ក្នុងចំណោមអ្នកឆ្លងវីរុសបំប្លែងថ្មដែលបានរកឃើញចុងក្រោយនេះ ភាគច្រើនជាអ្នកដំណើរត្រឡប់មកពីប្រទេសថៃ និងជាបុគ្គលិកបម្រើការក្នុងវិស័យសុខាភិបាល។
សេចក្ដីជូនព័ត៌មានរបស់ក្រសួងសុខាភិបាលបានឱ្យដឹងថា យោងតាមលទ្ធផលនៃការវិភាគដោយវិទ្យាស្ថានប៉ាស្ទ័រកម្ពុជានៅថ្ងៃទី៣១ ខែកក្កដា កម្ពុជាបានរកឃើញវីរុសបំប្លែងថ្មី ឌែលតា ចំនួន៤៣នាក់ ដោយក្នុងនោះជាអ្នកដំណើរត្រឡប់មកពីប្រទេសថៃ ចំនួន ៣៩នាក់ ។ ចំណែក៤ករណីទៀត គឺជាការឆ្លងក្នុងសហគមន៍ ត្រូវបានរកឃើញលើប្រជាពលរដ្ឋរស់នៅក្នុងខេត្តឧត្តរមានជ័យ ។
ដោយឡែកនៅថ្ងៃទី១ ខែសីហានេះបានបន្តរកឃើញករណីវីរុសបំប្លែងថ្មីឌែលតា ចំនួន៦៦ករណីបន្ថែម។ ក្នុងនោះ មានអ្នកដំណើរមកពីប្រទេសថៃចំនួន ៥១នាក់ និងប្រជាពលរដ្ឋក្នុងសហគមន៍ចំនួន ២នាក់។ ខណៈបុគ្គលិកសុខាភិបាលខេត្តឧត្តរមានជ័យចំនួន ៩នាក់បន្ថែមទៀតត្រូវបានរកឃើញករណីបំប្លែងថ្មីនេះដែរ។
អត្ថបទទាក់ទង
អ្វីដែលគួរឱ្យកត់សម្គាល់ ការវីរុសថ្មីឌែលតានេះបានកំពុងចរាចរក្នុងភូមិសាស្ត្ររាជាធានីភ្នំពេញហើយ ដោយនៅថ្ងៃទី ៣១ ខែកក្កដារកឃើញ១ករណី ជាពលករមកពីប្រទេសថៃ។ ដោយឡែក នៅថ្ងៃទី ០១ ខែសីហា រកឃើញ៤ករណីទៀត ក្នុងនោះ មាន ១ករណីកើតលើអ្នកជំងឺមកមន្ទីរពេទ្យកាល់ម៉ែត្រ ខាងរោគស្ត្រី, ២ករណីទៀតកើតលើអ្នកអនាម័យម្នាក់ និងអ្នកជំងឺផ្នែកសង្គ្រោះបន្ទាន់ម្នាក់នៅមន្ទីរពេទ្យរុស្ស៊ី និង១ករណីទៀត កើតលើអ្នកដំណើរបរទេសពីប្រទេសម៉ាឡេស៊ី។
បើតាមក្រសួងសុខាភិបាល គិតមកត្រឹមថ្ងៃទី១ ខែសីហា កម្ពុជាបានរកឃើញករណីវិជ្ជមានមេរោគបំប្លែងថ្មី ឌែលតា សរុប២២៣ករណីហើយ។
គួរជ្រាបថា ស្ថានភាពឆ្លងកូវីដ-១៩នៅកម្ពុជាកំពុងឈានទៅរកកឆ្លងទ្រង់ទ្រាយធំ ខណៈដែលវត្តមានមេរោគបំប្លែងថ្មី ឌែលតា ដែលត្រូវបានរកឃើញនៅកម្ពុជាជាបន្តបន្ទាប់ៗ។ ក្រសួងសុខាភិបាល បានគូសបញ្ជាក់ថា សូមឱ្យប្រជាពលរដ្ឋទាំងអស់ត្រូផ្លាស់ប្ដូរទម្លាប់រស់នៅរបស់ខ្លួនតាមគន្លងថ្មី ក្នុងបរិបទប្រយុទ្ធនឹងឌំងឺកូវីដ១៩ និងតែប្រុងប្រយ័ត្នឱ្យបានខ្ពស់ និងអនុវត្តឱ្យបានខ្ជាប់ខ្ជួន នូវវិធានការ ៣ការពារ និង៣កុំដើម្បីទប់ស្កាត់ការឆ្លងរីករាលដាននៃជម្ងឺកូវីដ-១៩៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
