ការកម្រើកឡើងវិញនៃជំងឺកូវីដ១៩បំប្លែងខ្លួនថ្មី ឌែលតា បានធ្វើឲ្យក្រុងប៉េកាំងឈឺក្បាលមែនទែន ហេតុនេះហើយ ដើម្បីបង្ការការចម្លងមេរោគដ៏កាចសាហាវមួយនេះទៅក្នុងសហគមន៍ទ្រង់ទ្រាយធំ រដ្ឋអំណាចចិនបានសម្រុកធ្វើតេស្តក្នុងទ្រង់ទ្រាយធំដូចគ្នា។
ក្នុងនោះការធ្វើតេស្តសរុប មិនដល់រយៈពេលមួយខែផង ចិនសម្រេចបានការធ្វើតេស្តដល់ទៅ១០លាននាក់ ខណៈក្រុងណានជីង ដែលមានពលរដ្ឋជាង៩លាននាក់ ហើយក៏ជាប្រភពចម្លងកូវីដ១៩ឌែលតាដំបូងនោះ បានបញ្ចប់ការធ្វើតេស្តទ្រង់ទ្រាយធំដល់ទៅ ៥ដងរួចហើយ។ លើសពីនេះ អាជ្ញាធរកំពុងត្រៀមរៀបចំការធ្វើតេស្តជុំទី៦ និងជាបន្តបបន្ទាប់សម្រាប់ក្រុងណានជីង និងខេត្តទីក្រុងដែលជាប់ពាក់ព័ន្ធផ្សេងទៀត។
បន្ថែមពីលើការធ្វើតេស្តក្នុងចំនួនដ៏ច្រើន ចិនបានដាក់ចេញវិធានការណ៍បិទខ្ទប់ក្នុងតំបន់មួយចំនួន បូករួមនឹងការបង្កើនការរឹតបន្តឹងសុវត្ថិភាព ការធ្វើដំណើរចេញចូល ស្ទើរគ្រប់ច្រកល្ហក ពិសេសទីក្រុងសំខាន់ៗរួមមាន ក្រុងប៉េកាំងជាដើម។
អត្ថបទទាក់ទង
សូមបញ្ជាក់ថា បច្ចុប្បន្នកូវីដ១៩ ឌែលតា កំពុងរាលដាលទៅនៅក្នុងខេត្តក្រុងជាង២០ នៅទូទាំងប្រទេស ក្នុងនោះ អាជ្ញាធរចិន បានបែងចែកចេញជា ២១៦ តំបន់តូចៗ ដែលចាត់ទុកថាជាកន្លែងមានហានិភ័យឆ្លងខ្ពស់ និង មធ្យម។
ចាប់តាំងពីរកឃើញករណីកូវីដ១៩ឌែលតា ដំបូងនៅណានជីង កាលពីខែមុន មកទល់នឹងពេលនេះក្រសួងសុខាភិបាលចិនបានរកឃើញការឆ្លងរាលដាលសរុបជិត ១ពាន់ករណីហើយ ដោយក្នុងនោះមាន ៦ករណីកំពុងស្ថិតក្នុងសភាពធ្ងន់ធ្ងរ។ ប្រសិនបើអ្នកជំងឺកំរិតធ្ងន់ទាំង៦ មាននរណាម្នាក់ឈានដល់បាត់បង់ជីវិត នោះវានឹងក្លាយជាករណីស្លាប់ដំបូងរបស់ចិន ក្នុងរយៈពេល៦ខែចុងក្រោយ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
