បុរសខ្លាំងរដ្ឋចិន និងរុស្ស៊ីជួបប្រជុំគ្នាអំពីបញ្ហាសង្គ្រាមអ៊ុយក្រែននៅទីក្រុងសាម៉ាកាន់ ប្រទេសអ៊ូសបេគីស្ថាន

ដូចការគ្រោងទុកមែន មេដឹកនាំទាំងពីរកំពុងស្ថិតនៅក្នុងទីក្រុង Samarkand ដើម្បីចូលរួមកិច្ចប្រជុំរបស់អង្គការសហប្រតិបត្តិការសៀងហៃ (SCO) ដែលជាក្រុមសន្តិសុខក្នុងតំបន់អឺរ៉ាស៊ី ហើយបុគ្គលដ៏មានឥទ្ធិពលទាំងពីររូបនេះ មានប្រជុំត្រីភាគីជាមួយប្រធានាធិបតីម៉ុងហ្គោលី លោក យ៉ូខ្ញា ឃូរេលសុខ (Ukhnaa Khurelsukh) ផងដែរ។

ដោយឡែក រដ្ឋាភិបាលអ៊ូសបេគីស្ថានបាននិយាយថា «លោកពូទីនកំពុងធ្វើដំណើរទៅក្រុងសាម៉ាកាន់ ហើយត្រូវជួបជាមួយមេដឹកនាំអ៊ីរ៉ង់ កៀគីស្ថាន ប៉ាគីស្ថាន តួកមេននីស្ថាន និងអ៊ូសបេគីស្ថានផងដែរ។

នៅក្នុងសេចក្តីថ្លែងការណ៍រដ្ឋាភិបាលអ៊ូសបេគីស្ថាននោះដែរ លោក ពូទីន ក៏ត្រូវជួបជាមួយមេដឹកនាំនៃប្រទេសអាស៊ែបៃហ្សង់ ឥណ្ឌា និងតួកគីដូចគ្នា។

គួរជម្រាបថា លោក ពូទីន និងលោក ស៊ី បានជួបគ្នាពិភាក្សាអំពីបញ្ហាអ៊ុយក្រែន និងកោះតៃវ៉ាន់ នៅក្នុងកិច្ចប្រជុំដែលវិមានក្រឹមឡាំងចាត់ទុកថា «ជាចំណុចដ៏ពិសេស» នៅក្នុងស្ថានភាពភូមិសាស្ត្រនយោបាយបច្ចុប្បន្ន។

មែនទែនទៅ ភាពជាដៃគូ «គ្មានដែនកំណត់» ត្រូវបានគេមើលឃើញថា កាន់តែមានភាពស៊ីជម្រៅរវាងមហាអំណាចទើបរះ គឺប្រទេសចិន និងមហាអំណាចយោធា និងធនធានគឺប្រទេសរុស្ស៊ី ដែលវាជាការវិវត្តភូមិសាស្ត្រនយោបាយដ៏គួរឱ្យចាប់អារម្មណ៍បំផុតមួយក្នុងប៉ុន្មានឆ្នាំថ្មីៗនេះ ដែលបានធ្វើឲ្យប្រទេសបស្ចិមលោកមានការព្រួយបារម្ភកាន់តែខ្លាំងផងដែរ៕