ចក្រភពអង់គ្លេសដែលរងគ្រោះដោយវិបត្តិសេដ្ឋកិច្ច ត្រូវការកម្លាំងពលកម្មចំណាកស្រុកបន្ថែមទៀតដើម្បីស្ដារកំណើន

ចក្រភពអង់គ្លេសត្រូវការកម្លាំងពលកម្មចំណាកស្រុកបន្ថែមទៀត ដើម្បីបង្កើនផលិតភាពការងារ ខណៈដែលប្រទេសនេះប្រឈមមុខនឹងការលាយឡំគ្នាយ៉ាងស្មុគស្មាញរវាងការកើនឡើងនូវអតិផរណា និងការធ្លាក់ចុះកំណើនសេដ្ឋកិច្ច។ នេះបើតាមក្រុមសម្របសម្រួលអាជីវកម្មសំខាន់របស់ប្រទេសនេះ បានព្រមានឡើងកាលពីថ្ងៃចន្ទ និងត្រូវបានចុះផ្សាយដោយប្រព័ន្ធផ្សព្វផ្សាយធំៗជាច្រើននៅថ្ងៃនេះ។

ការវិនិច្ឆ័យរបស់សហព័ន្ធឧស្សាហកម្មអង់គ្លេស (CBI) អំពីតម្រូវការកម្លាំងពលកម្មចំណាកស្រុកបន្ថែមសម្រាប់រុញកំណើនផលិតភាពការងាររបស់អង់គ្លេសនេះ បានធ្វើឡើងនៅឯកិច្ចប្រជុំប្រចាំឆ្នាំរបស់ខ្លួនមួយនៅទីក្រុងប៊ឺមីងហេម (Birmingham) ដែលជាទីក្រុងធំបំផុតទី២របស់ចក្រភពអង់គ្លេស ហើយកិច្ចប្រជុំនេះទៀតសោត បានកើតឡើងបន្ទាប់ពី រាជរដ្ឋាភិបាលរបស់នាយករដ្ឋមន្ត្រីអង់គ្លេសលោក រីស៊ី ស៊ូណាក់ កាលពីសប្ដាហ៍មុនបានកាត់បន្ថយចំណាយ និងបានដំឡើងពន្ធក្នុងកញ្ចប់ថវិកា បើទោះជាបានសារភាពថា ប្រទេសដែលរងគ្រោះដោយអតិផរណាមួយនេះ បាននិងកំពុងធ្លាក់ចូលក្នុងវិបត្តិសេដ្ឋកិច្ចក៏ដោយ។

លោក តូនី ដេនឃឺ (Tony Danker) អគ្គនាយកសហព័ន្ធឧស្សាហកម្មអង់គ្លេស CBI បានប្រាប់ក្រុមប្រតិភូនៅទីក្រុងប៊ឺមីងហេមនៅភាគកណ្តាលប្រទេសអង់គ្លេសថា ពួកគេបានជួបជុំគ្នាជាថ្មីទៀតនៅក្នុងពេលវេលាមិនធម្មតា ហើយថា អង់គ្លេសស្ថិតនៅចំកណ្ដាលនៃការជាប់គាំងអតិផរណា ដែលចេះតែកើនឡើង និងកំណើនអវិជ្ជមានជាលើកដំបូង។

អតិផរណាចក្រភពអង់គ្លេសបានស្ថិតនៅក្នុងកម្រិតខ្ពស់បំផុត ១១,១% ដែលជាការកើនឡើងដល់កំពូលមិនធ្លាប់មានក្នុងរយៈពេល ៤១ ឆ្នាំមកនេះ ធ្វើឱ្យតម្លៃអាហារ និងថាមពលកើនឡើងយ៉ាងគំហុក ក្រោយពីមានការផ្ទុះឡើងនូវសង្គ្រាមអ៊ុយក្រែន។

តម្លៃទំនិញប្រើប្រាស់បានឡើងថ្លៃខ្ពស់ មួយផ្នែកក៏ដោយសារតម្រូវការស្ទុះងើបឡើងវិញ បន្ទាប់ពីការដកវិធានការបិទខ្ទប់ដោយសារជំងឺរាតត្បាតកូវីដ១៩។ ប្រការនោះបានធ្វើឱ្យវិបត្តិនៃការចំណាយសម្រាប់ការរស់នៅកាន់តែអាក្រក់ទៅៗសម្រាប់ក្រុមហ៊ុន និងពលរដ្ឋដែលបានរងផលប៉ះពាល់រួចទៅហើយដោយការដំឡើងអត្រាការប្រាក់ ខណៈដែលធនាគារកណ្តាលអង់គ្លេសបានព្យាយាមកាត់បន្ថយអតិផរណាដ៏សែនពិបាកគ្រប់គ្រងនេះ។

ចក្រភពអង់គ្លេសបានព្យាករថាសេដ្ឋកិច្ចរបស់ខ្លួននឹងធ្លាក់ចុះ ១,៤% នៅឆ្នាំក្រោយ ហើយផលប៉ះពាល់សេដ្ឋកិច្ចទាំងនោះ មួយផ្នែកក៏ដោយសារតែការចាកចេញរបស់អង់គ្លេសពីសហភាពអឺរ៉ុបរបស់អង់គ្លេស (Brexit) ដ្បិតថា វាបានធ្វើឱ្យកម្មករបរទេសត្រឡប់ទៅប្រទេសរបស់ពួកគេវិញ។

លោក តូនី ដេនឃឺ (Tony Danker) អគ្គនាយកសហព័ន្ធឧស្សាហកម្មអង់គ្លេសគូសបញ្ជាក់ថា ម៉ោងធ្វើការមានការកើនឡើងកាន់តែច្រើន ដោយសារអន្តោប្រវេសន៍កាន់តែច្រើន ហើយថាមនុស្សកំពុងជជែកតវ៉ាប្រឆាំងនឹងរឿងជនអន្តោប្រវេសន៍នេះ ប៉ុន្តែ វាជាកត្តាតែមួយគត់ដែលបានបង្កើនសក្តានុពលកំណើនរបស់អង់គ្លេសចាប់តាំងពីខែមីនាមក។

យ៉ាងណាក៏ដោយចុះ លោក ស៊ូណាក់ ថា លោកយល់ស្របពីការអំពាវនាវរបស់សហព័ន្ធ CBI សម្រាប់ការងារចំណាកស្រុកស្របច្បាប់បន្ថែមទៀត ប៉ុន្តែលោកមិនយល់ស្របចំពោះការធ្វើចំណាកស្រុកខុសច្បាប់នោះទេ៕

អត្ថបទ៖ សុខ ជា