ទូរទស្សន៍រដ្ឋចិន CCTV បានរាយការណ៍ថា ក្រុមប្រឹក្សារដ្ឋបានអនុម័តយល់ព្រមឱ្យមានការបោះផ្សាយលក់បណ្ណបំណុលបន្ថែមជាង ៧៣ ពាន់លានដុល្លារនេះ នៅក្នុងកិច្ចប្រជុំមួយកាលកាលពីថ្ងៃទី ២៤សីហា ហើយការបោះផ្សាយមូលបត្របំណុលថ្មីភាគច្រើននឹងត្រូវបែងចែកទៅឱ្យទីក្រុងធំៗដូចជាទីក្រុងប៉េកាំង និងសៀងហៃក៏ដូចជាខេត្តនៅជាប់មាត់សមុទ្រដែលទទួលខុសត្រូវចំពោះមួយផ្នែកធំនៃសកម្មភាពសេដ្ឋកិច្ចរបស់ប្រទេសចិន។
សភារបស់ប្រជាជាតិចិនធ្លាប់បានកំណត់កូតាចំនួនជាង ជាង ៥៣០ពាន់លានដុល្លារ សម្រាប់ការចេញមូលបត្របំណុលហេដ្ឋារចនាសម្ព័ន្ធថ្មី សម្រាប់ឆ្នាំនេះ ហើយថវិកាស្ទើរតែទាំងអស់នោះត្រូវបានប្រើប្រាស់អស់រហូតដល់ចុងខែកក្កដាលើកលែងថវិកាប្រហែល ៣០ពាន់ដុល្លារតែប៉ុណ្ណោះ ដែលគេបានចាក់បញ្ចូលទៅក្នុងធនាគារខ្នាតតូច និងមធ្យម។
ការបញ្ចេញថវិកាតាមរយៈបណ្ណបំណុលភ្លាមៗនៅក្នុងឆមាសទី១នេះ បានធ្វើឡើងដើម្បីឆ្លើយតបទៅនឹងការធ្លាក់ចុះសេដ្ឋកិច្ចយ៉ាងខ្លាំងរបស់ប្រទេសចិន បណ្ដាលមកពីវិធានការបិទខ្ទប់រយៈពេលជាច្រើនខែនៅក្នុងទីក្រុងស៊ាងហៃ និងការរឹតបន្តឹងផ្សេងទៀតនៃជំងឺកូវីដ១៩ ដើម្បីទប់ស្កាត់ការឆ្លងរាលដាលជំងឺនេះនៅមុនពេលបក្សកុម្មុយនិស្តចិននឹងបើកសមាជនៅរដូវស្លឹកឈើជ្រុះខាងមុខនេះ ដែលតាមធម្មតាបក្សនេះតែងបើកសមាជរបស់ខ្លួន ២ ដងក្នុងរយៈពេល១០ឆ្នាំ។
ដោយសារតែមានមូលបត្របំណុល វាបានធ្វើឱ្យការវិនិយោគលើហេដ្ឋារចនាសម្ព័ន្ធកើនឡើង ៧,៤% ក្នុងឆមាសទី១ឆ្នាំនេះ ដែលជាការកើនឡើងដ៏ខ្លាំងបំផុតសម្រាប់រយៈពេលប្រាំឆ្នាំកន្លងមកនេះ។ ប៉ុន្តែតម្រូវការការងារ និងវិស័យឯកជនរបស់ចិននៅមិនទាន់ស្ទុះងើបឡើងវិញនៅឡើយទេ។ លោក ស៊ី ជីនពីងប្រធានាធិបតីចិន ក៏មានបំណងពង្រឹងសេដ្ឋកិច្ចដោយសម្លឹងមើលអាណត្តិទី៣របស់លោកក្នុងការដឹកនាំប្រទេសចិន ជាតំណែងមួយដែលលោកមានបំណងធានានៅចំពោះមុខសមាជបក្សក្នុងពេលខាងមុខនេះ។
អត្ថបទគួរអាន
អាជ្ញាធរចិនមិនត្រឹមតែផ្តល់មូលបត្របំណុលហេដ្ឋារចនាសម្ព័ន្ធថ្មីតែប៉ុណ្ណោះទេ ប៉ុន្តែថែមទាំងមានសមតុល្យបំណុលមិនទាន់សងរួចផងដែរ។ សមតុល្យបំណុលអតិបរមាដែលមានសម្រាប់ឆ្នាំ២០២២គឺមានដល់ជាង ៣ទ្រីលានដុល្លារ ហើយសមតុល្យជាក់ស្តែងមានជិត ៣ទ្រីលានដុល្លារ គិតត្រឹមចុងខែមិថុនាកន្លងទៅ។
ប្រសិនបើធ្វើការបូកបញ្ចូលរួមទាំងមូលបត្របំណុលដែលគ្រោងទុក ដើម្បីជួយដល់ធនាគារខ្នាតតូច និងមធ្យមដែរនោះ ចិននឹងត្រូវការបញ្ចេញមូលបត្របំណុលបន្ថែមប្រហែល ១៧៥ពាន់លានដុល្លារ ជាចំនួនមួយដែលសភាចិនអាចអនុញ្ញាតឱ្យចេញបាន។
សូមរំលឹកថា ប្រទេសចិនក៏បានបង្កើនការចេញមូលបត្របំណុលហេដ្ឋារចនាសម្ព័ន្ធប្រហែល ៧០% ផងដែរកាលពីឆ្នាំ២០២០ ជាឆ្នាំមួយដែលវីរុសកូរ៉ូណាបានឆ្លងរាលដាលជាលើកដំបូងដោយបានវាយប្រហារសេដ្ឋកិច្ចយ៉ាងខ្លាំងមកដល់ពេលនេះ។ ការវិនិយោគរបស់សហគ្រាសគ្រប់គ្រងដោយរដ្ឋ (SOEs) បានកើនឡើង ៥,៣% នៅឆ្នាំនោះ ខណៈដែលការវិនិយោគរបស់ក្រុមហ៊ុនឯកជនកើនឡើងតែ ១% ប៉ុណ្ណោះ៕
អត្ថបទ៖ សុខ ជា
