មន្ត្រីមកពីក្រសួងលំនៅដ្ឋាន និងអភិវឌ្ឍន៍ទីក្រុង និងជនបទរបស់ប្រទេសចិន បាននិយាយនៅក្នុងសន្និសីទសារព័ត៌មាននៅទីក្រុងប៉េកាំងថា ការផ្គត់ផ្គង់លំនៅដ្ឋានបន្ថែមនេះនឹងជួយបន្ធូរបន្ថយការលំបាកក្នុងការរស់នៅសម្រាប់យុវជនចិនប្រមាណ ១៣ លាននាក់ ដែលត្រូវការលំនៅដ្ឋានស្នាក់នៅ។
ប្រទេសចិនបានបង្កើនកិច្ចខិតខំប្រឹងប្រែងដើម្បីដោះស្រាយបញ្ហាលំនៅដ្ឋានសម្រាប់ប្រជាជនវ័យក្មេងរបស់ខ្លួនដែលកំពុងប្រឈមមុខនឹងការខ្វះខាតផ្ទះសម្បែង ជាពិសេសចំពេលមានការកើនឡើងតម្លៃផ្ទះនៅតាមទីក្រុងធំៗ ដោយកិច្ចខិតខំប្រឹងនេះ គឺស្ថិតនៅក្រោមផែនការ វិបុលភាពរួម របស់ប្រធានាធិបតីចិន ស៊ី ជិនពីង។
ការជំរុញអភិវឌ្ឍសម្រាប់ផ្ទះជួលដែលមានតម្លៃសមរម្យនេះ គឺផ្តោតលើទីក្រុងដែល មានលំហូរប្រជាជនច្រើន និងតម្លៃផ្ទះខ្ពស់តែប៉ុណ្ណោះ។ ជាក់ស្ដែង ទីក្រុងលំដាប់លេខមួយ ដូចជាទីក្រុងប៉េកាំង និងសៀងហៃ ក៏នឹងផ្គត់ផ្គង់ផ្ទះជួលតម្លៃទាបសរុបចំនួនជិត ១លាន ៩សែនខ្នងក្នុងឆ្នាំ ២០២១-២០២៥ ផងដែរ។
អត្ថបទគួរអាន
យ៉ាងណាមិញ ការធ្លាក់ចុះនៃវិស័យអចលនទ្រព្យរបស់ប្រទេសចិនត្រូវបានគេរំពឹងថា នឹងនៅតែបន្តក្នុងឆ្នាំ ២០២២នេះ ខណៈដែលក្រុមហ៊ុនអភិវឌ្ឍន៍អចលនទ្រព្យធំៗមួយចំនួន កំពុងប្រឈមនឹងតម្លៃផ្ទះថ្មីប្រចាំខែធ្លាក់ចុះ និងវិបត្តិសាច់ប្រាក់។ ប៉ុន្តែ និយតករចិនកំពុងតែបន្ធូរបន្ថយការវិធានការនេះបន្តិចម្ដងៗលើវិស័យអចលនទ្រព្យ ដើម្បីការពារការធ្លាក់ចុះសេដ្ឋកិច្ច និងដើម្បីបំពេញតម្រូវការរបស់អ្នកទិញផ្ទះសម្រាប់រស់នៅ ដែលមិនមែនជាការទិញលក់យកចំណេញ។
សូមជម្រាបថា ស្ថានភាពវិស័យអចលនទ្រព្យរបស់ប្រទេសចិនកាន់តែអាក្រក់ទៅៗ នៅប៉ុន្មានខែចុងក្រោយនេះ ដោយសារតែតម្លៃផ្ទះបានបន្តធ្លាក់ចុះ ទាំងផ្ទះសាងសង់ថ្មីៗ និងផ្ទះដែលត្រូវបានគេទិញទុកលក់បន្ត។ ស្របពេលជាមួយគ្នា តម្រូវការផ្ទះក៏បានធ្លាក់ចុះនៅទូទាំងប្រទេសផងដែរ។ នេះជាស្ថានភាពអចលនទ្រព្យអាក្រក់បំផុតមួយ មិនធ្លាប់មានរាប់ចាប់ពីខែកុម្ភៈឆ្នាំ២០១៥មក៕អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
