រដ្ឋាភិបាលចិនថា នៅតែចំហទ្វារឲ្យ Jack Ma បោះផ្សាយ IPO របស់ក្រុមហ៊ុន Ant Group

ការបញ្ជាក់របស់ធនាគារកណ្ដាលចិននេះ គឺធ្វើឡើង ក្រោយពីរដ្ឋាភិបាលបានសម្រេចផ្អាកដំណើរការបោះផ្សាយ IPO តម្លៃប្រមាណ ៣៧ពាន់លានដុល្លារ របស់ក្រុមហ៊ុន Ant Group កាលពីខែវិច្ឆិកាឆ្នាំ២០២០កន្លងមក។

លោក Gang Yi ទេសាភិបាល ធនាគារកណ្ដាលរបស់ចិនបានលើកឡើងនៅក្នុងកិច្ចប្រជុំតាមអនឡាញ ក្នុងវេទិកាសេដ្ឋកិច្ចពិភពលោកកាលពីថ្ងៃទី ២៦ មករាថា ការចុះបញ្ជីផ្សារភាគហ៊ុនរបស់ក្រុមហ៊ុន Ant Group អាចនឹងត្រូវបានពិចារណាឡើងវិញ នៅក្រោមកាលៈទេសៈដ៏ត្រឹមត្រូវមួយ។ លោ Gang Yi ថា ឲ្យតែក្រុមហ៊ុនរបស់លោក Jack Ma គោរពទៅតាមច្បាប់របស់រដ្ឋាភិបាលចិន នោះនឹងអាចដំណើរការទៅបានហើយ។

លោក Yi បានបញ្ជាក់ពីការសម្រេចចិត្តបញ្ឈប់ការចុះបញ្ជីបោះផ្សាយមូលបត្ររបស់ក្រុមហ៊ុន Ant Group ថា គឺ”ជារឿងស្មុគស្មាញមួយ”

ក្រុមហ៊ុន Ant Group មានផែនការចុះបញ្ចីផ្សារភាគហ៊ុនក្នុងខែវិច្ឆិកា ប៉ុន្ដែ ក្រោយមកត្រូវបាននិយ័តករចិន ផ្អាកដំណើរការនេះ ហើយធនាគារកណ្ដាលចិនក៏បានបញ្ជាឲ្យក្រុមហ៊ុននេះផ្អាកសកម្មភាពបោះផ្សាយដូចគ្នាដែរ។

ក្រោយពីក្រុមហ៊ុនត្រូវបានផ្អាកការបោះផ្សាយលក់មូលបត្រ លោក Jack Ma ក៏ត្រូវបានសារព័ត៌មានជាច្រើនរាយការណ៍ថា បានបាត់មុខជាសាធារណៈ ទើបតែនៅដើមខែមករា ឆ្នាំ២០២១ទេ ទើបលោកបានបង្ហាញខ្លួននៅក្នុងជំនួបជាមួយនឹងក្រុមគ្រូបង្រៀន១០០នាក់តាមប្រព័ន្ធវីដេអូនអនឡាញ៕