មន្ត្រីអាមេរិកទាំង៤រូបនេះ ដែលបម្រើការនៅគណៈកម្មាការសេរីភាពសាសនារបស់អាមេរិក នឹងត្រូវហាមឃាត់មិនឲ្យចូលទឹកដីរបស់ចិនឡើយ ដោយរួមទាំងទីក្រុងហុងកុង និងដែនកោះម៉ាកាវផងដែរ។ នេះបើយោងតាមការប្រកាសដោយអ្នកនាំពាក្យក្រសួងការបរទេសចិន លោក ចៅ លីចៀន នៅថ្ងៃអង្គារសប្ដាហ៍នេះ។
បន្ថែមពីលើនេះ ទ្រព្យសម្បត្តិទាំងអស់របស់អ្នកទាំង៤ ដែលមាននៅក្នុងទឹកដីចិន នឹងត្រូវបង្កក ខណៈដែលក្រុមហ៊ុន ស្ថាប័ននិងប្រជាជនចិន ទាំងអស់ត្រូវហាមប្រាមដាច់ខាតពីការមានទំនាក់ទំនងជាមួយបុគ្គលទាំង៤រូបខាងលើនេះ។
គណៈកម្មាការសេរីភាពសាសនា របស់អាមេរិកមិនទាន់មានប្រតិកម្មអ្វីឡើយទេ ជុំវិញបញ្ហានេះ។
អត្ថបទគួរអាន
គួររំឭកថា សហរដ្ឋអាមេរិក កាលពីថ្ងៃទី១០ខែធ្នូ ពោលគឺនៅចំថ្ងៃសិទ្ធិមនុស្សអន្តរជាតិ បានបន្ថែមទណ្ឌកម្មលើក្រុងប៉េកាំង ដោយដាក់ក្រុមហ៊ុនបច្ចេកវិទ្យារបស់ចិនចូលក្នុងបញ្ជីខ្មៅ ក្រោយសំអាងថាក្រុមហ៊ុនមានជាប់ពាក់ព័ន្ធជាមួយការរំលោភសិទ្ធិជនជាតិភាគតិចម៉ូស្លីម អ៊ុយហ្គ័រ នៅតំបន់ស៊ីនជាំងប្រទេសចិន។
គួរជម្រាបថា គណៈកម្មាការសេរីភាពសាសនាសហរដ្ឋអាមេរិក ឬហៅកាត់ថា USCIRF គឺជាអង្គភាពរបស់រដ្ឋាភិបាលសហព័ន្ធ ដែលវាយតម្លៃ និងណែនាំគោលនយោបាយសម្រាប់ប្រទេសដែលសេរីភាពសាសនាត្រូវបានចាត់ទុកថាមានគ្រោះថ្នាក់ និងកំពុងត្រូវគេរំលោភបំពាន។
មន្ត្រីទាំង៤រូបដែលត្រូវរងការហាមប្រាមមិនអោយចូលទឹកដីចិន រួមមានប្រធាន អនុប្រធាន និងមន្ត្រីពីររូបទៀត នៃអង្គភាពនៃផ្ទាល់តែម្តង៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
