សភាអឺរ៉ុបបានអនុម័តដំណោះស្រាយដាច់ដោយលែកមួយកាលពីថ្ងៃទី៩មិថុនា ដោយបានថ្កោលទោសទីក្រុងប៉េកាំងចំៗ ចំពោះការគាបសង្កត់ជាប្រព័ន្ធទៅសហគមន៍ជនជាតិមូស្លីម Uyghur នៅក្នុងប្រទេសចិន រួមទាំងការជម្លៀសជាទ្រង់ទ្រាយធំ ការបំបែកចេញពីគ្រួសារ ការរឹតបន្តឹងសាសនា និងការប្រើប្រាស់ការឃ្លាំមើលយ៉ាងតឹងរ៉ឹងជាដើម។ ការណ៍នេះបណ្តាលឲ្យ EU បានអំពាវនាវឱ្យមានការហាមឃាត់ការនាំចូលទំនិញនានា ដែលផលិតនៅក្នុងតំបន់ស៊ីនជាំងនេះផងដែរ។ នេះបើតាមការចុះផ្សាយដោយសារព័ត៌មានធំៗ។
លោកស្រី ហ៊ីដី ហ៊ូតាឡា (Heidi Hautala) អនុប្រធានសភាអ៊ឺរ៉ុបបាននិយាយនៅក្នុងសេចក្តីថ្លែងការណ៍មួយថា "សភាអឺរ៉ុបកំពុងផ្តល់សញ្ញាថា ខ្លួនលែងបង្ហាញជំហរទន់ជ្រាយជាមួយរបបផ្តាច់ការចិនទៀតហើយ ដ្បិតថាអឺរ៉ុបមើលឃើញថា ចិនបាននិងកំពុងនឹងបន្តអំពើឧក្រិដ្ឋកម្មប្រឆាំងមនុស្សជាតិនៅក្នុងខេត្ត Xinjiang អស់រយៈពេលប្រាំឆ្នាំមកនេះ" ។
ដំណោះស្រាយចេញដោយសភាអឺរ៉ុបនេះ នឹងជំរុញឱ្យរដ្ឋអំណាច និងរដ្ឋជាសមាជិករបស់ EU អនុម័តទណ្ឌកម្មបន្ថែម ដែលផ្តោតលើមន្ត្រីជាន់ខ្ពស់ចិនមួយចំនួន ក៏ដូចជាអ្នកផ្សេងទៀតដែលត្រូវបានកំណត់អត្តសញ្ញាណក្នុងការជាប់ពាក់ព័ន្ធនឹងតំបន់ Xinjiang នេះ។ ហើយសភាអឺរ៉ុបក៏អំពាវនាវឱ្យគណៈកម្មការអឺរ៉ុបដាក់ចេញការហាមឃាត់ការនាំចូលលើទំនិញទាំងឡាយណា ដែលផលិតដោយប្រើប្រាស់កម្លាំងពលកម្មដោយបង្ខំ ដោយក្រុមហ៊ុនចិន ថែមទាំងចុះឈ្មោះក្រុមហ៊ុនចិនទាំងនោះក្នុងបញ្ជីខ្មៅរបស់សភាអឺរ៉ុបផងដែរ។
អត្ថបទគួរអាន
លើសពីនេះទៅទៀត អគ្គស្នងការអឺរ៉ុបលោក វ៉ាលដីស ដំប្រូស្គីស (Valdis Dombrovskis) បានប្រាប់សមាជិកសភាអ៊ឺរ៉ុបកាលពីថ្ងៃពុធថា "បើតាមការលេចធ្លាយសុន្ទរកថា រូបភាព ឯកសារ និងសៀវភៅបញ្ជីបង្ហាញយ៉ាងច្បាស់អំពីវិធីសាស្រ្តដ៏ឃោរឃៅដែលរដ្ឋាភិបាលចិនបានប្រើប្រាស់ ដោយបានបំផ្លាញយ៉ាងធ្ងន់ធ្ងរនូវអត្តសញ្ញាណវប្បធម៌ និងសាសនារបស់ជនជាតិUyghur នៅក្នុងតំបន់នោះ។ តែអាជ្ញាធរចិនបានក្លែងបន្លំអំពើទាំងនោះ ថាជាការប្រយុទ្ធប្រឆាំងនឹងអំពើភេរវកម្មទៅវិញ។ នេះបើតាមការថ្លែងឡើង ដោយអគ្គស្នងការអឺរ៉ុបលោក វ៉ាលដីស ដំប្រូស្គីស។
ទោះជាបែបណាក៏ដោយ ទីក្រុងប៉េកាំងបដិសេធយ៉ាងដាច់អហង្ការចំពោះការចោទប្រកាន់នេះ ដោយនិយាយថាសកម្មភាពរបស់លោកខាងលិចទាំងអស់នេះ ជាផ្នែកមួយនៃយុទ្ធនាការដើម្បីបង្អាក់ដំណើរនៃការរះឡើង របស់សេដ្ឋកិច្ចចិនតែប៉ុណ្ណោះ។ កាលពីថ្ងៃសុក្រ លោក យូ វេនហ្ស៍ (You Wenze) អ្នកនាំពាក្យគណៈកម្មាការកិច្ចការការបរទេសនៃសភាប្រជាជនចិនបាននិយាយថា សភានៃប្រទេសអាស៊ីមួយចំនួនក៏បានថ្កោលទោសចំពោះការអនុម័តដំណោះស្រាយរបស់សភាអឺរ៉ុបនេះដែរ។ លោកបានសង្កត់ធ្ងន់ថា បញ្ហា តំបន់ស៊ីនជាំង មិនមែនជាបញ្ហាសិទ្ធិមនុស្សទេ ប៉ុន្តែជាការប្រឆាំងនឹងអំពើភេរវកម្មតែប៉ុណ្ណោះ៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
