បន្ទាប់លែងសូវបង្ហាញមុខជាសាធារណៈអស់រយៈពេលជាង១ឆ្នាំ មហាសេដ្ឋីចិន លោក Jack Ma ពេលនេះ បានចាកចេញពីប្រទេសចិន ទៅដល់ប្រទេសអេស្ប៉ាញហើយ ក្នុងដំណើរទស្សនកិច្ចសិក្សាទាក់ទងនឹងវិស័យកសិកម្ម។ មុនពេលទៅដល់ អេស្ប៉ាញ មហាសេដ្ឋីចិនរូបនេះ ក៏បានធ្វើដំណើររយៈពេលខ្លីទៅកាន់ទីក្រុងហុងកុងផងដែរ។
ដំណើរចាកចេញពីប្រទេសចិនទៅទស្សនកិច្ចនៅក្រៅប្រទេសរបស់លោក Jack Ma ក៏ត្រូវបានគេមើលឃើញថា ទីក្រុងប៉េកាំងអាចនឹងមានការកាត់បន្ថយសម្ពាធមួយចំនួនទៅលើក្រុមហ៊ុនបច្ចេកវិទ្យាយក្សៗរបស់ចិន ដែលកន្លងមកត្រូវបានរងការបង្ក្រាបយ៉ាងដំណំពីសំណាក់រដ្ឋាភិបាល ទាក់ទងនឹងប្រតិបត្តិការរបស់ក្រុមហ៊ុនទាំងនោះ ដោយរដ្ឋចិនចាត់ទុកថា ប្រតិបត្តិការរបស់ពួកគេមានការរំលោភច្បាប់ពាណិជ្ជកម្ម។
យ៉ាងណាមិញ ចំពោះលោក Jack Ma គឺត្រូវបានគេមើលឃើញថា បានរលាកខ្លាំងជាងគេ ដោយសារតែរងើកភ្លើងបង្ក្រាបរបស់រដ្ឋចិន បន្ទាប់ពីមហាសេដ្ឋីមាត់រអិលរូបនេះ បាននិយាយតិះទៀនដល់ប្រព័ន្ធគ្រប់គ្រងរបស់រដ្ឋកាលពីឆ្នាំមុន ដោយក្នុងនោះ លោក Jack Ma ធ្លាប់បានព្រលយសម្ដីខ្លាំងៗថា «ភាពច្នៃប្រឌិត ឬនវានវត្តន៍ដ៏ល្អ គឺមិនខ្លាចនឹងបទបញ្ញាតិនោះទេ ប៉ុន្ដែត្រូវខ្លាចបទបញ្ញាតិដែលហួសសម័យកាលវិញ»។ ពាក្យសម្ដីប៉ុន្មានម៉ាត់នេះ ត្រូវបានគេកត់សម្គាល់ថា គឺជាការវាយប្រហារពាក្យសម្ដីខ្លាំងៗមួយទៅលើប្រព័ន្ធគ្រប់គ្រងរបស់រដ្ឋាភិបាលចិន។ លុះក្រោយមក ក្រុមហ៊ុនរបស់លោក គឺ Ant Group ត្រូវបានបញ្ជាឲ្យបញ្ឈប់ដំណើរការបោះផ្សាយលក់ភាគហ៊ុនរបស់ខ្លួនតម្លៃរាប់សិបពាន់លានដុល្លារ ខណៈក្រុមហ៊ុន Alibaba Group របស់លោកក៏រងការស៊ើបអង្កេត និងឈានដល់ការដាក់ពិន័យជាប្រាក់យ៉ាងសម្បើមផងដែរ។
អត្ថបទគួរអាន
ជាទូទៅលោក Jack Ma តែងតែធ្វើដំណើរចេញចូលប្រទេសចិន ប៉ុន្ដែ ក្រោយពេលលែងសូវបង្ហាញមុខជាសាធារណៈ លោកក៏ត្រូវបានគេរាយការណ៍ថា ត្រូវបានគេរឹតត្បិតមិនឲ្យធ្វើដំណើរចេញពីប្រទេសចិននោះឡើយ។
នៅពេលដែល លោកបានចេញពីប្រទេសចិន ទៅកាន់អេស្ប៉ាញ គេសង្កេតឃើញថា ភាគហ៊ុនរបស់ Alibaba បានហក់ឡើងដល់ទៅ ៩% នៅហុងកុង ដែលនេះសបញ្ជាក់ឲ្យឃើញថា និយ័តករចិន គឺបានដោះស្រាយរួចរាល់ហើយនូវបញ្ហាជាមួយក្រុមហ៊ុន Alibaba។ នេះបើតាមប្រភពដែលបាននិយាយប្រាប់សារព័ត៌មាន South China Morning Post៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
