កងទ័ពជើងទឹករបស់សហរដ្ឋអាមេរិក បានបញ្ជាក់ប្រាប់ទីភ្នាក់ងាររ៉យទ័រថា នាវាដែលបានធ្វើប្រតិបត្តិការនោះគឺ នាវាចម្បាំងបំពាក់មីស៊ីល ឆេនស្លេវ៉ល (Chancellorsville) និងនាវចម្បាំង អេនធីទិម (Antietam)ផងដែរ។ ប្រតិបត្តិការនាវាចរណ៍នេះត្រូវបានចំណាយពេលពី ៨ ទៅ ១២ ម៉ោង ហើយត្រូវបញ្ចប់ទៅវិញ ជាមួយនឹងក្រសែភ្នែកតាមដាត្រួតពិនិត្យយ៉ាងដិតដល់ពីសំណាក់យោធាចិន។
មែនទែនទៅ ក្នុងរយៈពេលប៉ុន្មានឆ្នាំចុងក្រោយនេះ នាវាចម្បាំងរបស់សហរដ្ឋអាមេរិក រួមទាំងសម្ព័ន្ធមិត្តដូចជា អង់គ្លេស និងកាណាដា បានធ្វើដណើរតាមច្រកសមុទ្រតៃវ៉ាន់ជាប្រចាំ ហើយក៏បានធ្វើឲ្យប្រទេសចិនមានការខឹងសម្បារមិនតិចដែរ ព្រោះទីក្រុងប៉េកាំងតែងចាត់ទុកច្រកសមុទ្រនេះ ព្រមទាំងដែនកោះតៃវ៉ាន់ផងនោះ ជាទឹកដីរបស់ខ្លួនរហូតមក។
អត្ថបទគួរអាន
ជាមួយគ្នានេះ កងទ័ពជើងទឹកអាមេរិកបានគូសបញ្ជាក់ថា «នាវារបស់ខ្លួនទាំងពីរគ្រឿងនេះ បានធ្វើនាវាចរណ៍ឆ្លងកាត់ច្រករបៀង នៅក្នុងច្រកសមុទ្រតៃវ៉ាន់ ដែលហួសពីដែនទឹកសមុទ្ររបស់ប្រទេសចិន និងតៃវ៉ាន់»។
កងទ័ពជើងទឹកអាមេរិកបានបញ្ជាក់ថា «ប្រតិបត្តិការនេះគឺចង់បង្ហាញពីការប្តេជ្ញាចិត្តរបស់សហរដ្ឋអាមេរិក ចំពោះតំបន់ឥណ្ឌូប៉ាស៊ីហ្វិក សេរី និងបើកចំហរ ហើយខ្លួនមានសិទ្ធិក្នុងការហោះហើរ និងធ្វើនាវាចរណ៍គ្រប់ទីកន្លែង ដែលស្របតាមច្បាប់អន្តរជាតិតែប៉ុណ្ណោះ»។
មួយវិញទៀត លោក John Kirby អ្នកនាំពាក្យក្រុមប្រឹក្សាសន្តិសុខជាតិរបស់សហរដ្ឋអាមេរិក បានលើកឡើងនៅលើទូរទស្សន៍ CNN ថា៖ «ការឆ្លងកាត់របស់នាវាអាមេរិកនេះគឺ ស៊ីសង្វាក់គ្នាជាមួយនឹងគោលនយោបាយចិនតែមួយ និងសមស្របទៅនឹងខ្លឹមសារនៃតំបន់ឥណ្ឌូប៉ាស៊ីហ្វិក សេរី និងបើកចំហរ»។
តែយ៉ាងណា យោធាចិនបានធ្វើការឆ្លើយតបកាលពីថ្ងៃទី ២៨ សីហាដែរថា «ខ្លួនបាននឹងកំពុងឃ្លាំមើលនាវារបស់កងទ័ពជើងទឹកអាមេរិនេះ ដោយប្រុងប្រយ័ត្នមែនទែន និងត្រៀមខ្លួនរួចជាស្រេចក្នុងការកម្ទេចការបង្កហេតុណាមួយ»។
ក្រសួងការពារជាតិតៃវ៉ាន់អះអាងថា កប៉ាល់ទាំងនោះបានធ្វើដំណើរក្នុងទិសដៅពីត្បូងទៅជើង ហើយកងទ័ពជើងទឹកតៃវ៉ាន់ក៏បានឃ្លាំមើលផងដែរ តែមិនមានអ្វីខុសប្រក្រតីឡើយ៕
