ជុំវិញទៅនឹងបញ្ហានេះត្រូវបាន ក្រសួងពាណិជ្ជកម្មនចិន ធ្វើការច្រានចោលដោយអះអាងថា ចំនួនក្រុមហ៊ុនដែលផ្លាស់ប្តូរទីតាំងទៅក្រៅប្រទេសនោះ គឺមានចំនួនតិចតួចណាស់ ដែលពុំគួរមានការនិយាយបំផ្លើស នោះទេ។ នេះបើយោងតាមការចេញផ្សាយរបស់សារព័ត៌មាន Reuters។
ប្រធាននាយកដ្ឋាននៅក្នុងក្រសួងពាណិជ្ជកម្មចិន លោក ជូ ស៊ីជា បានប្រាប់អ្នកសារព័ត៌មានថា មានក្រុមហ៊ុនមួយចំនួនតូចប៉ុណ្ណោះ កំពុងតែផ្លាស់ប្តូរចង្វាក់ផ្គត់ផ្គង់របស់ពួកគេ ចេញពីប្រទេសចិន ហើយវាក៏ចំពេលគ្នា ជាមួយនឹងសង្គ្រាមពាណិជ្ជកម្មសកល ដែលកំពុងតែអូសបន្លាយផងដែរ។
អត្ថបទទាក់ទង
លោកបន្តថា យ៉ាងណាក៏ដោយ បញ្ហានេះ ពុំគួរត្រូវបានផ្សព្វផ្សាយបំផ្លើសពី ការពិត នោះទេ។ ប៉ុន្មានឆ្នាំចុងក្រោយនេះ ក្រុមហ៊ុនឧស្សាហកម្មរបស់ចិន បានប្តូរទីតាំងផលិតកម្មរបស់ពួកគេទៅកាន់ ក្រៅប្រទេសរួចទៅហើយ តួយ៉ាងដូចជា កម្ពុជា និង វៀតណាម ក៏ដោយសារតែ ថ្លៃចំណាយផលិតកម្ម នៅក្នុងប្រទេសចិន គឺកើនឡើងខ្ពស់។
ដូច្នេះ សង្គ្រាមពាណិជ្ជកម្មសកល ក៏បានរុញច្រានក្រុមហ៊ុនមួយចំនួនតូច ឲ្យដើរតាម លំនាំ នេះ ជាពិសេសក្រុមហ៊ុនផលិតបច្ចេកវិទ្យាលំដាប់ទាប និងផលិតផលតម្លៃថោក។
លោក ជូ ស៊ីជា ក៏បានបញ្ជាក់ដែរថា ដើមឡើយ ក្រុមហ៊ុនចិនមួយចំនួន មានការព្រួយបារម្ភខ្លាំងពី ការរីករាលដាលនៃសង្គ្រាមពាណិជ្ជកម្មដែលបានចាប់ផ្តើម ក៏ប៉ុន្តែឥឡូវនេះ ពួកគេបានរកឃើញមធ្យោបាយ ដើម្បីកាត់បន្ថយចំណាយ និងកាត់បន្ថយផលប៉ះពាល់ហើយ។
គួរបញ្ជាក់ដែរថា ក្រោយការជួបពិភាក្សាគ្នាជាថ្មី រវាងមេដឹកនាំនៃប្រទេសអាមេរិក និងចិន នាឱកាសកិច្ចប្រជុំ G20 សង្គ្រាមពាណិជ្ជកម្មសកល ហាក់បីដូចជា ថយកម្តៅបន្តិច ដោយភាគីទាំងពីរ យល់ព្រមបើក ការចរចាពាណិជ្ជកម្មជាមួយគ្នាឡើងវិញ ហើយលោក ដូណាល់ ត្រាំ ក៏មិនបានដំឡើងពន្ធលើ ទំនិញនាំចូលពី ចិន ដូចជាការគំរាមពីមុននោះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
