របាយការណ៍មួយនេះ បានគូសបញ្ជាក់ថា ក្នុងចំណោមប្រទេសទាំង ៤ សុទ្ធតែទទួលបានផលប្រយោជន៍ពីសង្គ្រាមពាណិជ្ជកម្ម ដោយសារតែ បណ្តាក្រុមហ៊ុនចិន និងសាជីវកម្មអន្តរជាតិមួយចំនួន បានផ្លាស់ប្តូរមូលដ្ឋានផលិតរបស់ពួកគេ មកកាន់បណ្តាប្រទេស CLMV នេះ ដើម្បីគេចចេញពីការដំឡើងពន្ធរបស់អាមេរិក ទៅលើទំនិញចិនក៏ប៉ុន្តែក្នុងនោះ មានប្រទេសវៀតណាម ដែលអាចទទួលបានផលប្រយោជន៍ច្រើនជាងគេ ក្នុងរយៈពេលខ្លី។
មជ្ឈមណ្ឌលបញ្ញាវ័ន្តសេដ្ឋកិច្ចថៃ បញ្ជាក់ថា ជាលទ្ធផលការវិនិយោគដោយផ្ទាល់ពីបរទេស នៅក្នុងបណ្តាប្រទេស CLMV នឹងមានកំណើន ហើយបន្តរហូតដល់ឆ្នាំ ២០២០។
អត្ថបទទាក់ទង!
ទោះបីជាយ៉ាងណាក៏ដោយ បណ្តាប្រទេសនីមួយៗ សុទ្ធតែមានហានិភ័យរៀងៗខ្លួន ដែលកំពុងតែប្រឈមមុខនឹង ប្រភពមកពីក្នុងស្រុក និងកត្តាខាងក្រៅ។
តួយ៉ាងដូចជា ប្រទេសកម្ពុជា និងមីយ៉ាន់ម៉ា កំពុងប្រឈមនឹងការបាត់បង់ ប្រព័ន្ធអនុគ្រោះពន្ធ EBA ដោយសហភាពអឺរ៉ុប ហើយអាចនឹងបាត់បង់ សមត្ថភាពប្រកួតប្រជែងលើការនាំចេញ ក្នុងរយៈពេលមធ្យមផងដែរ។
ប្រទេសឡាវ ក៏មានវិបត្តិបំណុលធ្ងន់ធ្ងរ ខណៈដែរវៀតណាម អាចប្រឈមមុខនឹង ការដាក់ទណ្ឌកម្មរបស់អាមេរិក បើសិនជារតនាគារអាមេរិក ប្រកាសចាត់ទុកវៀតណាមជាកន្លែងលាងលុយ។
បើនិយាយពីភាពរីកចម្រើនវិញ គឺវៀតណាមរំពឹងនឹងរក្សាបាននូវកំណើនសេដ្ឋកិច្ច ៦,៧% ក្នុងឆ្នាំ ២០២០ខាងមុខ ជំរុញដោយការប្រើប្រាស់ក្នុងស្រុក និងការនាំចេញ ជាពិសេសគឺ កំណែទម្រង់គោលនយោបាយក្នុងស្រុកបានទាក់ទាញទាំងការវិនិយោគក្នុងស្រុក និងការវិនិយោគមកពីក្រៅប្រទេសថែមទៀតផង។
ដោយឡែកសម្រាប់ប្រទេសកម្ពុជា កំណើនសេដ្ឋកិច្ច គឺមានរង្វង់ ៦,៨% ក្នុងឆ្នាំ ២០២០ ដោយសារតែ ចំនួនភ្ញៀវទេសចរដែលចូលមកកម្សាន្ត និងការវិនិយោគពីក្រៅប្រទេស មានកំណើនយឺតជាងមុន ក៏ប៉ុន្តែ ស្ថានភាពសារពើពន្ធ និងការនាំចេញនៅតែខ្លាំង។
ទោះយ៉ាងណា អត្រាប្រឈមនៃការបាត់បង់ EBA របស់កម្ពុជា គឺនៅខ្ពស់ ហើយអាចប៉ះពាល់ដល់ ការនាំចេញទៅកាន់ទីផ្សារសហភាពអឺរ៉ុប ដែលជាទីផ្សារនាំចេញធំបំផុតរបស់កម្ពុជា។
កំណើនសេដ្ឋកិច្ចរបស់ប្រទេសជិតខាងយើង គឺប្រទេសឡាវ ក៏រំពឹងនឹងកើនដល់ ៦,៥% ក្នុងឆ្នាំ ២០២០នេះដែរ តែ ឡាវជាប្រទេសដែលជួបប្រទះនូវបញ្ហាធំៗជាច្រើន ដូចជា គ្រោះធម្មជាតិ ផលប៉ះពាល់ពីសង្គ្រាមពាណិជ្ជកម្ម និងភាពចុះខ្សោយនៃទំនាក់ទំនងពាណិជ្ជកម្មជាមួយចិន។
លើសពីនេះទៅទៀត ទុនបម្រុងបរទេសរបស់ឡាវ នៅមានកំណត់ ហើយការប្រមូលចំណូលពន្ធ ធ្វើមិនបានល្អនោះឡើយ យ៉ាងណាក្តី ឡាវរំពឹងស្តារសេដ្ឋកិច្ចតាមរយៈ ការកសាងហេដ្ឋារចនាសម្ព័ន្ធថ្មី និងគម្រោងវារីអគ្គិសនីបន្ថែមទៀត។
ចុងក្រោយបង្អស់គឺ
ប្រទេសមីយ៉ាន់ម៉ា ដែលរំពឹងនឹងរក្សាបានកំណើនសេដ្ឋកិច្ច ៦,៣% សម្រាប់ឆ្នាំ ២០២០
ហើយអ្វីដែលគួរឲ្យកត់សម្គាល់នោះគឺថា បញ្ហាកំណែទម្រង់នយោបាយក្នុងប្រទេសនេះ បានធ្វើឲ្យការវិនិយោគពីក្រៅប្រទេសធ្លាក់ចុះយ៉ាងច្រើន
និងប្រឈមនឹងការបាត់បង់ ប្រព័ន្ធអនុគ្រោះ EBA ដូចកម្ពុជាដែរ តែយ៉ាងណា មីយ៉ាន់ម៉ា
រំពឹងទទួលបានការវិនិយោគពី បណ្តាប្រទេសក្នុងតំបន់អាស៊ាន ដែលអាចជួយស្រោចស្រង់ស្ថានការណ៍ឡើងវិញបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
