតជាង ៤០% ឯណោះ ។ ជាមួយគ្នានេះ សមាគមស្វាយចន្ទីកម្ពុជា ក៏បានវាយតម្លៃដែរថា ដោយសារឆ្នាំនេះ កម្ពុជា បានជួបវិបត្តិអាកាសធាតុ ដូច្នេះ កម្ពុជា អាចផលិតគ្រាប់ស្វាយចន្ទី បានប្រមាណ ៥៧ម៉ឺនតោន ទៅ ៦០ម៉ឺនតោន ប៉ុណ្ណោះ នៅឆ្នាំ២០២២នេះ។
យ៉ាងណាក៏ដោយ បើយោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ នៅត្រីមាសទី១ ឆ្នាំ២០២២ កម្ពុជា បាននាំចេញគ្រាប់ស្វាយចន្ទីឆៅ ប្រមាណ ២៧ម៉ឺនតោន ទៅកាន់ទីផ្សារក្រៅស្រុក មានការថយចុះជិត៤០% បើប្រៀបនឹងរយៈពេលដូចគ្នានៅឆ្នាំ២០២១។ ខណៈប្រទេសវៀតណាម គឺជាទីផ្សារធំជាងគេ ក្នុងការបញ្ជាទិញគ្រាប់ស្វាយចន្ទីឆៅពីកម្ពុជា ដោយគ្រាប់ស្វាយចន្ទីស្ទើរ១០០%ទៅហើយ ដែលឈ្មួញវៀតណាម បានប្រមូលទិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
