សម្រាប់ឆ្នាំនេះ រដ្ឋាភិបាលចិនបានរៀបចំបង្កើតគោលនយោបាយកាត់បន្ថយពន្ធ និងកម្រៃសេវា ទៅតាមដំណាក់កាល និងគោលដៅផ្សេងៗគ្នា ដោយផ្តោតទៅលើការជួយដល់អាជីវកម្ម ដែលរងគ្រោះដោយមេរោគកូវីដ-១៩ ឲ្យចាប់ផ្តើមបើកដំណើរការឡើងវិញ ហើយក៏ជួយគាំទ្រដល់ សហគ្រាសអាជីវកម្មខ្នាតតូចៗផងដែរ។
បើតាមរបាយការណ៍ហិរញ្ញវត្ថុពីរដ្ឋាភិបាលចិន បានបង្ហាញឲ្យដឹងថា គោលនយោបាយកាត់បន្ថយពន្ធ និងកម្រៃសេវាសំខាន់ៗ នឹងត្រូវបញ្ចប់នៅក្នុងខែមិថុនា ខាងមុខនេះ តែត្រូវពន្យារពេលបន្ថែមរហូតដល់ដំណាច់ឆ្នាំ ដើម្បីជួយសង្គ្រោះអាជីវកម្ម ឲ្យឆ្លងកាត់ពេលវេលាដ៏លំបាកនេះ និងធានាឲ្យបាននូវការផ្តល់កន្លែងការងារ។
អត្ថបទទាក់ទង!
ក្នុងនោះ សហគ្រាសអាជីវកម្ម ផលិតសម្ភារបរិក្ខារពេទ្យ នឹងទទួលបានគោលនយោបាយពន្ធពិសេស ហើយចំពោះអាជីវកម្មរងគ្រោះធ្ងន់ធ្ងរ ដោយសារតែមេរោគកូវីដ-១៩ នឹងទទួលបានការបន្ធូរបន្ថយ និងការលើកលែងពន្ធ និងកម្រៃសេវា។
បើតាមក្រុមអ្នកវិភាគចិន បានអះអាងថា រដ្ឋាភិបាលចិនមិនត្រឹមតែកែសម្រួលពន្ធលើតម្លៃបន្ថែម ប៉ុណ្ណោះទេ ប៉ុន្តែមានការកែប្រែទៅលើ ពន្ធលើប្រាក់ចំណូលបុគ្គលថែមទៀតផង ហើយវាបានផ្លាស់ប្តូរនៅក្នុងប្រព័ន្ធពន្ធទាំងមូលតែម្តង។
គួរជម្រាបដែរថា កាលពីឆ្នាំ ២០១៩កន្លងទៅរដ្ឋាភិបាលចិនបានកាត់បន្ថយពន្ធ និងកម្រៃសេវា ក្នុងទំហំធំដូចគ្នាដែរ ពោលគឺកាត់បន្ថយជាង ៣៣០ពាន់លានដុល្លារអាមេរិក ក្នុងនោះទឹកប្រាក់ជាង ១៧០ពាន់លានដុល្លារអាមេរិក ត្រូវបានរក្សាទុកសម្រាប់ សហគ្រាសឯកជន ហើយគោលនយោបាយបន្ធូរបន្ថយ នៅក្នុងឆ្នាំ ២០២០នេះ គឺដូចគ្នាទៅនឹងឆ្នាំមុន ដោយគ្រាន់តែមានបន្ថែម លក្ខណៈពិសេសមួយចំនួនទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
