ក្នុងកិច្ចប្រជុំតាមប្រព័ន្ធអនឡាញជាមួយអាស៊ានកាលពីថ្ងៃអង្គារ ភាគីចិនដែលចូលរួមដោយនាយករដ្ឋមន្ត្រីចិន គឺលោកលី ឃឺឈាំង (Li Keqiang) បានអំពាវនាវឲ្យអាស៊ាន និងប្រទេសចិន «ធ្វើសមាហរណកម្មសេដ្ឋកិច្ចឲ្យកាន់តែស៊ីជម្រៅ» និងធ្វើយ៉ាងណា ឱ្យកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ឬហៅកាត់ថា RCEP ចូលជាធរមានឱ្យបានឆាប់តាមដែលអាចធ្វើទៅបាន។ នាយរដ្ឋមន្ត្រីចិនបានបន្តស្នើឱ្យមានកិច្ចសហប្រតិបត្តិការលើវិស័យនានាកាន់តែច្រើនថែមទៀត រួមមានការប្រែប្រួលអាកាសធាតុ វិទ្យាសាស្ត្របច្ចេកវិទ្យា និងការច្នៃប្រឌិតជាដើម។
នាយករដ្ឋមន្ត្រីចិន គឺលោកលី ឃឺឈាំង បានប្រើពាក្យថា «ធ្វើសមាហរណកម្មសេដ្ឋកិច្ចឲ្យកាន់តែស៊ីជម្រៅ» បែបនេះ ទំនងជាចង់គូសបញ្ជាក់អំពីគោលបំណងដើម្បីកៀរគរសម្លេងគាំទ្រ ដល់សំណើសមាជិកភាពរបស់ខ្លួនក្នុងកិច្ចព្រមព្រៀង CP TPP ពីសមាជិកចំនួន៤របស់អាស៊ាន ដែលជាសមាជិករបស់កិច្ចព្រមព្រៀងនេះស្រាប់។ សមាជិកអាស៊ានចំនួន៤ ដែលស្ថិតក្នុងកិច្ចព្រមព្រៀង CPTPP នោះរួមមាន ប្រទេសប្រ៊ុយណេ សិង្ហបុរី វៀតណាម និងម៉ាឡេស៊ី។
អត្ថបទទាក់ទង
ប៉ុន្តែបញ្ហាស្ថិតនៅត្រង់ថា ក្នុងចំណោមអ្នកទាំង៤ អាចមានអ្នកដែលជំទាស់នឹងសំណើរបស់ចិន ក្នុងកិច្ចព្រមព្រៀង CPTPP ហើយក្នុងចំណោមនោះ វៀតណាមត្រូវបានគេមើលឃើញថា ជាបញ្ហាប្រឈមជាងគេសម្រាប់ចិន ដោយសារតែប្រទេសទាំងពីរ មានបញ្ហារកាំរកូសនឹងគ្នាលើទាមទារដែនទឹកនៅសមុទ្រចិនខាងត្បូង។
នៅក្នុងកិច្ចប្រជុំ ភាគីចិនមិនបានយកបញ្ហាតានតឹងនៅសមុទ្រចិនខាងត្បូងមកពិភាក្សានោះទេ តែផ្ទុយទៅវិញ លោកលី ឃឺឈាំង បាននិយាយថា សន្តិភាពនៅសមុទ្រចិនខាងត្បូងបានបម្រើផលប្រយោជន៍រួមរបស់ប្រទេសចិន និងបណ្តាប្រទេសនៅអាស៊ាន ហើយភាគីទាំងពីរគួរតែពង្រីកកិច្ចសហប្រតិបត្តិការដែនសមុទ្រឲ្យកាន់តែស៊ីជម្រៅ។
សូមជម្រាបថា ចាប់តាំងពីការស្នើសុំចូលរួមរបស់ចិនជាមួយ CP TPP កាលពីខែកញ្ញារួចមក ថ្នាក់ដឹកនាំក្រុងប៉េកាំងបានខ្នះខ្នែងស្វែងរកការគាំទ្រពីគ្រប់ប្រទេសសមាជិកផង និងព្យាយាមស្វែងកែតម្រូវច្បាប់ពាណិជ្ជកម្មរបស់ខ្លួនឲ្យត្រូវនឹងស្តង់ដារផង ក្នុងគោលបំណងចូលជាសមាជិកផ្លូវការរបស់កិច្ចព្រមព្រៀងដ៏ធំមួយនេះនៅពេលខាងមុខ។
ថ្មីៗនេះដែរ ប្រទេសជប៉ុន ក៏បានអំពាវនាវឲ្យអាមេរិក ដែលជាអ្នកធ្លាប់ផ្ដួចផ្ដើមនូវកិច្ចព្រមព្រៀង CPTPP ហើយក៏បានដកខ្លួនចេញទៅវិញនោះ គួរតែពិចារណាត្រឡប់ចូលក្នុងកិច្ចព្រមព្រៀងនេះឡើងវិញ។ ប្រសិនបើ អាមេរិកពិតជាមានបំណងចង់ចូលកិច្ចព្រមព្រៀងនេះវិញមែននោះ វាអាចនឹងមានការប្រទាំងប្រទើសគ្នាកាន់តែខ្លាំងឡើង ខណៈដែលបច្ចុប្បន្ន ចិន និងកោះតៃវ៉ាន់ក៏កំពុងប្រជែងគ្នាលើការចូលរួមជាសមាជិកកិច្ចព្រមព្រៀងនេះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
