អ្នកនាំពាក្យរបស់ក្រុមគណៈមេធាវីរបស់ក្រុមហ៊ុនផលិតថាមពលពន្លឺព្រះអាទិត្យរបស់សហរដ្ឋអាមេរិកមួយ បានគូសបញ្ជាក់ថា ពួកគេបានដាក់ញត្តិស្នើសុំការស៊ើបអង្កេតទៅកាន់ ក្រសួងពាណិជ្ជកម្មអាមេរិករួចហើយកាលពីចុងសប្តាហ៍មុន។ ប៉ុន្តែមិនទាន់មានការឆ្លើយតបពីក្រសួងពាណិជ្ជកម្មអាមេរិកនោះទេ ខណៈអ្នកនាំពាក្យរបស់ក្រសួង ក៏បានបដិសេធក្នុងការឆ្លើយតបជាមួយអ្នកសារព័ត៌មានរបស់ Bloomberg ផងដែរ។
នៅក្នុងញត្តិរបស់ក្រុមគណៈមេធាវីក្រុមហ៊ុនអាមេរិកខាងលើនេះ បានសរសេរអះអាងថា ទង្វើរបស់ក្រុមហ៊ុនផលិតថាមពលពន្លឺព្រះអាទិត្យពីផ្ទាំងសូឡារបស់ចិន គឺបង្ហាញយ៉ាងច្បាស់ពីចេតនាចង់គេចវេសពីការបង់ពន្ធនិយាយដោយឡែក និងគេចវេសពីការដាក់ទណ្ឌកម្មរបស់អាមេរិកនិយាយជារួម។ ហេតុនេះហើយ គេបានស្នើឲ្យរដ្ឋាភិបាលអាមេរិកពង្រីកវិសាលភាពនៃការដាក់ទណ្ឌកម្មទៅលើក្រុមហ៊ុនចិន ដែលមានប្រតិបត្តិការនៅក្នុងបណ្តាប្រទេសនៃតំបន់អាស៊ីអាគ្នេយ៍បន្ថែមទៀត។
គួរជម្រាបថា កន្លងមកការដាក់ទណ្ឌកម្មពីសហរដ្ឋអាមេរិកលើក្រុមហ៊ុនចិន ធ្វើឡើងតែនៅលើក្រុមហ៊ុនចិនណា ដែលមានប្រតិបត្តិការរកស៊ីនៅក្នុងទឹកដីចិនប៉ុណ្ណោះ។ ប្រការនេះ បានធ្វើឲ្យក្រុមហ៊ុនជាច្រើន មិនត្រឹមតែនៅក្នុងវិស័យថាមពលនោះទេ បានផ្លាស់ប្តូររោងចក្រ សហគ្រាស និងប្រតិបត្តិការរបស់ខ្លួន មកក្នុងប្រទេសផ្សេងៗទៀតក្រៅតែពីប្រទេសចិន។ ក្នុងនោះ ប្រទេសគោលដៅ រួមមានប្រទេសវៀតណាម ថៃ និងម៉ាឡេស៊ីជាដើម ដោយសារតែប្រទេសទាំងនេះ មានកម្រិតប្រាក់ឈ្នួលកម្លាំងពលកម្មនៅទាប គួបផ្សំនឹងកម្មករជំនាញក៏មានចំនួនច្រើន។
អត្ថបទគួរអាន
គួររំឭកថា ការដាក់ទណ្ឌកម្មរបស់អាមេរិកមកលើក្រុមហ៊ុនចិន តាមរយៈការដំឡើងពន្ធគយលើទំនិញនាំចូលពីចិនទៅសហរដ្ឋអាមេរិកនេះ គឺជាលទ្ធផលនៃជម្លោះពាណិជ្ជកម្មរវាងយក្សសេដ្ឋកិច្ចទាំងពីរ ដែលគេស្គាល់បានថាជា «សង្គ្រាមពាណិជ្ជកម្ម» រវាងចិននិងអាមេរិក ដែលបានចាប់កម្រើកឡើងតាំងពីឆ្នាំ ២០១៨មកម្ល៉េះ គ្រាដែលលោក ដូណាល់ត្រាំនៅជាប្រធានាធិបតីអាមេរិកនៅឡើយ។
ក្រោយមក មានក្រុមហ៊ុនចិនជាច្រើនបានផ្តើមរត់ចេញពីទឹកដីចិន មកតាំងមូលដ្ឋានផលិតនៅប្រទេសដទៃក្នុងតំបន់ ដើម្បីជៀសផុតពីការដាក់ទណ្ឌកម្ម។ ក្នុងនោះ ក៏មានដែរ ក្រុមហ៊ុនចិនមួយចំនួនបានលួចបន្លំប្រើប្រាស់ឈ្មោះ និងអស័យដ្ឋាននៅប្រទេសដទៃក្រៅពីចិន ដើម្បីអាចនាំចូលទៅអាមេរិកបានដោយមិនចាំបាច់បង់ពន្ធច្រើន និងមិនចាំបាច់រងគំនាបទណ្ឌកម្ម។
គិតមកទល់ពេលនេះ ទោះក្នុងអាណត្តិរបស់ប្រធានាធិបតីថ្មី លោកចូ បៃឌិនក្តី ក៏ភ្លើងសង្គ្រាមពាណិជ្ជកម្ម នយោបាយ ក៏ដូចជាសង្គ្រាមពាក្យសម្តីរវាងគូប្រជែងទាំងពីរមិនទាន់បានធូរស្រាលនៅឡើយទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
