ផ្នែកខ្លះនៃគម្រោងផ្លូវដែកក្នុងតំបន់នេះ បានទទួលជោគជ័យរួចស្រេចទៅហើយ ជាក់ស្តែងខ្សែរថភ្លើងក្នុងប្រទេសឡាវដែលតភ្ជាប់ជាមួយចិន បានចាប់ផ្តើមដំណើរការតាំងពីខែធ្នូមកម្ល៉េះ។ ខ្សែរថភ្លើងរបស់ឡាវ ដែលគាំទ្រការសាងសង់ដោយប៉េកាំង ក៏ជាផ្នែកមួយនៃគំនិតផ្តួចផ្តើមខ្សែក្រវ៉ាត់និងផ្លូវផងដែរ។ នេះបើតាមការចុះផ្សាយដោយសារព័ត៌មានជប៉ុន Nikkei។
ភាពជោគជ័យនៃខ្សែរថភ្លើងរបស់ឡាវ គ្រាន់តែជាផ្នែកមួយតូចប៉ុណ្ណោះ ក្នុងគម្រោងខ្សែរថភ្លើងដឹកជញ្ជូននៅក្នុងតំបន់អាស៊ាន។ ផ្តួចផ្តើមឡើង កាលពីឆ្នាំ២០១០ ហើយផ្តើមអនុវត្តនៅឆ្នាំ២០១៣ ចិនចង់សាងសង់ខ្សែរថភ្លើងចេញពីក្រុងគុនមីង នៃខេត្តយូណាន ឆ្លងកាត់ឡាវ ថៃ និងបន្តរហូតដល់ម៉ាឡេស៊ី និងសិង្ហបុរី។
ក្រោមកិច្ចខិតខំប្រឹងប្រែងនេះ ចិនចាប់អារម្មណ៍ក្នុងការដើរតួនាទីនាំមុខគេមួយ ក្នុងការកសាងបណ្តាញផ្លូវដែកនៅអាស៊ីអាគ្នេយ៍។ គោលបំណងចម្បងរបស់ខ្លួន គឺដើម្បីធានាបាននូវផ្លូវដឹកជញ្ជូនតាមផ្លូវគោកដែលអាចបម្រើជាជម្រើសសម្រាប់ផ្លូវដឹកជញ្ជូនតភ្ជាប់តាមសមុទ្រដែលឆ្លងកាត់សមុទ្រចិនខាងត្បូង និងច្រកសមុទ្រម៉ាឡាកា។
ដើម្បីឱ្យយុទ្ធសាស្ត្រនេះដំណើរការទៅមុខទៀតបាន ចិនត្រូវការឱ្យថៃសហការ ខណៈផ្លូវដែកត្រូវឆ្លងកាត់ប្រទេសមួយនេះ ដើម្បីទៅដល់ប្រទេសម៉ាឡេស៊ី និងសិង្ហបុរី។ អ្នកជំនាញខ្លះនៅប្រទេសថៃកំពុងទាមទារឲ្យមានចំណាត់ការរហ័សរបស់រដ្ឋាភិបាលក្រុងបាងកក ក្នុងការតភ្ជាប់ប្រទេសថៃ និងឡាវជាមួយនឹងខ្សែរថភ្លើងល្បឿនលឿន ប៉ុន្តែរដ្ឋាភិបាលថៃបច្ចុប្បន្នហាក់មិនសូវចាប់អារម្មណ៍នោះទេ។អត្ថបទគួរអាន
ឆ្នាំ២០១៥ ថៃនិងចិនបានសម្រេចកិច្ចព្រមព្រៀងកសាងខ្សែរថភ្លើងភ្ជាប់ពីឡាវមកថៃមួយខ្សែហើយគ្រោងបញ្ចប់ការសាងសង់នៅឆ្នាំ២០២០ ប៉ុន្តែនៅឆ្នាំ២០១៧ គ្រាដែលគម្រោងចាប់ផ្តើមសាងសង់ ថៃហាក់រារែកចិត្ត ហើយបានកែប្រែផែនការមួយចំនួននៅក្នុងគម្រោង។
ថៃផ្តើមរារែកចិត្ត ក៏ដោយសារតែអ្វីដែលទីក្រុងបាងកកបានចាត់ទុកថា ជាការទាមទារមិនសមហេតុផលពីទីក្រុងប៉េកាំង រួមទាំងលក្ខខណ្ឌនៃប្រាក់កម្ចីរបស់ខ្លួន និងការតម្រូវឲ្យប្រើតែសម្ភារៈ និងកម្មកររបស់ចិនសម្រាប់ការសាងសង់។ ក្រោយមក រដ្ឋាភិបាលថៃ បានសម្រេចកាត់បន្ថយគម្រោង ដោយសាងសង់តភ្ជាប់តែត្រឹមពីទីក្រុងបាងកកក មកខេត្តជាប់ព្រំដែន នគររាជសីមាវិញ ហើយថៃចង់កសាងផ្លូវដោយខ្លួនឯង ថវិកាខ្លួនឯង និងគ្រប់គ្រងដោយខ្លួនឯង លើកលែងតែការយកបច្ចេកវិទ្យាផ្លូវដែកល្បឿនលឿនពីចិនប៉ុណ្ណោះ។
ប្រការនេះធ្វើឲ្យប្រទេសចិនយល់ថា ការផ្លាស់ប្តូរទាំងនេះបានកាត់បន្ថយតួនាទីរបស់ប៉េកាំង យ៉ាងខ្លាំងនៅក្នុងគម្រោងមួយនេះ ហេតុនេះហើយទើបគម្រោងផ្លូវដែកចិន-ថៃ ដែលតភ្ជាប់ពីប្រទេសឡាវ ហាក់នៅជាប់គាំងទៅមុខមិនរួច៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
