ទោះយ៉ាងណា មន្ត្រីផ្នែកជលផលនៃក្រសួងកសិកម្មអះអាងថា តួលេខធ្លាក់ចុះនេះ គឺដោយសារតែនៅអំឡុងពេល៦ខែដំបូងនៅឆ្នាំនេះ ប្រជាពលរដ្ឋមានការប្រមូលផលត្រីយឺត ប៉ុន្ដែ រំពឹងថា នៅប៉ុន្មានខែទៅមុខនេះ ទិន្នផលត្រីអាចនឹងប្រមូលផលច្រើនឡើងវិញ។
លោក ថាយ សុមុនី ប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផល បានអះអាងថា ផលវារីវប្បកម្មមានការថយចុះក៏ពិតមែន ប៉ុន្តែការថយចុះហាក់មិនមានតួរលេខច្រើន ដល់ទៅជាង ៧៥% ដូចរបាយការណ៍របស់ធនាគារជាតិនោះទេ។ លោក ថាយ សុមុនី ពន្យល់ថា ការប្រមូលផលរបស់កសិដ្ឋា្ននចិញ្ចឹមត្រីនីមួយៗមានកម្រិតដោយមិនបានប្រមូលផលម្ដងទាំងអស់នោះទេ ដោយកសិដ្ឋានខ្លះត្រីមិនទាន់ធំអាចប្រមូលផលបានជាដើម។ ទោះយ៉ាងណា រហូតដល់ដាច់ឆ្នាំ ២០២២ ទើបគេអាចធ្វើការបូកសរុបតួលេខជាក់លាក់បាន ហើយរំពឹងថា ការប្រមូលផលត្រីនឹងមានច្រើនឡើងវិញ។
ប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផលរូបនេះបានបញ្ជាក់ថា ចំពោះទីផ្សារត្រីនៅពេលបច្ចុប្បន្នវិញ ហាក់មានការប្រែប្រួលតិចតួច តែមានភាពល្អប្រសើរជាងមុនអំឡុងពេលជំងឺកូវីដ១៩ រីករាលដាលធ្ងន់ធ្ងរ ពោលគឺបច្ចុប្បន្នមានការបើកសេដ្ឋកិច្ចឡើងវិញគ្រប់វិស័យ ជាក់ស្តែងដូចជាបើកឲ្យមាននូវពិធីមង្គលការ ពិធីបុណ្យ ពិធីជប់លៀងនានាជាដើម ដែលធ្វើឲ្យមានតម្រូវការត្រីកើនឡើងវិញ ដែលធ្វើឲ្យអ្នកចិញ្ចឹមមានឱកាសចំណញឡើងវិញ បើទោះបីជាពេលកន្លងមក មានជួបនូវបញ្ហាខាតបង់នានា ដោយសារស្ទះត្រីក៏។ ទោះយ៉ាងណា លោក ថាយ សុមុនី គូសបញ្ជាក់ថា នៅពេលបច្ចុប្បន្ន តម្លៃចំណីត្រីមានការកើនឡើង តម្លៃប្រេងក៏មានការកើនឡើង ដែលធ្វើឲ្យប៉ះពាល់ដល់កំណើន ការផលិតរបស់វារីវប្បកម្មផងដែរ។
លោក រ៉េន គឹមអុល អ្នកចិញ្ចឹមត្រី នៅក្នុងខេត្តកំពង់ចាម បានបញ្ជាក់ឲ្យដឹងថា ទីផ្សារត្រីនៅពេលបច្ចុប្បន្នហាក់មានតម្លៃទាប ដោយសារមានត្រីនាំចូលពីខាងក្រៅប្រទេសច្រើន ហើយមានតម្លៃថោកជាងត្រីក្នុងស្រុកផងដែរ ដែលធ្វើឲ្យទីផ្សារត្រីក្នុងស្រុកមិនអាចកើនតម្លៃបាន។ ទីផ្សារត្រីមានតម្លៃទាបថេរ ដោយត្រីប្រាមានតម្លៃ ៤៣០០ រៀលក្នុងមួយគីឡូក្រាម ត្រីពោមានតម្លៃប្រមាណ ៨.