ការសិក្សាដែលត្រូវបានចេញផ្សាយដោយមជ្ឈមណ្ឌលឯកទេសខាងជំងឺឆ្លងពិភពលោកនេះ (The Lancet Infectious Diseases) គឺផ្អែកលើទិន្នន័យពីប្រទេស និងតំបន់ចំនួន ១៨៥ ដែលប្រមូលចាប់ពីថ្ងៃទី ៨ ខែធ្នូ ឆ្នាំ ២០២០ ដល់ថ្ងៃទី ៨ ខែធ្នូ ឆ្នាំ ២០២១។
ជាការពិត អ្នកជំនាញបានរកឃើញថា វ៉ាក់សាំងកូវីដ១៩ បានជួយសង្គ្រោះជីវិតមនុស្សជិត ២០ លាននាក់ពីការស្លាប់ ក្នុងចំណោមការអ្នកមានអត្រាការស្លាប់ខ្ពស់ចំនួនជិត ៣២ លាននាក់ដែលឆ្លងជំងឺកូវីដ១៩។
យ៉ាងណាមិញ ការសិក្សាវិភាគនេះ ត្រូវបានប្រៀបធៀបជាមួយនឹងសេណារីយ៉ូដែលអ្នកឆ្លងកូវីដ១៩ មិនមានវ៉ាក់សាំង។ ទោះជាបែបនេះក្តី ប្រទេសចិនមិនត្រូវបានរាប់បញ្ចូលក្នុងការសិក្សានោះទេ ដោយសារតែប្រទេសនេះមានចំនួនប្រជាជនច្រើន និងវិធានការទប់ស្កាត់តឹងរ៉ឹពេក ដែលនឹងធ្វើឱ្យប៉ះពាល់ដល់លទ្ធផលស្រាវជ្រាវ។
មួយវិញទៀត ការសិក្សានេះបានរាប់បញ្ចូលពីភាពខុសប្លែកគ្នានៃអត្រាការចាក់វ៉ាក់សាំងបង្ការនៅពីប្រទេសមួយទៅប្រទេសមួយ ក៏ដូចជាភាពខុសគ្នានៃប្រសិទ្ធភាពនៃវ៉ាក់សាំង ដោយផ្អែកលើប្រភេទវ៉ាក់សាំងដែលគេស្គាល់ថា ត្រូវបានប្រើប្រាស់ជាចម្បងនៅក្នុងប្រទេសនីមួយៗផងដែរ។
អត្ថបទគួរអាន
បន្ថែមពីនេះទៀត ការស្លាប់ជិត ៦០ ម៉ឺននាក់ទៀតក៏អាចត្រូវបានជួយសង្គ្រោះបានទាន់ពេលដែរ ប្រសិនបើអង្គការសុខភាពពិភពលោក (WHO) បានសម្រេចគោលដៅក្នុងការចាក់វ៉ាក់សាំងបាន៤០% នៃចំនួនប្រជាជនរបស់ប្រទេសនីមួយៗនៅត្រឹមចុងឆ្នាំ ២០២១នោះ ប៉ុន្ដែ វាមិនដូច្នេះទេ ព្រោះប្រទេសមួយចំនួនមានការចាក់វ៉ាក់សាំងយឺតយ៉ាវ ដែលធ្វើឲ្យករណីឆ្លង និងស្លាប់កើនឡើងច្រើនពិបាកគ្រប់គ្រង។
យោងតាមអង្គការសុខភាពពិភពលោក បានឱ្យដឹងថា ជំងឺកូវីដឆ្លង១៩ បានសម្លាប់មនុស្សជាង ៦លាន ៣ សែននាក់ជាផ្លូវការនៅទូទាំងពិភពលោក ខណៈអ្នកឆ្លងសរុបមានជាង៥៤០លាននាក់ហើយ គិតមកទល់ពេលនេះ។
ប៉ុន្តែអង្គការនេះបាននិយាយកាលពីខែមុនថា ចំនួនអ្នកស្លាប់ពិតប្រាកដអាចមានដល់ទៅ ១៥ លាននាក់ឯណោះ នៅពេលដែលមានការឆ្លងដោយផ្ទាល់ និងដោយប្រយោលទាំងអស់ត្រូវបានរាប់បញ្ចូលគ្នានោះ។
ទោះបីជាបច្ចុប្បន្ន ករណីស្លាប់ដោយសារកូវីដ១៩ហាក់មានការធ្លាក់ចុះក៏ដោយ ប៉ុន្ដែ ជំងឺនេះកំពុងកើនឡើងម្តងទៀតនៅតំបន់ខ្លះនៃពិភពលោក រួមទាំងនៅអឺរ៉ុប ដែលកំពុងឃើញការកើតឡើងវិញនៃការឆ្លងកូវីដ១៩បម្លែងខ្លួនថ្មីOmicron ចំពេលដែលអាកាសធាតុកំពុងឡើងកម្ដៅ៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
