ក្រសួងអប់រំចិនបានជំរុញឲ្យនិស្សិតនិងបញ្ញវន្តចិន«បង្កើនការវាយតម្លៃហានិភ័យរបស់ខ្លួន» បន្ទាប់ពីមានការកើនឡើងនូវករណីពន្យារពេល និងការបដិសេធទិដ្ឋាការ ដល់អ្នកដែលបានដាក់ពាក្យសុំទៅរៀននៅសហរដ្ឋអាមេរិក។
សេចក្ដីថ្លែងការណ៍របស់ក្រសួងអប់រំចិន បាននិយាយថា ៖ «មួយរយៈពេលចុងក្រោយនេះ និស្សិតចិនមួយចំនួននៅសហរដ្ឋអាមេរិក បានជួបប្រទះស្ថានភាពដែលទិដ្ឋាការរបស់ពួកគេត្រូវបានរឹតត្បិត រយៈពេលពិនិត្យទិដ្ឋាការឡើងវិញត្រូវបានអូសបន្លាយ រយៈពេលនៃសុពលភាពទិដ្ឋាការត្រូវបានកាត់បន្ថយ ឬការស្នើសុំទិដ្ឋាការត្រូវបានបដិសេធ ជាដើម»។
សេចក្ដីថ្លែងការណ៍ដដែល បន្តថា ៖ «ក្រសួង[អប់រំ] ចង់ក្រើនរំឭកដល់និស្សិតនិងបញ្ញវន្តចិន សូមបង្កើនការវាយតម្លៃហានិភ័យរបស់ខ្លួន ពង្រឹងការយល់ដឹងបង្ការមុន និងត្រៀមលក្ខណៈឲ្យបានសមស្រប»។
កាសែតដដែលផ្សាយថា និស្សិតចិននៅក្នុងវិស័យមនុស្សយន្ត អាកាសចរណ៍ វិស្វកមម្ម និងផលិតកម្មបច្ចេកវិទ្យាជាន់ខ្ពស់ ដែលសុទ្ធសឹងជាវិស័យសំខាន់ៗនៃគោលនយោបាយ «ផលិតនៅចិន ឆ្នាំ២០២៥» បានជួបប្រទះនូវការត្រួតពិនិត្យកាន់តែតឹងរ៉ឹងបន្ថែមទៀត នៅពេលដាក់ពាក្យស្នើសុំទិដ្ឋាការចូលសហរដ្ឋអាមេរិក។
តើបានអានអត្ថបទនេះ ឬនៅ?
ប្រទេសចិន គឺជាប្រភពនិស្សិតអន្តរជាតិធំជាងគេបំផុត នៅក្នុងសហរដ្ឋអាមេរិក ដោយនិស្សិតចិនមានចំនួនប្រហែល ៣១% ក្នុងចំណោមនិស្សិតអន្តរជាតិទាំងអស់នៅលើទឹកដីសហរដ្ឋអាមេរិក។ នេះបើយោងតាមតួលេខចុងក្រោយបំផុត ពីក្រសួងសន្តិសុខក្នុងប្រទេសរបស់អាមេរិក។
នៅក្នុងខែមីនា មាននិស្សិតចិន ៣៦៩.៣៦៤នាក់ មកពីប្រទេសចិន មករៀននៅសហរដ្ឋអាមេរិក។
ការស្ទង់មតិបង្ហាញថា សហរដ្ឋអាមេរិកនៅតែជាប្រទេសគោលដៅដែលនិស្សិតចិនចូលចិត្ត ប៉ុន្តែ ប្រជាប្រិយភាពហាក់ធ្លាក់ចុះបន្តិចនៅឆ្នាំ២០១៩នេះ ដោយគេរកឃើញថា អ្នកឆ្លើយតបការស្ទង់មតិ ៤៣% ឲ្យពិន្ទុសហរដ្ឋអាមេរិកនៅលើគេបំផុត ជាជម្រើសសម្រាប់ការសិក្សារបស់ពួកគេ ដែលថយចុះពីបណ្ដាឆ្នាំមុនៗ ដែលមានដល់ទៅ ៤៩%។ ប្រទេសបន្តបន្ទាប់ទៀត ដែលនិស្សិតចិនចូលចិត្តទៅរៀនបន្តដែរនោះ គឺ អង់គ្លេស អូស្ត្រាលី និងកាណាដា៕
