តាមគម្រោងផ្លូវជាតិដែលមានប្រវែងសរុបជាង៧២គីឡូម៉ែត្រនេះ គ្រោងបញ្ចប់នៅអំឡុងខែមេសា ឆ្នាំ២០២២ ក្រោយបើកការដ្ឋានសាងសង់កាលពីអំឡុងខែកុម្ភៈ ឆ្នាំ២០២០ ប៉ុន្ដែ កន្លងមកក្រុមហ៊ុនសាងសង់ផ្លូវនេះ មានការរអាក់រអួលលើការងារសាងសង់មែនទែន ហើយរដ្ឋមន្ត្រីក្រសួងសាធារណៈការ ឯកឧត្តម ស៊ុន ចាន់ថុល ក៏ធ្លាប់ព្រមានពីការសាងសង់យឺតយ៉ាវរបស់ក្រុមហ៊ុននេះផងដែរ។
នាកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២១ និងលើកទិសដៅអនុវត្តសម្រាប់ឆ្នាំ២០២២ នាថ្ងៃទី៩ ខែកុម្ភៈ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណ និងដឹកជញ្ជូនបានគូសបញ្ជាក់ថា ក្រុមហ៊ុនកូរ៉េខាងត្បូង Hasan Engineering & Constructions បានស្នើសុំពន្យារពេល៤ខែបន្ថែមទៀត ក្នុងការស្ថាបនាផ្លូវជាតិលេខ២ និងលេខ២២។ ប៉ុន្តែឯកឧត្តមអះអាងថា ក្រសួងមិនទាន់ឯកភាពលើសំណើនេះនៅឡើយទេ និងកំពុងចាត់ឲ្យមន្ត្រីជំនាញចុះសិក្សាពីបច្ចេកទេស និងមូលហេតុលម្អិតនៃការសុំពន្យារពេលនេះ។
ជាមួយគ្នានេះ ឯកឧត្តមទេសរដ្ឋមន្ត្រី ក៏បានលើកឡើងពីភាពយឺតយ៉ាវក្នុងការសាងសង់ផ្លូវជាតិលេខ២ និងលេខ២២ ពីសំណាក់ក្រុមហ៊ុននេះ ដែលកំពុងធ្វើឲ្យមានការបង្ហោះការរិះគន់តាមបណ្តាញសង្គម។ ឯកឧត្តមបានគូសបញ្ជាក់ថា កត្តាដែលធ្វើឲ្យការសាងសង់មានភាពយឺតយ៉ាវនេះគឺដោយសារក្រុមហ៊ុនមិនបានដាក់គ្រឿងចក្រ និងសម្ភារៈក្នុងការសាងសង់ផ្លូវជាតិទាំងពីរនេះទេ។
អត្ថបទទាក់ទង
ជុំវិញការស្ថាបនាផ្លូវជាតិលេខ២ និងលេខ២២នេះ ឯកឧត្តម ហេង រដ្ឋពិសិដ្ឋ អគ្គនាយកនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូនធ្លាប់បានបញ្ជាក់ប្រាប់ខេមបូណូមីសថា ការស្ថាបនាផ្លូវជាតិទាំងពីរអាចមានភាពយឺតយ៉ាវជាងផែនការ២០%។ ឯកឧត្តមបានគូសបញ្ជាក់ថា ភាពយឺតយ៉ាវនេះ គឺដោយសារក្រុមហ៊ុនសាងសង់ខ្វះគ្រឿងចក្រ គួបផ្សំមានបញ្ហាអាកាសធាតុ និងការដោះស្រាយសំណងជូនប្រជាពលរដ្ឋមានភាពយឺតយ៉ាវជាដើម។
ផ្អែកលើការស្នើសុំពន្យារពេលខាងលើ ការបញ្ចប់ការស្ថាបនាផ្លូវជាតិលេខ២ និងលេខ២២ នឹងត្រូវអូសបន្លាយរហូតដល់ខែសីហា ខណៈតាមគម្រោងគ្រោងបញ្ចប់នៅត្រឹមខែមេសា ឆ្នាំ២០២២ នេះ។ ផ្លូវជាតិទាំងពីរខ្សែនេះបានបើកការដ្ឋានសាងសង់កាលពីថ្ងៃទី១១ ខែកុម្ភៈ ឆ្នាំ២០២០ ក្រោមវត្តមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
ផ្លូវជាតិលេខ២ និង២២ មានប្រវែងសរុបជាង ៧២ គីឡូម៉ែត្រ ដោយគ្រោងចំណាយថវិកាសាងសង់ប្រមាណជាង ៥៦លានដុល្លារអាមេរិក ក្រោមហិរញ្ញប្បទានពីប្រទេសកូរ៉េខាងត្បូង និងថវិកាបដិភាគរបស់រាជរដ្ឋាភិបាលកម្ពុជា និងគ្រោងចំណាយពេលសាងសង់ចំនួន៣០ខែ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
