ធនាគារកណ្តាលនៃប្រទេសនានានៅជុំវិញពិភពលោកបានខ្នះខ្នែងទិញមាសសុទ្ធយកមករក្សាទុក ស្របពេលមានការកើនឡើងនៃការប្រឈមផ្នែកភូមិសាស្ត្រនយោបាយនិងសេដ្ឋកិច្ច។ ក្នុងចំណោមនោះ ធនាគារកណ្តាលចិនបានទិញមាសក្នុងបរិមាណដ៏ច្រើនមកទុកកាលពីឆ្នាំមុន ដើម្បីធ្វើពិពិធកម្មទ្រព្យសកម្ម ក៏ដូចជាការការពារទុនបម្រុងពីផលប៉ះពាល់បង្កឡើងដោយការធ្លាក់ចុះនៃប្រាក់ដុល្លារ និងអតិផរណាខ្ពស់ដ៏អូសបន្លាយ។
ទិន្នន័យផ្លូវការបានបង្ហាញកាលពីថ្ងៃអាទិត្យថា នៅក្នុងខែមេសា ចិនបានបន្ថែមមាសសុទ្ធចំនួនជាង ៨ តោន ទៅក្នុងឃ្លាំងរបស់ខ្លួន ដោយធ្វើឲ្យបរិមាណមាសបម្រុងរបស់ចិនឡើងដល់ ២ ០៧៦ តោន បន្ទាប់ខំប្រមូលទិញមាសបាន ១២០ តោនក្នុងរយៈពេលប្រាំខែ ចាប់ពីខែវិច្ឆិកាដល់ខែមីនា។ តម្លៃសរុបនៃមាសបម្រុងរបស់ប្រទេសចិនបានកើនឡើងដល់ ១៣២,៣៥ ប៊ីលានដុល្លារនៅចុងខែមេសា បន្ទាប់ពីមានតម្លៃត្រឹម ១៣១,៦៥ ប៊ីលានដុល្លារ កាលពីខែមីនា។
នៅក្នុងត្រីមាសទីមួយនៃឆ្នាំ ២០២៣ បើទោះបីជាការទិញមាសសុទ្ធបញ្ចូលឃ្លាំងរដ្ឋមានដំណើរមិនសូវខ្លាំងក៏ដោយ ក៏បរិមាណមាសនៅតែស្ថិតក្នុងកម្រិតខ្ពស់ជាប្រវត្តិសាស្ត្រ។ នេះបើយោងតាមក្រុមប្រឹក្សាមាសពិភពលោក ដែលឱ្យដឹងថា ប្រទេសសិង្ហបុរី ប្រទេសចិន និងប្រទេសទួរគី គឺជាអ្នកទិញធំបំផុត។
អត្ថបទគួរអាន
ការប្រមូលមាសសុទ្ធយ៉ាងច្រើនបានជួយឱ្យតម្លៃមាសកើនឡើងជិតដល់កម្រិតខ្ពស់បំផុត ខណៈដែលទីផ្សារព្រួយបារម្ភអំពីការធ្លាក់ចុះនៃសេដ្ឋកិច្ចអាមេរិក និងមានសញ្ញាតានតឹងផ្នែកឥណទានជាប្រចាំ។ ហានិភ័យភូមិសាស្ត្រនយោបាយដែលកើតចេញពីទំនាក់ទំនងរកាំរកូសខ្លាំងរវាងចិននិងសហរដ្ឋអាមេរិក ក៏កំពុងជំរុញឱ្យមានតម្រូវការមាសដុំដែលជាទុនបម្រុងមានសុវត្ថិភាពផងដែរ។
ទន្ទឹមនឹងនេះ នៅក្នុងខែមេសា រូបិយប័ណ្ណបរទេសបម្រុងរបស់ចិនក៏បានកើនឡើងច្រើនជាងការរំពឹងទុកដែរ ដោយសារប្រាក់ដុល្លារបានធ្លាក់ចុះធៀបនឹងរូបិយប័ណ្ណសំខាន់ៗផ្សេងទៀត។ រូបិយប័ណ្ណបរទេសបម្រុងរបស់ចិន ដែលមានទំហំធំបំផុតនៅលើពិភពលោក បានកើនឡើង ២១ ប៊ីលានដុល្លារ ជាហេតុនាំឲ្យវាមានទំហំសរុបដល់ជាង ៣,២ ទ្រីលានដុល្លារកាលពីខែមុន។
អាជ្ញាធរចិនទទួលបន្ទុកការប្តូរប្រាក់បរទេសបាននិយាយនៅក្នុងសេចក្តីថ្លែងការណ៍មួយថា ការកើនឡើងនៃទុនបម្រុងជារូបិយប័ណ្ណបរទេសគឺជាលទ្ធផលនៃការធ្លាក់ថ្លៃប្រាក់ដុល្លារអាមេរិក និងការកើនឡើងនៃតម្លៃទ្រព្យហិរញ្ញវត្ថុសកល។ និយ័តករនេះបានបញ្ជាក់ថា ការងើបឡើងវិញនៃសេដ្ឋកិច្ចរបស់ប្រទេសចិននឹងជួយឱ្យរូបិយប័ណ្ណបរទេសបម្រុងរក្សាស្ថិរភាពយ៉ាងរឺងមាំ។
កាលពីខែមេសា តម្លៃប្រាក់យ័នបានធ្លាក់ចុះ ០,៦៣ ភាគរយ បើធៀបនឹងប្រាក់ដុល្លារ ខណៈដែលតម្លៃប្រាក់ដុល្លារបានធ្លាក់ចុះ ០,៩៤ ភាគរយធៀបតម្លៃរូបិយប័ណ្ណសំខាន់ៗផ្សេងទៀត៕
អត្ថបទ ៖ សរ សុជាតិ