៥០០រៀលក្នុងមួយគីឡូក្រាម។ ស្របពេលតម្លៃត្រីនៅមានទាប លោក រ៉េន គឹមអុល គូសបញ្ជាក់ថា ចំណីត្រីវិញកាន់តែមានតម្លៃខ្ពស់ទៅៗ ដោយកន្ទួកក្នុងមួយបេ កាលពីមុនមានតម្លៃត្រឹមតែ ៥ម៉ឺនរៀលឡើងដល់ទៅជាង ៧ម៉ឺនរៀលក្នុងមួយបេ។
អត្ថបទគួរអាន
ជុំវិញរឿងការចិញ្ចឹមត្រីនេះដែរ លោក ចាន់ សីហា អ្នកនាំពាក្យធនាគារអភិវឌ្ឍន៍ជនបទ និងកសិកម្ម បានបញ្ជាក់ឲ្យដឹងផងដែរថា ការផ្តល់កម្ចីឥណទានក្នុងវិស័យចិញ្ចឹមត្រីនេះ គឺមានភាគរយខ្ពស់គួរសមផងដែរ បន្ទាប់ពីការចិញ្ចឹមសត្វ ហើយគម្រោងកម្ចីក្នុងវិស័យចិញ្ចឹមត្រីនេះ គឺជាគម្រោងពិសេសមួយរបស់រាជរដ្ឋាភិបាលផងដែរ។ លោកបន្ថែមថា ចំពោះការផ្តល់កម្ចីឥណទាននេះ មកទល់ពេលបច្ចុប្បន្នហាក់មិនមានអ្វីប្រែប្រួលនោះទេ ដោយសារតែការការផ្តល់កម្ចីឥណទាននេះ មានរយៈពេលយូររហូតដល់រយៈពេល២ឆ្នាំឯណោះ ដូចនេះទុនបង្វិលដែលអ្នកចិញ្ចឹមត្រីបានខ្ចី គឺអាចនៅប្រីប្រាស់ទុនទាំងនោះជាបន្តបន្ទាប់បាន ហើយខាងធនាគារអភិវឌ្ឍន៍ជនបទ និងកសិកម្មនៅតែបន្តជួយគាំទ្រពួកគាត់ ដើម្បីឲ្យពួកគាត់មានអាជីវកម្មមួយដែលពិតប្រាកដ ដែលនេះជាគោលនបាយចម្បងរបស់ធានាគារអភិវឌ្ឍន៍ជនបទ និងកសិកម្ម។
សូមបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ ជាមួយនិងដ្ឋបាលជលផល នៅតែបន្តជំរុញការបង្រៀននូវបច្ចេកទេសក្នុងការចិញ្ចឹមត្រី និងការសម្របសម្រួល ដោយសហការជាមួយសមាគមវារីវប្បករកម្ពុជា ក្នុងការពង្រឹងដល់អ្នកចិញ្ចឹមត្រីទ្រង់ទ្រាយ មធ្យម និងធំ ឲ្យស្វែងយល់ពីទីផ្សារ ពោលគឺអ្នកផលិត និងអ្នកទិញត្រូវមានការសហការជាគ្នា។ មិនតែប៉ុណ្ណោះ កន្លងមក រដ្ឋបាលជលផល ក៏ដូចជាវារីវប្បករកម្ពុជាបានជំរុញឲ្យអ្នកចិញ្ចឹមត្រីមានឱកាស ក្នុងការទទួលនូវឥណទានសម្រាបធ្វើវារីវប្បកម្ម ពីធានាគារអភិវឌ្ឍជនបទ និងកសិកម្ម ក្នុងកម្រិតអត្រាការប្រាក់ល្អ ដើម្បីបន្តជំរុញការចិញ្ចឹមត្រីនេះផង។ នេះបើតាមការអះអាងរបស់ លោក ថាយ សុមុនី ប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផល៕
