ទោះយ៉ាងណា អ្នកជំនាញ សេដ្ឋកិច្ចវៀតណាម បានអះអាងថា
ក្នុងកាលៈទេសៈនេះ ប្រទេសវៀតណាម កំពុងទទួលបានឱកាសល្អ តែក៏ទទួលរងនូវការប្រកួតប្រជែងកាន់តែខ្លាំងផងដែរ។
លោក ត្រាន់ ឌិញ ធៀន អ្នកសេដ្ឋកិច្ច និងជាសមាជិកនៃក្រុមអ្នកផ្ដល់យោបល់សេដ្ឋកិច្ច
របស់នាយករដ្ឋមន្ត្រីវៀតណាម បានប្រាប់ សារព័ត៌មានក្នុងស្រុក Vietnam
Express ថា សង្គ្រាមពាណិជ្ជកម្មរវាងចិន និងអាមេរិកនេះ គឺអាចនាំមកនូវឱកាស
ហើយក៏ផ្ដល់នូវការប្រកួតប្រជែងយ៉ាងស្វិតស្វាញសម្រាប់វៀតណាមផងដែរ។ ប៉ុន្ដែ
លោកថា វាអាស្រ័យលើក្រុមហ៊ុនក្នុងស្រុក ចេះស្វែងរកឱកាសដោយខ្លួនឯង។
លោកត្រាន់ ឌិញ ធៀន បានបន្ថែមទៀតថា សង្គ្រាមពាណិជ្ជកម្ម បានវាយប្រហារទំនុកចិត្តរបស់អ្នកវិនិយោគ ហើយខ្សែសង្វាក់ផ្គត់ផ្គង់សកលត្រូវបានបង្អាក់ ខណៈបរិយាកាសវិនិយោគហាក់កំពុងតែមានភាពមិនច្បាស់លាស់។
អត្ថបទទាក់ទង!
ត្រូវបានដកស្រង់សម្ដី ដោយសារព័ត៌មានក្នុងស្រុក Vietnam Express លោក ក្វៀន ធីធូ ត្រាង នាយកសភាពាណិជ្ជកម្មវៀតណាម បានលើកឡើងថា ផលិតផលវៀតណាម អាចនឹងត្រូវប្រឈមនឹងការប្រកួតប្រជែងកាន់តែខ្លាំងជាមួយនឹងផលិតផល ដែលផលិតដោយក្រុមហ៊ុនចិន នៅក្នុងស្រុក និងនាំមកពីក្រៅប្រទេស។
ចិននឹងចូលមកផលិតផលិតផលរបស់ខ្លួន នៅក្នុងប្រទេសវៀតណាម ដើម្បីគេចវេះ ពីការដំឡើងពន្ធរបស់ប្រធានាធិបតីអាមេរិក លោក ដូណាល់ត្រាំ ហើយផលិតផលតម្លៃថោករបស់ចិន នឹងប្រកួតប្រជែងជាមួយនឹងផលិតផលរៀតណាមកាន់តែខ្លាំង។ ដោយកត្តានេះ ត្រូវបានអ្នកជំនាញ អះអាងថា នឹងមិនសូវផ្ដល់ប្រយោជន៍ ដល់សេដ្ឋកិច្ចវៀតណាមនោះឡើយ។
ប្រតិបត្តិករនៅក្នុងវិស័យផលិតរបស់វៀតណាម ក៏មានការព្រួយបារម្ភផងដែរ ប្រសិនបើរដ្ឋាភិបាលមិនអាចគ្រប់គ្រងស្ថានការណ៍នេះបានល្អ នោះវាអាចនឹងមានផលវិបាកដល់ក្រុមហ៊ុនវៀតណាម ព្រោះសហរដ្ឋអាមេរិក ក៏អាចនឹងដំឡើងពន្ធលើផលិតផលវៀតណាម ដូចដែលធ្លាប់ធ្វើជាមួយចិនដែរ។
ក្រុមអ្នកសេដ្ឋកិច្ចវៀតណាម បានលើកឡើងថា ដើម្បីការពារប្រយោជន៍ក្រុមហ៊ុនក្នុងស្រុក រដ្ឋាភិបាលគួរតែពិចារណា លើពន្ធនាំចូលផលិតផលពីប្រទេសចិន ប្រសិនបើវាជាសញ្ញាមួយនៃសកម្មភាពការពារ។
ក្រុមអ្នកសេដ្ឋកិច្ចវៀតណាម បានលើកឡើងទៀតថា រដ្ឋាភិបាល ក៏មិនគួរផ្ដល់អាជ្ញាបណ្ណឲ្យក្រុមហ៊ុនចិននោះដែរ ប្រសិនបើគ្មានការធានាថា ២ភាគ៣ នៃខ្សែសង្វាក់ផលិតកម្ម គឺធ្វើឡើងនៅក្នុងប្រទេសវៀតណាម។ លើសពីនេះ រដ្ឋាភិបាល គួរតែលើកម្ពស់កិច្ចព្រមព្រៀងពាណិជ្ជកម្មសេរី ជាមួយអឹរ៉ុប ក៏ដូចជាប្រទេសផ្សេងទៀត ដើម្បីកាត់បន្ថយការពឹងផ្អែកតែលើអាមេរិក និងចិន៕
អត្ថបទគួរឲ្យចាប់អារម្មណ៍!
គួរជម្រាបថា ប្រធានាធិបតីអាមេរិក លោក ដូណាល់ ត្រាំ នាពេលថ្មីៗនេះ បានគំរាមសារជាថ្មីម្តងទៀត ថាអាមេរិកចង់ដំឡើងពន្ធលើ ទំនិញនាំចូលពីប្រទេសចិន ដែលមានតម្លៃជិត ២៧០ពាន់លានដុល្លារអាមេរិក ពោលគឺ ដំឡើងពន្ធពី ១០ភាគរយ ទៅ ២៥ភាគរយ។
កាលពីខែ កញ្ញា កន្លងមកនេះ លោកប្រធានាធិបតីអាមេរិក បានសម្រេចដំឡើងពន្ធលើ ទំនិញចិន ដែលមានតម្លៃជាង ២០០ពាន់លានដុល្លារអាមេរិកម្តងរួចទៅហើយ ខណៈដែលភ្លាមៗនោះ ប្រទេសចិន ក៏ធ្លាប់បានសងសឹក ដោយបានដំឡើងពន្ធទៅលើ ទំនិញជាច្រើនមុខរបស់ អាមេរិក ដែលមានតម្លៃជាទឹកប្រាក់ជាង ៦០ពាន់លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
