ការនាំចេញរ៉ែមាសកម្ពុជាផ្ដល់ចំណូលចូលរដ្ឋជាង៦៦ម៉ឺនដុល្លារ ក្រោយដំណើរការបាន៤ខែ

ក្រោយបានដំណើរការបាន៤ខែ ក្រុមហ៊ុនរបស់អូស្ត្រាលី រ៉ឺនេសង់ មីនើរ៉ល (ខេមបូឌា) លីមីតធីត ចម្រាញ់រ៉ែមាសពីតំបន់អូខ្វាវ ស្រុកកែវសីមា ខេត្តមណ្ឌលគិរី បានជាង ៧៤៧ គីឡូក្រាម និងបាននាំចេញចំនួន ៥៥៥គីឡូក្រាមហើយ ដើម្បីយកទៅបន្សុទ្ធជាមាសទឹក ៩៩,៩៩% នៅប្រទេសអូស្ត្រាលី។ តាមរយៈការនាំចេញរ៉ែមាសនេះជាង៥៥៥គីឡូក្រាមនេះ ក៏បានផ្ដល់នូវប្រាក់ចំណូលចូលរដ្ឋប្រមាណ ៦៦ម៉ឺនដុល្លារអាមេរិកផងដែរ។ នេះបើយោងតាមការអះអាងរបស់ថ្នាក់ដឹកនាំអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល។

មាសដែលកម្ពុជាចម្រាញ់ពីខេត្តមណ្ឌលគិរី រូបភាព៖ ក្រសួងរ៉ែ និងថាមពល

ឯកឧត្តម អ៊ឹង ឌីបូឡា អគ្គនាយកនៃអគ្គនាយកដ្ឋានធនធានរ៉ែ បានប្រាប់សារព័ត៌មានខេមបូណូមីស នៅថ្ងៃទី២១ ខែតុលា ថាក្រោយដំណើរការអស់រយៈពេលប្រមាណ ៤ខែកន្លងមកនេះ រោងចក្រចម្រាញ់រ៉ែមាសលក្ខណៈឧស្សាហកម្មរបស់ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត មានដំណើរការដោយរលូន គ្រាន់តែអំឡុងវិបត្តិកូវីដ-១៩ អាជីវកម្មនេះ បានជួបបញ្ហាខ្វះកម្លាំងពលកម្មជំនាញ មួយចំនួន។ បើទោះជាបែបនេះក្ដី អគ្គនាយកដ្ឋានរូបនេះ បានបញ្ជាក់ថា មិនបានបង្កជាបញ្ហារាំងស្ទះអ្វីឡើយ ក្នុងដំណើរការក្នុងឧស្សាហកម្មនេះ។

បើតាម ឯកឧត្តម អ៊ឹង ឌីបូឡា គិតត្រឹមថ្ងៃទី១៨ ខែតុលា ឆ្នាំ២០២១ ក្រុមហ៊ុនរបស់អូស្ត្រាលីមួយនេះ បានបង់ចំណូលចូលរដ្ឋប្រមាណ ៦៦ម៉ឺនដុល្លារ និងនាំចេញដុំមាសបានចំនួន ១២ជើង ដើម្បីយកទៅបន្សុទ្ធជាមាសទឹក៩៩,៩៩% នៅប្រទេសអូស្ត្រាលី។ សម្រាប់ការនាំចេញទាំង១២ជើងនេះ សម្រេចបាន៤៨ដុំមាស និងមានទម្ងន់ប្រមាណ៥៥៥គីឡូក្រាម។

អគ្គនាយកនៃអគ្គនាយកដ្ឋានធនធានរ៉ែ ឯកឧត្តម អ៊ឹង ឌីបូឡា បានបញ្ជាក់បន្ថែមថា តាមផែនការដែលបានគ្រោងទុក ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត មានផែនការចម្រាញ់រ៉ែមាស ប្រមាណ ៣ពាន់គីឡូក្រាម ឬស្មើនឹង៣តោនក្នុងឆ្នាំដំបូង ខណៈត្រឹមរយៈពេលប្រមាណ ៤ខែនេះ ក្រុមហ៊ុនអាចចម្រាញ់រ៉ែមាសជាង ៧រយគីឡូក្រាម៕