នៅក្នុងលិខិតផ្ញើទៅកាន់ប្រធានាធិបតីចិន Xi Jinping មេដឹកនាំកូរ៉េខាងជើង លោក គីម ជុងអុន បាននិយាយថា ទំនាក់ទំនងរវាងប្រទេសទាំងពីរមានសារៈសំខាន់ណាស់ក្នុងការប្រឈមមុខនឹងកម្លាំងអមិត្តពីខាងក្រៅ ស្របពេលប្រធានាធិបតីចិន វិញបានសន្យាថានឹងជំរុញឲ្យមានសហប្រតិបត្តិការឈានដល់ដំណាក់ថ្មី១ទៀត។
ប្រទេសចិនត្រូវបានមើលឃើញថា ជាសម្ព័ន្ធមិត្តចាក់ទឹកមិនលិចរបស់កូរ៉េខាងជើង ចាប់តាំងពីចុះសន្ធិសញ្ញាទ្វេភាគីកាលពីឆ្នាំ ១៩៦១ មក ហើយទណ្ឌកម្មអន្តរជាតិប្រឆាំងអាវុធនុយក្លេអ៊ែរ និង កម្មវិធីគ្រាប់ម៉ីស៊ីល បានធ្វើឲ្យទីក្រុងព្យុងយ៉ាងពឹងផ្អែកទាំងស្រុងលើប្រទេសចិន សម្រាប់ពាណិជ្ជកម្ម និង សេដ្ឋកិច្ច។
អត្ថបទគួរអាន
បើតាមភ្នាក់ងារព័ត៌មានរដ្ឋកូរ៉េខាងជើង KCNA លោក Kim មានប្រសាសន៍ថា ថ្វីបើស្ថានការណ៍អន្តរជាតិកាន់តែ ស្មុគស្មាញនាពេលបច្ចុប្បន្ននេះ ក៏មិត្តភាពខាងវិស័យយោធា និង ទំនុកចិត្តរវាងប្រទេសទាំងពីរ គឺកូរ៉េខាងជើង និងចិន កាន់តែរឹងមាំពីមួយថ្ងៃ ទៅមួយថ្ងៃ។
លោក គីម បន្ថែមទៀត សន្ធិសញ្ញានេះ បានការពារលទ្ធិសង្គមនិយម និង សន្តិភាពនៅអាស៊ី ប្រឈមមុខនឹងកម្លាំងបច្ចាមិត្តដែលចង់បំផ្លិចបំផ្លាយប្រទេសទាំងពីរ។
ក្នុងលិខិតដដែលនេះ បានលើកឡើងថា លោកប្រធានាធិបតី ចិន លោក ស៊ី ជិនពីង មានផែនការផ្តល់នូវសុភមង្គលដ៏អស្ចារ្យដល់ប្រជាជនទាំងពីរ ដោយពង្រឹងទំនាក់ទំនងទ្វេភាគី និង ពង្រឹងសហប្រត្តិការឈានដល់កម្រិតថ្មីបន្ថែមទៀត៕
អត្ថបទ៖ សុខ សិទ្ធិការ្យ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
