នៅក្នុងរយៈពេល ១១ខែដំបូង ឆ្នាំ២០២១ ការនាំចេញស្វាយចន្ទីទៅកាន់ទីផ្សារក្រៅប្រទេសសម្រេចបានក្នុងបរិមាណជាង៩២ម៉ឺនតោន ដែលបានកើនឡើងដល់ទៅជាង ៣០០%ឯណោះ បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ទឹកប្រាក់ដែលបានមកពីការនាំចេញគ្រាប់ស្វាយចន្ទីនៅ១១ខែដំបូងឆ្នាំនេះ មានដល់ទៅជាង១ពាន់៨រយលានដុល្លារអាមេរិក ពោលគឺច្រើនលើសការនាំចេញស្រូវអង្ករដល់ទៅជាង៦០០លានដុល្លារ ខណៈការនាំចេញស្រូវអង្ករសម្រេចបានទឹកប្រាក់សរុបជាង១ពាន់២០០លានដុល្លារ។នេះបើតាម របាយការណ៍ដែលបង្ហាញដោយសមាគមស្វាយចន្ទីកម្ពុជាបា។
ទន្ទឹមនឹងមានកំណើននៃការនាំចេញស្វាយចន្ទីមានការកើនឡើងជាកំហុកបែបនេះត្រូវបាន លោក ស៊ុយ កុកធាន ដែលជាអនុប្រធានសមាគម និងជាអ្នកនាំពាក្យនៃសមាគមស្វាយចន្ទីបានរៀបរាប់ប្រាប់ក្រុមការងារខេមបូណូមីសថា៖ ការកើនឡើងទាំងនេះគឺដោយសារតែនៅពេលនេះការនាំចេញស្វាយចន្ទីកម្ពុជា នៅតែមានតម្រូវការខ្លាំងពី បណ្ដាប្រទេសផ្សេងៗជាពិសេស ក្រៅពីទីផ្សារប្រទេសវៀតណាម និងចិន ហើយថ្មីៗនេះទៀតសោត ប្រទេសឥណ្ឌាក៏កំពុងតែមានតម្រូវការខ្លាំងណាស់ដែរ។ កត្តាទាំងនេះ បានធ្វើឲ្យមានសន្ទុះការនាំចេញចន្ទីខ្លាំងយ៉ាងនេះនៅឆ្នាំ២០២១នេះ។
អត្ថបទគួរអាន
យ៉ាងណាមិញ ជុំវិញកំណើននៃការនាំចេញស្វាយចន្ទីបានវ៉ាដាច់ការនាំចេញស្រូវអង្ករនេះដែរ អនុប្រធានសមាគមស្វាយចន្ទីរូបនេះ បញ្ជាក់ថា កន្លងមកការនាំចេញចន្ទីភាគច្រើននាំចេញទៅកាន់ប្រទេសជិតខាង ក្បែរកម្ពុជាតែប៉ុណ្ណោះ និងមួយវិញទៀតដោយសារតែបញ្ហាបច្ចេកទេស ផងដែរ ប៉ុន្ដែ នៅមួយរយៈចុងក្រោយនេះ កម្ពុជាមានការពង្រីកការនាំចេញទៅកាន់ប្រទេសជាច្រើនផ្សេងទៀតជាបណ្ដើរៗដូចជាប្រទេសជប៉ុនជាដើម បើទោះបីជាបច្ចុប្បន្នការនាំចេញនៅមានក្នុងបរិមាណតិចក៏ដោយ។
អ្នកនាំពាក្យសមាគមន៍ស្វាយចន្ទីកម្ពុជា បានរំពឹងទុកថា ស្វាយចន្ទីនឹងក្លាយជាដំណាំកសិកម្ម នាំចេញលេខ១ នៅក្នុងប្រទេសកម្ពុជានៅពេលខាងមុខនេះ ហើយក៏អាចនឹងនឹងក្លាយជាប្រទេសលំដាប់ទី១ក្នុងការនាំចេញស្វាយចន្ទីបានច្រើនជាងទៅកាន់ទីផ្សារពិភពលោកផងដែរ ដោយសារតែនៅរយៈ៥ ទៅ៦ឆ្នាំចុងក្រោយនេះ អាត្រានៃការដាំដុះស្វាយចន្ទីនៅតាមបណ្ដាប្រទេសផ្សេងៗមានការថយចុះ ខណៈបច្ចុប្បន្ន នៅកម្ពុជាកំពុងតែមានកំណើននៃការដាំដុះស្វាយចន្ទីកាន់តែច្រើនឡើង ដើម្បីជាការបំពេញតម្រូវការទីផ្សារក្រៅប្រទេស ដែលកំពុងកើនឡើង៕
អត្ថបទ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
