លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានអះអាងថា នៅឆ្នាំ២០២០នេះ ការនាំចេញអង្កររបស់កម្ពុជា អាចនឹងសម្រេចតាមផែនការដែលបានកំណត់កាលពីដើមឆ្នាំ ដោយមានកំណើនក្នុងចន្លោះ ២០ ទៅ៣០ភាគរយ ពោលគឺអាចនឹងសម្រេចបានការនាំចេញសរុបក្នុងរង្វង់៧០ម៉ឺនតោន។
តួលេខនាំចេញអង្កររបស់កម្ពុជា សម្រាប់រយៈពេល៩ខែដំបូង នៃឆ្នាំ២០២០នេះ បានបង្ហាញទៀតថា ប្រាក់ចំណូលដែលបានពីការនាំចេញអង្ករ សម្រេចបានដល់ទៅជិត ៣២៨ លានដុល្លារអាមេរិក។
ទោះយ៉ាងណា បើមើលទៅលើតួលេខនាំចេញប្រចាំខែវិញ ឃើញថា នៅរយៈពេល២ខែចុងក្រោយ ពោលគឺខែ សីហា និងកញ្ញាកន្លងទៅ គឺមានការថយចុះគួរឲ្យកត់សម្គាល់។ តួយ៉ាង នៅខែសីហា ឆ្នាំ២០២០ សម្រេចបានការនាំចេញអង្ករជាង២ម៉ឺន២ពាន់តោន ធ្លាក់ចុះ ជាង១ម៉ឺន២ពាន់តោន ធៀបនឹងខែសីហាឆ្នាំមុន។ រីឯ ខែកញ្ញាឆ្នាំ២០២០វិញ នាំចេញបានជាង៤ម៉ឺនតោន ធ្លាក់ចុះ ដល់ទៅប្រមាណ ២ម៉ឺន៥ពាន់តោន ធៀបនឹងរយៈពេលដូចគ្នាកាលពីឆ្នាំមុន។
អត្ថបទទាក់ទង!
លោក លន់ យ៉េង បានពន្យល់ពីការថមថយចុះនូវចំនួនការនាំចេញ អង្ករនៅរយៈពេល ២ខែចុងក្រោយនេះថា ដោយសារតែ អំឡុងពេលកន្លងមកនេះ មានថ្ងៃការឈប់សម្រាកច្រើនដូចជា បុណ្យភ្ជុំបិណ្ឌជាដើម គួបផ្សំនឹងបញ្ហាអាកាសធាតុភ្លៀងធ្លាក់មិនគ្រប់គ្រាន់ដែលធ្វើឲ្យប៉ះពាល់ដល់ការប្រមូផលស្រូវផងដែរ។
យ៉ាងណាក៏ដោយចុះ លោក លន់ យ៉េង អះអាងថា បើមើលជារួមការនាំចេញអង្ករ ៩ខែ នៅតែរក្សាបានកំណើនល្អដដែលទេ ហើយសហព័ន្ធស្រូវអង្ករសង្ឃឹមថា ចាប់ពីខែតុលានេះតទៅការនាំចេញ នឹងវិលមករកសភាពធម្មតាវិញ។
តាមតួលេខពីសហព័ន្ធស្រូវអង្ករកម្ពុជា បានឲ្យដឹងថា ក្នុងរយៈពេល៩ខែ ឆ្នាំ២០២០នេះ ការនាំចេញអង្កររបស់កម្ពុជាទៅកាន់ទីផ្សារលើសកល នៅក្នុងចំណោមចំណែកទិសដៅ គឺប្រទេសចិនបានកាន់កាប់ចំណែកទីផ្សារ ៣៥% ដែលមានចំនួនជាង១៧ម៉ឺនតោន, ទីផ្សារសហគមន៍អឺរ៉ុប (រួមទាំងអង់គ្លេស) ឈរនៅលំដាប់ទី២ មានចំណែកទីផ្សារ ៣៣% ដែលមានបរិមាណ ជាង ១៦ ម៉ឺនតោន ក្នុងនោះប្រទេសបារាំងជាទីផ្សារធំជាងគេ មានចំណែក ១៣% នៃទីផ្សារសរុប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
