ចំណែក បរិមាណអង្ករនាំចេញទៅកាន់ទិសដៅទីផ្សារអឺរ៉ុបវិញ មានចំនួនប្រមាណជាង ១១ម៉ឺនតោន កើនឡើងចំនួន ៤៧% និង ទៅកាន់ប្រទេសក្នុងអាស៊ានមានចំនួនជិត ៣ម៉ឺនតោន កើនឡើងចំនួនជិត២%ផងដែរ។ ទន្ទឹមនឹង ការនាំចេញអង្ករកើនឡើងនេះអ្នកជំនាញ ក៏បានលើកឡើងពីបញ្ហាមួយចំនួន ដែលវិស័យនេះកំពុងជួបប្រឈមផងដែរ។
ជុំវិញដំណើរការនៃការនាំចេញអង្ករកម្ពុជាទៅកាន់ទីផ្សារអន្តរជាតិនេះដែរ លោក លន់ យ៉េង អគ្គលេខាធិការសហព័ន្ធស្រូវ-អង្ករ កម្ពុជា កាលពីពេលថ្មីៗនេះ បានកត់សម្គាល់ដូច្នេះ ដំណើរការនាំចេញអង្ករ របស់កម្ពុជានៅឆ្នាំ២០២២ ហាក់មានភាពប្រសើរជាងឆ្នាំ២០២១ ហើយប្រទេសចិន នៅតែជាទីផ្សារធំសម្រាប់នាំចេញអង្កររបស់កម្ពុជា។ បើទោះជាបែបនេះក្ដី អគ្គលេខាធិការសហព័ន្ធស្រូវ-អង្ករ កម្ពុជា ក៏បានបង្ហាញពីការព្រួយបារម្ភចំពោះបញ្ហាប្រឈមមួយចំនួន ដែលបន្តកើតមានក្នុងវិស័យនេះ ដូចជា បញ្ហាថ្លៃដឹកជញ្ជូន និងការចំណាយលើថ្លៃដើមកាន់តែខ្ពស់ ដូចជា ថ្លៃជី-ថ្នាំកសិកម្ម កាន់តែកើនឡើងជាដើម។
យោងតាមរបាយការណ៍ ដែលទទួលបានពីអ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានបង្ហាញថា នៅរយៈពេល៧ខែ ក្នុងឆ្នាំ២០២២ កម្ពុជាបាននាំចេញអង្ករគ្រប់ប្រភេទទៅកាន់ទីផ្សារអន្តរជាតិ ក្នុងបរិមាណជាង ៣៥ម៉ឺនតោន មានកំណើនជាង ១៣% បើធៀបនឹងរយៈពេលដូចគ្នាក្នុងឆ្នាំ២០២១។ ក្នុងនោះ ប្រទេសចិន នៅតែជាទីផ្សារធំជាងគេ ក្នុងការនាំចេញអង្កររបស់កម្ពុជា ដែលមានចំនួន ១៧ ម៉ឺនតោន មានការកើនឡើង ១០% បើប្រៀបនឹងរយៈពេលដូចគ្នានៅឆ្នាំ២០២១។ ជាមួយគ្នានោះ កម្ពុជាបាននាំចេញអង្ករទៅកាន់សហភាពអឺរ៉ុប មានចំនួនជាង១១ម៉ឺនតោន មានកំណើន ៤៧% និងនាំចេញទៅតំបន់អាស៊ាន មានចំនួនជិត៣ម៉ឺនតោន មានការកើនឡើង ២% ហើយកម្ពុជា ក៏បាននាំចេញអង្ករទៅទិសដៅទ្វីបដទៃទៀត មានបរិមាណសរុបជាង ៣ម៉ឺន៦ពាន់តោន មានការថយចុះចំនួន ២៤% ផងដែរ។
អត្ថបទគួរអាន
ស្របពេលដែលការនាំចេញអង្ករកម្ពុជាកើនឡើង ការនាំចេញស្រូវរបស់កម្ពុជា នៅរយៈពេល៧ខែឆ្នាំ២០២២ ទៅកាន់ប្រទេសវៀតណាមឯណោះវិញ គឺមានការថយចុះដែរ ពោលគឺកម្ពុជាបាននាំចេញស្រូវទៅកាន់ប្រទេសវៀតណាមមានចំនួនជិត២លានតោន ក្នុងនោះ ការនាំចេញមានវិញ្ញាបនបត្រភូតគាមអនាម័យមានចំនួនជាង ១លាន៣សែនតោន មានការថយចំនួន ២,៧៥% បើធៀបនឹងរយៈពេលដូចគ្នានៅឆ្នាំ២០២១ ។
គួរបញ្ជាក់ថា ក្នុងរយៈពេល៧ខែឆ្នាំ២០២២នេះ កម្ពុជាបាននាំចេញកសិផលទៅក្រៅប្រទេស មានបរិមាណសរុបជាង ៥លាន៥សែន៨ម៉ឺនតោន ទៅកាន់ទិសដៅ ៦៧ប្រទេស គឺមានការកើនឡើងចំនួន ៥៥ម៉ឺនតោន ស្មើនឹង ១១% បើធៀបនឹងរយៈពេលដូចគ្នាក្នុងឆ្នាំ២០២១ ដែលទទួលបានត្រឹមតែជាង ៥លានតោន៕
