ចិនសន្យាថា នឹងនាំផលិតផលកសិកម្មកម្ពុជាទៅកាន់ទីផ្សារចិនឱ្យបានច្រើន ដើម្បីជួយកសិករខ្មែរ

នាឱកាសនោះ​សម្តេចតេជោ ហ៊ុន សែន បានលើកពីបញ្ហាកសិផលរបស់កសិករខ្មែរ ដែលបាននិងកំពុងកើតមាន នាពេលបច្ចុប្បន្ន ដល់ឯកឧត្តម វ៉ាង យី ពិសេសការនាំកសិផលកម្ពុជា ត្រង់ទៅកាន់ប្រទេសចិន ដូចជាផ្លែមៀនប៉ៃលិន ជាដើម។ ឆ្លើយតបនូវបញ្ហានេះ ដើម្បីចូលរួមដោះស្រាយបញ្ហារបស់កសិករខ្មែរ ដែលកំពុងជួបអំឡុងវិបត្តិកូវីដ-១៩ នាពេលបច្ចុប្បន្ន ឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេសចិន បានអះអាង ប្រាប់សម្តេចតេជោ ថា ចិននឹងនាំចូលផលិតផលកសិកម្មកម្ពុជា ទៅកាន់ទីផ្សារចិនឱ្យបានកើនតែច្រើន ដើម្បីប្រយោជន៍សម្រាប់កសិករខ្មែរ។

ទន្ទឹមនោះ សម្ដេច ហ៊ុន សែន បានសង្កត់ធ្ងន់​ពីលទ្ធផល​នៃកិច្ចប្រជុំ ជាមួយទីប្រឹក្សាចិន យ៉ាងដូច្នេះថា៖«ចិនក៏កំពុងបើកទូលាយទីផ្សារហើយ នៅពេលដែលកិច្ចព្រមព្រៀងពាណិជ្ជកម្មកម្ពុជា- ចិន ដែលនឹងចូលជាធរមាន នៅពេលខាងមុខ ដែលកម្ពុជា អាចប្រើប្រាស់ទីផ្សាររបស់ចិន និងទទួលបានផលប្រយោជន៍ពីទីផ្សាររបស់ចិន»។

ក្រៅពីសន្យាដោះស្រាយបញ្ហាកសិផលខ្មែរ រដ្ឋាភិបាលចិន បានសម្រេចផ្តល់ជំនួយវ៉ាក់សាំងប្រមាណ ៣លានដូស ថែមទៀត ដល់ប្រទេសកម្ពុជា សម្រាប់ចាក់ដូសទី៣ ជូនប្រជាពលរដ្ឋកម្ពុជា។  គិតមកដល់ពេលនេះ ប្រទេសកម្ពុជា បានទទួលបានវ៉ាក់សាំងបង្ការមេរោគកូវីដ-១៩ ពីរដ្ឋាភិបាលនៃសាធារណរដ្ឋប្រជាមានិតចិន ចំនួន ២៦,៨ លានដូស ហើយ។

សូមបញ្ជាក់ថា ទីប្រឹក្សារដ្ឋចិន និងជារដ្ឋមន្រ្តី​ការបរទេសចិន ឯកឧត្តម វ៉ាង យី បានមកបំពេញដំណើរទស្សនកិច្ច​នៅកម្ពុជា រយៈពេល ២ថ្ងៃ ចាប់ពីថ្ងៃទី១២ ដល់ថ្ងៃទី១៣ ខែកញ្ញា ឆ្នាំ២០២១។ ក្នុងដំណើរទស្សនកិច្ចផ្លូវការនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន បានអញ្ជើញជាអធិបតី ក្នុងពិធីចុះហត្ថលេខារវាងកម្ពុជា-ចិន លើឯកសារសំខាន់ៗ ចំនួន៦ ផងដែរ៕