ទីក្រុងវូហាន ជាទីក្រុងមួយ នៃខេត្តហូបេ ដែលទទួលរងការផ្ទុះរាលដាលកូវីដ-១៩ ខ្លាំងជាងគេនោះ កាលពីសប្ដាហ៍មុននេះ បានបើកទទួលភ្ញៀវទេសចរមកពីខេត្តផ្សេងទៀត ឲ្យចូលធ្វើដំណើរកម្សាន្ដឡើងវិញហើយ។ ជាក់ស្ដែង កាលពីចុងសប្ដាហ៍មុននេះ មានរថយន្ដដឹកភ្ញៀវទេសចរប្រមាណជាង ៣០០នាក់មកពីខេត្តហ៊ីនណាន ដែលជាខេត្តជាប់នឹងខេត្ត ហូបេ ដែរនោះ បានចូលមកកម្សាន្ដនៅតាមតំបន់ទេសចរវាលស្មៅ ម៉ូឡាន នៅក្នុងទីក្រុងវូហាន។
ភ្ញៀវទេសចរ ដែលបានមកកម្សាន្ដនៅទីក្រុងវូហាន បាននិយាយថា នេះគឺជាលើកទី១របស់ពួកគេ ដែលបានមកកម្សាន្ដនៅទីនេះ ក្រោយពីទីក្រុងនេះ បានបើកទទួលភ្ញៀវទេសចរឡើងវិញ។ ហើយពួកគេបាននិយាយថា ការមកម្សាន្ដនៅទីនេះ ពួកគេហាក់មានភាពជឿជាក់ពីសុវត្ថិភាព ដោយអ្នកខ្លះមិនបានទាំងម៉ាស់ការពារនោះឡើយ។
អត្ថបទទាក់ទង!
មគ្កទេសក៍ទេសចរ នៅក្នុងទីក្រុងវូហាន បានលើកឡើងថា បន្ទាប់ពីទូទាំងខេត្តហូបេ បានបើកឲ្យមានការធ្វើអាជីវកម្មទេសចរណ៍ឡើងវិញ គេសង្កេតឃើញថា អ្នកនាំភ្ញៀវទេសចរនឹងមានឱកាសរកស៊ីបានដូចធម្មតាឡើងវិញ ហើយនៅចុងខែកក្កដានេះ ឬនៅខែសីហា ការធ្វើដំណើរកម្សាន្ដក្នុងទីក្រុងវូហាន នឹងស្ទុះងើបខ្លាំងឡើងវិញ។
តាំងពីថ្ងៃទី ១៧ ខែកក្កដាមក នៅពេលដែលខេត្តហូបេ បានបើកឲ្យមានអាជីវកម្មទេសចរណ៍ ទូទាំងខេត្តឡើងវិញ ភ្ញៀវទេសចរដែលបានធ្វើដំណើរកម្សាន្ដនៅក្នុងតាមតំបន់ទេសចរណ៍ បានកើនឡើងខ្ពស់ជាងមុន ដល់ទៅ ៣០ ទៅ៥០ភាគយ។
ដើម្បីទាក់ទាញភ្ញៀវទេសចរណ៍ កាន់តែ្រច្រើន តំបន់ទេសចរណ៍ ក្នុងទីក្រុងវូហាន បានបង្កើតឡើងនូវកម្មវិធីថ្មីៗជាច្រើន ក៏ដូចជាមានគោលការណ៍អនុគ្រោះផ្សេងៗផងដែរ រួមមានការផ្ដល់ជូនរង្វាន់សម្រាប់ភ្ញៀវ ក៏ដូចជាការផ្ដល់ជូនសំបុត្រចូលទស្សនាឥតគិតថ្លៃ សម្រាប់ភ្ញៀវមួយចំនួនផងដែរ។
សូមបញ្ជាក់ថា ករណីឆ្លងកូវីដ-១៩ នៅទូទាំងពិភពលោកគិតត្រឹមថ្ងៃទី២៧ ខែកក្កដានេះ មានប្រមាណជាង ១៦ លាននាក់ ក្នុងនោះ ជាសះស្បើយប្រមាណជាង ៩លាននាក់ និងស្លាប់ជិត ៦៥ម៉ឺននាក់។ ក្នុងនោះដែរ ប្រទេសចិន មានករណីឆ្លងសរុបជិត ៨ម៉ឺ៦ពាន់នាក់ ដោយក្នុងនោះ ជាសះស្បើយប្រមាណ ៨ម៉ឺននាក់ និងស្លាប់ប្រមាណជាង៤ពាន់៦រយនាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
