យោងតាមនាយកដ្ឋានព័ត៌មាននៃរដ្ឋសភា សេចក្តីព្រាងច្បាប់ទំាងបីនោះ រួមមាន សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រដ្ឋាភិបាល ឱ្យក្រុមហ៊ុន រ៉ូយ៉ាល់ គ្រុប អ៊ិនវេសម៉ិន គ្រុប សម្រាប់គម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ៧០០មេហ្គាវ៉ាត់ នៅខេត្តកោះកុង។
សេចក្តីព្រាងច្បាប់មួយទៀត គឺការអនុម័តយល់ព្រមលើការធានាទូទាត់ ឱ្យក្រុមហ៊ុន ហាន សេង ខូល ម៉ាញ សម្រាប់គម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ២៦៥មេហ្គាវ៉ាត់ នៅខេត្តឧត្តរមានជ័យ។ នេះបើយោងតាមនាយកដ្ឋានព័ត៌មាននៃរដ្ឋសភា។
នាយកដ្ឋានព័ត៌មានដដែល បានបន្តថា ការអនុម័តយល់ព្រមមួយទៀត គឺការធានាទូទាត់ឱ្យក្រុមហ៊ុន ហាន សេង ខូល ម៉ាញ សម្រាប់គម្រោងវិនិយោគសាងសង់ខ្សែបណ្តាញបញ្ជូនអគ្គិសនីតង់ស្យុង ២៣០គីឡូវ៉ុល តភ្ជាប់ពីរោងចក្រអគ្គិសនីដុតធ្យូងថ្ម ខេត្តឧត្តរមានជ័យ មកអនុស្ថានីយសៀមរាបខាងកើត។
អត្ថបទទាក់ទង
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានប្រាប់រដ្ឋសភាទាំងមូលថា ទុនវិនិយោគសរុបគឺ ជាង ១៣០០លានដុល្លារអាមេរិក ហើយដំណាក់កាលដំបូងនៃគម្រោង នឹងត្រូវដាក់ឲ្យដំណើរការដំបូងនៅឆ្នាំ២០២៣ និងដំណាក់កាលទីពីរ ត្រូវដំណើរការនៅឆ្នាំ២០២៤។
រយៈពេលអាជីវកម្មនៃរោងចក្រនេះ គឺ ៣៥ឆ្នាំ។ នេះបើយោងតាម លោករដ្ឋមន្ត្រី ស៊ុយ សែម។
ការអនុម័តសេចក្តីព្រាងច្បាប់ទាំងនេះ បានកើតឡើងបន្ទាប់ពីកម្ពុជាប្រកាសថា នឹងមិនអភិវឌ្ឍទំនប់វារីអគ្គិសនីថ្មីនៅលើដងទន្លេមេគង្គទៀតទេ ក្នុងរយៈពេល១០ឆ្នាំខាងមុខ ហើយនឹងពិនិត្យឡើងវិញនូវគោលនយោបាយជាតិរបស់ខ្លួន ក្នុងការស្វែងរកថាមពលពីធ្យូងថ្ម ឧស្ម័នធម្មជាតិ និងព្រះអាទិត្យវិញ៕
