ប៉ុន្តែ នៅក្រោមផែនការថ្មីនេះ មន្ទីរពេទ្យត្រូវអនុវត្តនូវលក្ខណវិនិច្ឆ័យមួយនៅក្នុងការអនុញ្ញាតឲ្យអ្នកជំងឺស្រាលចេញពីមន្ទីរពេទ្យទៅព្យាបាលនៅផ្ទះ ដោយក្នុងនោះ ក៏តម្រូវឲ្យអ្នកជំងឺត្រូវធ្វើចត្តាឡីស័យខ្លួនឯងនៅផ្ទះ ឲ្យបានពេញមួយខែ ផងដែរ ។
ផែនការថ្មីនេះជាការឆ្លើយតបទៅនឹងចំនួនអ្នកឆ្លងកូវីដ១៩ ក្នុងប្រទេសថៃកំពុងកើនឡើងខ្លាំងជាបន្តបន្ទាប់ បណ្តាលឲ្យខ្វះខាតគ្រែអ្នកជំងឺជាច្រើនកន្លែង ដែលបញ្ហានេះ បានបង្កឲ្យមានការព្រួយបារម្ភពីពលរដ្ឋក៏ដូចជាអ្នកដែលបានតេស្តឃើញវិជ្ជមានកូវីដរួចហើយ ប៉ុន្តែមិនទាន់ទទួលបានការព្យាបាលនៅឡើយ។
ឆ្លើយតបនឹងការព្រួយបារម្ភនេះ អាជ្ញាធរសុខាភិបាលថៃបាននិយាយថា ពួកគេមានគ្រែគ្រប់គ្រាន់សម្រាប់អ្នកជំងឺកូវីដ-១៩ ប៉ុន្តែ មិនមែនគ្រែទាំងអស់សុទ្ធតែអាចបំពាក់មកជាមួយនូវឧបករណ៍និងគ្រឿងបរិក្ខារទំនើបបានទាំងអស់នោះទេ។ បន្ថែមពីលើនេះ ការិយាល័យសន្តិសុខសុខភាពជាតិរបស់ថៃបានឲ្យដឹងថា បច្ចុប្បន្នក្នុងបញ្ជីឈ្មោះអ្នកឆ្លងកូវីដរង់ចាំចំនួន ៧០០នាក់ទៀត មិនទាន់បានទទួលការព្យាបាលនៅឡើយ ។
អត្ថបទទាក់ទង
ពេទ្យឯកជនរារែកមិនទទួលអ្នកជំងឺកូវីដ-១៩
ចំណែកប្រធានសមាគមមន្ទីរពេទ្យឯកជនរបស់ថៃបានអះអាងថា ការខ្វះខាតគ្រែមិនមានសភាពធ្ងន់ធ្ងរណាស់ណានោះទេ ។
លោកអះអាងថា បញ្ហានេះមើលទៅហាក់មានសភាពធ្ងន់ធ្ងរ គឺដោយសារមន្ទីរពេទ្យឯកជន មិនបានរៀបចំការបែងចែកគ្រែឱ្យបានត្រឹមត្រូវ។ មន្ទីរពេទ្យឯកជនជាច្រើនមិនសូវចង់ទទួលអ្នកជំងឺកូវីដ-១៩នោះទេ បើទោះបីជា រដ្ឋជាអ្នករ៉ាប់រងថ្លៃចំណាយយ៉ាងណាក្តី ។
មិនខុសពីកម្ពុជានោះទេ ប្រទេសថៃក្បែរខាងមួយនេះ កំពុងពិចារណាអនុវត្តផែនការដាក់ឲ្យអ្នកជំងឺព្យាបាលនៅតាមផ្ទះ ជាពិសេសសម្រាប់អ្នកដែលរស់នៅម្នាក់ឯង នៅពេលដែលមន្ទីរពេទ្យពុំមានកន្លែង ឬគ្រែសម្រាប់ទទួលអ្នកជំងឺតទៅទៀត ។
សូមជម្រាបថា គិតត្រឹមថ្ងៃច័ន្ទដើមសប្តាហ៍នេះ ថៃរកឃើញអ្នកឆ្លងកូវីដ១៩សរុបកើនដល់ជិត ៤ម៉ឺន៤ពាន់នាក់ហើយ គ្រាដែលអ្នកស្លាប់បាត់បង់ជីវិតមានជាង ១០០នាក់ ។
ផែនការចាក់វ៉ាក់សាំងឥតប្រែប្រួល
ទោះបីជារងការវាយប្រហារពីរ រលកឆ្លងថ្មីនៃកូវីដ១៩យ៉ាងណាក្តី រដ្ឋាភិបាលថៃបានប្រកាសថ្មីៗនេះថា ផែនការចាក់វ៉ាក់សាំងទ្រង់ទ្រាយធំរបស់ខ្លួននឹងមិនមានការប្រែប្រួលឡើយ ដោយថៃនឹងចាប់ផ្តើមចាក់វ៉ាក់សាំង AstraZeneca ចំនួន៦លានដូស ដល់ពលរដ្ឋខ្លួនចាប់ពីខែមិថុនាខាងមុខនេះតទៅ ។
ចំណែកវ៉ាក់សាំង AstraZeneca ១០លានដូសបន្ថែមទៀតនឹងដឹកមកដល់ប្រទេសថៃជាបន្តបន្ទាប់ ក្រោយពី ៦លានដូសដំបូងប្រើប្រាស់រួចរាល់ ។
ជុំវិញបញ្ហាវ៉ាក់សាំងនេះដែរ ក្រសួងសុខាភិបាលថៃ កាលពីថ្ងៃអាទិត្យសប្តាហ៍មុន បានចេញមកអះអាង និងការពារវ៉ាក់សាំងដែលផលិតដោយប្រទេសចិន Sinovac ក្រោយមានការជជែកដេញដោលគ្នាជាច្រើនក្នុងបណ្តាញសង្គមនៅប្រទេសថៃស្តីពីប្រសិទ្ធភាពការពាររបស់វ៉ាក់សាំងចិនប្រភេទនេះ ។
ក្រសួងសុខាភិបាលថៃបានអះអាងថា ប្រសិទ្ធភាពរបស់វ៉ាក់សាំង ក៏អាស្រ័យទៅលើប្រព័ន្ធភាពស៊ាំរបស់មនុស្សម្នាក់ៗផងដែរ។
ប្រសិនបើគេមានប្រព័ន្ធភាពស៊ាំខ្លាំង នោះវ៉ាក់សាំងដែលចាក់បញ្ចូលទៅនឹងផ្តល់ការការពារខ្លាំងដូចគ្នា។ យ៉ាងណាមិញ ប្រសិទ្ធភាពរបស់វ៉ាក់សាំងក៏អាស្រ័យលើប្រភេទវីរុសបំប្លែងខ្លួនថ្មីផងដែរ ៕
