ប្រភពដដែលបានឲ្យដឹងថា ក្រៅតែពីG7 និងប្រទេសចិន កិច្ចប្រជុំនេះក៏នឹងមានសមាសភាពចូលរួមពីសំណាក់មន្ត្រីជាន់ខ្ពស់មកពីបណ្តាប្រទេសដែលបានស្នើសុំការរៀបចំបំណុលឡើងវិញដែលស្ថិតក្នុងចំណោមវិធានការរបស់G20។ ក្នុងនោះរួមមានប្រទេស អេត្យូពី ហ៊្សំប៊ី និង ប្រទេសហ្គាណា ក៏ដូចជាប្រទេសដែលមានប្រាក់ចំណូលមធ្យមដូចជា ស្រីលង្កា, ស៊ូរីណាម និង អេក្វាឌ័រ ជាដើម ហើយប្រទេសប្រេស៊ីលដែលនឹងដឹកនាំ G20 នៅឆ្នាំក្រោយឆ្នាំ២០២៤ ក៏ទំនងជានឹងចូលរួមផងដែរ។
កិច្ចប្រជុំនេះនឹងត្រូវប្រព្រឹត្តឡើងបែបសហប្រធាន ដោយមានការដឹកនាំដោយមូលនិធិរូបិយវត្ថុអន្តរជាតិ(IMF) ធនាគារពិភពលោក ប្រទេសឥណ្ឌាដែលជាប្រធានG20ឆ្នាំនេះ។ គួរកត់សម្គាល់ថា កិច្ចប្រជុំនេះនឹងប្រព្រឹត្តទៅនៅមួយសប្តាហ៍មុនពេលដែលរដ្ឋមន្ត្រីហិរញ្ញវត្ថុរបស់ក្រុមប្រទេសG20 ជួបប្រជុំគ្នានៅទីក្រុង បេងហ្គាលូរូ នៃប្រទេសឥណ្ឌា ចាប់ពីថ្ងៃទី ២៣ដល់ថ្ងៃ ទី២៥ខែកុម្ភៈ។
គួរជម្រាបថា កិច្ចប្រជុំទាំងនេះលិចរូបរាងឡើងនៅពេលដែលមានការរិះគន់លើភាពយឺតយ៉ាវនៃការ បន្ធូរបន្ថយបញ្ហាបំណុលនៅប្រទេស ហ៊្សំប៊ី ដែលជារឿយៗបានទទូចសុំជំនួយ អស់ពេលជាង២ឆ្នាំមកហើយ។ អ្នករៀបចំកិច្ចប្រជុំនិយាយថា កិច្ចពិភាក្សានេះនឹងអាចជួយដោះស្រាយបញ្ហាជាគោលការណ៍ រួមទាំងអាចបន្ថយរយៈពេលសងបំណុល ដោយមិនផ្តោតលើតែប្រទេស ហ៊្សំប៊ី ឬករណីបុគ្គលនោះទេ។
អត្ថបទគួរអាន
គួរជម្រាបថា ក្រុមប្រទេសដែលមានសេដ្ឋកិច្ចជឿនលឿនទាំង៧ ឬG7 មូលនិធិរូបិយវត្ថុអន្តរជាតិ និងមន្ត្រីធនាគារពិភពលោកបានរួមគ្នាជំរុញនូវកិច្ចខិតខំប្រឹងប្រែងក្នុងការផ្តល់ជំនួយសង្គ្រោះបំណុលដល់ប្រទេសដែលជំពាក់បំណុលច្រើនជាយូរមកហើយ។
រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក អ្នកស្រី Janet Yellen និងមន្ត្រីមកពី G7 ផ្សេងទៀត មើលឃើញថា ប្រទេសចិន ដែលឥឡូវនេះជាប្រទេសម្ចាស់បំណុលដ៏ធំបំផុតរបស់ពិភពលោក គឺជាឧបសគ្គចម្បងសម្រាប់ការរកដំណោះស្រាយឱ្យឆាប់រហ័សមួយ។ ពួកគេក៏កំពុងជំរុញឱ្យមានកិច្ចព្រមព្រៀងពីសំណាក់ប្រទេសសមាជិក G20 លើការពង្រីកក្របខ័ណ្ឌរួមមួយដើម្បីរួមបញ្ចូលប្រទេសដែលមានប្រាក់ចំណូលមធ្យមផងដែរ។
សូមជម្រាបថា ធនាគារពិភពលោកគ្រោង នឹងអំពាវនាវម្តងទៀតដល់ប្រទេសចិន និងធនាគារអភិវឌ្ឍន៍ពហុភាគីផ្សេងៗទៀត ដើម្បីចូលរួមក្នុងការកាត់បន្ថយបំណុល។ ប៉ុន្តែមន្ត្រីរបស់សហរដ្ឋអាមេរិក បានច្រានចោលការលើកឡើងនេះ ដោយបានអះអាងថា ម្ចាស់បំណុលទាំងនោះបានជួយផ្តល់ប្រាក់កម្ចីសម្បទានខ្ពស់ និងផ្ដល់ជំនួយដល់ប្រទេសទាំងនោះ ក្នុងគ្រាដែលមានវិបត្តិរួចហើយរួចហើយ វាពិបាកនឹងឱ្យគេកាត់បន្ថយបំណុលខ្លាំងណាស់៕
