វិនិយោគិនចិនមួយក្រុមមកស្វែងរកឱកាសវិនិយោគលើការដាំកាហ្វេនៅកម្ពុជា ដើម្បីកែច្នៃ និងនាំចេញ

ក្នុងជំនួបពិភាក្សានោះ ថ្នាក់ដឹកនាំក្រសួងកសិកម្មបានណែនាំឲ្យក្រុមវិនិយោគិនចិនទៅស្វែងរកឱកាសវិនិយោគនៅខេត្តមណ្ឌលគិរី ដែលជាខេត្តសក្តានុពលមួយលើវិស័យដំណាំកាហ្វេ។ ជាមួយគ្នានេះ ឯកឧត្តមរដ្ឋមន្ត្រី ក៏បានស្នើឲ្យវិនិយោគិនចិនទាំងនោះសិក្សាសក្តានុពលក្នុងការវិនិយោគលើវិស័យវារីវប្បកម្មទាំងទឹកសាប និងទឹកប្រៃនៅកម្ពុជាផងដែរ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពីថ្ងៃទី១០ ឧសភា បានជួបពិភាក្សាជាមួយក្រុមវិនិយោគិនមកពីប្រទេសចិន លើបញ្ហាការវិនិយោគលើវិស័យកសិកម្មនៅកម្ពុជា។ នៅចំពោះមុខរដ្ឋមន្ត្រីក្រសួងកសិកម្ម ក្រុមវិនិយោគិនចិនបានបង្ហាញពីបំណងចង់វិនិយោគលើដំណាំកាហ្វេនៅកម្ពុជាទាំងការដាំ និងកែច្នៃសម្រាប់នាំចេញ និងផ្គត់ផ្គង់តម្រូវការប្រើប្រាស់ក្នុងស្រុក។ ទន្ទឹមនឹងផ្តល់គំនិតយោបល់ក្នុងការវិនិយោគលើដំណាំកាហ្វេ ឯកឧត្តមរដ្ឋមន្ត្រី បានណែនាំឲ្យក្រុមវិនិយោគិនទាំងនោះទៅសម្លឹងឱកាសវិនិយោគលើដំណាំកាហ្វេនៅខេត្តមណ្ឌលគិរី ដែលជាខេត្តសក្តានុពលមួយលើវិស័យនេះ។

បន្ថែមលើនេះឯកឧត្តម វេង សាខុន បានជំរុញឲ្យក្រុមអ្នកវិនិយោគទាំងនោះ គួរទៅសិក្សាពីលក្ខខណ្ឌអំណោយផលនៃផលិតកម្មនេះ និងជួបពិភាក្សាជាមួយសហគមន៍កាហ្វេ ដើម្បីពិភាក្សាអំពីកិច្ចសហការរវាងក្រុមហ៊ុន និងសហគមន៍ក្នុងការអនុវត្តផលិតកម្មកសិកម្មតាមកិច្ចសន្យា។

លោក សុខ ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានបង្ហាញការសាទរយ៉ាងខ្លាំងចំពោះការណែនាំរបស់ឯករដ្ឋមន្ត្រីក្រសួងកសិកម្ម ដែលជំរុញឲ្យក្រុមអ្នកវិនិយោគមកពីប្រទេសចិនមកសិក្សា និងសម្លឹងមើលឱកាសវិនិយោគលើវិស័យដំណាំកាហ្វេនៅខេត្តមណ្ឌលគិរី។ លោកបានគូសបញ្ជាក់ថា ប្រសិនបើអ្នកវិនិយោគទាំងនោះ ពិតជាមកបោះទុនរកស៊ីលើវិស័យដំណាំកាហ្វេនៅខេត្តនេះមែននោះ វានឹងរួមចំណែកជួយធ្វើឲ្យវិស័យដាំកាហ្វេនៅមណ្ឌលគិរីកាន់តែល្អប្រសើរបន្ថែមទៀត។ ជាពិសេសជួយបង្កើនប្រាក់ចំណូលជូនកសិករក្នុងវិស័យនេះតែម្តង។

ប្រធានមន្ទីរកសិកម្មខេត្តមណ្ឌលគិរីរូបនេះបានគូសបញ្ជាក់ថា បច្ចុប្បន្នខេត្តមណ្ឌលគិរីមានផ្ទៃដីដាំដុះដំណាំកាហ្វេសរុប ៣៦៤ហិកតា តែផ្ទៃដីដែលអាចប្រមូលផលបានមានប្រមាណ ៣៣០ហិកតា ហើយអាចទទួលបានទិន្នផលប្រមាណ៦០០តោនក្នុង១ឆ្នាំ។ បើតាមការបញ្ជាក់របស់លោក សុខ ឃាង កាហ្វេមណ្ឌលគិរីលក់ចេញក្នុងតម្លៃពី៨ពាន់ ទៅ១ម៉ឺនរៀលក្នុង១គីឡូក្រាម ហើយទិន្នផលកាហ្វេមណ្ឌលគិរីភាគច្រើនផ្គត់ផ្គង់តម្រូវការប្រើប្រាស់ក្នុងស្រុកតែប៉ុណ្ណោះ៕