ប្រភពព័ត៌មានពីរាជរដ្ឋាភិបាលកម្ពុជា បានឲ្យដឹងទៀតថា គម្រោងវារីអគ្គិសនីស្ទឹងតាតៃលើ គឺត្រូវបានអនុញ្ញាតឲ្យក្រុមហ៊ុនចិន China National Heavy Machinery Corporation ធ្វើការវិនិយោគអភិវឌ្ឍ ដោយគម្រោងនេះ មានអានុភាព ១៥០ មេហ្គាវ៉ាត់ នៅស្រុកថ្មបាំង ខេត្តកោះកុង ដោយមានទំហំវិនិយោគ សរុបជាង ៣៨៩ លានដុល្លារអាមេរិក។ គម្រោងវារីអគ្គិសនីស្ទឹងតាតៃលើ ជាកាវិនិយោគក្រោមរូបភាពជាគម្រោងវិនិយោគសាងសង់-ដំណើរ-ផ្ទេរ (Build-Operation-Transfer) ដោយរាជរដ្ឋាភិបាលបានផ្ដល់សម្បទានរយៈពេល ៣៩ឆ្នាំ ក្នុងនោះ ៤ឆ្នាំសម្រាប់ការសាងសង់ និង៣៥ឆ្នាំ សម្រាប់ការធ្វើអាជីវកម្ម។ គម្រោងវារីអគ្គិសនីមួយនេះ អាចផលិតថាមពេលអគ្គិសនីជាប្រចាំឆ្នាំលក់ឲ្យអគ្គិសនីកម្ពុជា ជាមធ្យម ៥២៧ លានគីឡូវ៉ាត់ម៉ោង ហើយលក់ក្នុងតម្លៃ ៧,៩២ សេនអាមេរិក ក្នុងមួយគីឡូវ៉ាត់ម៉ោង។
អត្ថបទទាក់ទង
ដោយឡែក សម្រាប់គម្រោងខ្សែបណ្ដាញបញ្ជូនត់ង់ស្យុង៥០០គីឡូវ៉ុលចំនួន ២ទៀត គឺរាជរដ្ឋាភិបាលកម្ពុជាបានផ្ដល់សិទ្ធិឲ្យក្រុមហ៊ុន SchneiTec Co.,Ltd ធ្វើការវិនិយោគអភិវឌ្ឍ ដោយវាតភ្ជាប់ពី ភ្នំពេញ ទៅព្រំដែនកម្ពុជា-ឡាវ និងពីបាត់ដំបង ទៅព្រំដែនកម្ពុជា-ថៃ។ គម្រោងខ្សែបណ្ដាញបញ្ជូនអគ្គិសនី៥០០ គីឡូវ៉ុល ពីរាជធានីភ្នំពេញ ទៅព្រំដែនកម្ពុជា-ឡាវ មានប្រវែងប្រមាណ ៣០០ គីឡូម៉ែត្រ និងពីបាត់ដំបង ទៅព្រំដែនកម្ពុជា-ថៃ មានប្រវែង១០៧ គីឡូម៉ែត្រ គឺជាគម្រោងវិនិយោគបញ្ជូនប្រភពអគ្គិសនីនាំចូលពីប្រទេសឡាវ និងប្រទេសថៃ មកក្នុងប្រព័ន្ធបណ្ដាញជាតិ។
គម្រោងវិនិយោគអភិវឌ្ឍខ្សែបណ្ដាញបញ្ជូនអគ្គិសនី៥០០ គីឡូវ៉ុល ពីបាត់ដំបង ទៅព្រំដែនកម្ពុជា-ថៃ មានទំហំវិនិយោគសរុបជិត ១១១ លានដុល្លារអាមេរិក ខណៈដែលគម្រោងពីភ្នំពេញ ទៅព្រំដែនកម្ពុជា-ឡាវ មានទំហំវិនិយោគជាង ៣៣០ លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
