ការអះអាងរបស់ថ្នាក់ដឹកនាំផ្សារមូលបត្រកម្ពុជា យ៉ាងដូច្នេះ គឺបន្ទាប់ពីថ្មីៗនេះ ទើបតែមានក្រុមហ៊ុនក្នុងវិស័យ SME ថ្មីមួយទើបទទួលបានភ្លើងខៀវពីនិយ័តករមូលបត្រកម្ពុជា និងរំពឹងថា ក្រុមហ៊ុននេះ នឹងចូលគោះជួងបោះផ្សាយលក់ភាគហ៊ុនរបស់ខ្លួននៅខែក្រោយនេះ។
អគ្គនាយកក្រុមហ៊ុនផ្សារមូលបត្រកម្ពុជា ឯកឧត្តម ហុង សុហួរ បានលើកឡើងថា ផ្សារមូលបត្រកម្ពុជា មិនត្រឹមតែជាច្រកសម្រាប់ក្រុមហ៊ុនធំៗអាចប្រមូលប្រភពទុនពីទីផ្សារបានប៉ុណ្ណោះទេ ប៉ុន្ដែ ក៏ជាកន្លែងមួយសម្រាប់ក្រុមហ៊ុនខ្នាតតូច និងមធ្យមដែលមានសក្ដានុពលគួរតែសម្លឹងមើល ដើម្បីធ្វើពិពិធកម្មប្រភពទុនរបស់ខ្លួនបន្ថែម សម្រាប់ការពង្រឹង និងពង្រីកអាជីវកម្មស្របទៅតាមបរិបទនាពេលបច្ចុប្បន្ននេះ។
សូមបញ្ជាក់ថា ថ្មីនេះ ក្រុមហ៊ុន ឌី ប៊ី ឌី អ៊ិនជីនារីង ដែលជាក្រុមហ៊ុនពហុមុខងារក្នុងវិស័យវិស្វកម្ម និងសំណង់ ទើបតែបានទទួលបានភ្លើងខៀវពីនិយ័តករមូលបត្រកម្ពុជា និងបានរៀបចំកម្មវិធីរ៉ូដសូរបស់ខ្លួនថ្មីៗនេះ មុនឈានទៅគោះជួងបោះផ្សាយលក់ភាគហ៊ុននៅក្នុងផ្សារមូលបត្រកម្ពុជានៅខែក្រោយ។ ក្រុមហ៊ុនមួយនេះ ក៏ជាក្រុមហ៊ុនមួយដំបូងគេ ក្នុងវិស័យសហគ្រាសខ្នាតតូច និងមធ្យម ដែលនឹងបោះផ្សាយលក់ភាគហ៊ុនក្នុងផ្សារមូលបត្រកម្ពុជាផងដែរ ដោយរំពឹងថា នឹងប្រមូលបានដើមទុនជិត៤លានដុល្លារអាមេរិកពីទីផ្សារ។
អត្ថបទទាក់ទង!
ឯកឧត្តម ស៊ូ សុជាតិ អគ្គនាយកនិយ័តករមូលបត្រកម្ពុជា បានលើកឡើងថា វត្តមានរបស់ក្រុមហ៊ុន ឌីប៊ីឌី អ៊ិនជីនារីងនេះ នឹងក្លាយជាគំរូមួយ សម្រាប់ក្រុមហ៊ុនក្នុងវិស័យសហគ្រាសខ្នាតតូច និងមធ្យមដទៃទៀត អាចមើលឃើញពីឱកាសស្វែងរកប្រភពទុនពីផ្សារមូលបត្រកម្ពុជា។
សូមបញ្ជាក់ថា បច្ចុប្បន្ន ផ្សារមូលបត្រកម្ពុជាមានក្រុមហ៊ុនចុះបញ្ជីសរុបចំនួន ១៣ ក្រុមហ៊ុន ក្នុងនោះ មាន៧ក្រុមហ៊ុនចុះបញ្ជីលក់ភាគហ៊ុន និង៦ក្រុមហ៊ុនទៀតចុះបញ្ជីលក់សញ្ញាបណ្ណ ឬបណ្ណបំណុល។ ក្រុមហ៊ុនទាំងអស់នេះ ប្រមូលទុនពីទីផ្សារមូលបត្រសរុបជាង ២៥៣លានដុល្លារអាមេរិក។
បើតាមការអះអាងរបស់ឯកឧត្តម ហុង សុហួរ បើទោះបីជាមួយរយៈមកនេះ មានការផ្ទុះរាលដាលកូវីដ-១៩ខ្លាំងយ៉ាងណាក្ដី ប៉ុន្ដែ សកម្មភាពជួញដូរលើទីផ្សារភាគហ៊ុននៅតែកំណើនគួរឲ្យកត់សម្គាល់។ ជាក់ស្ដែង នៅត្រឹមឆមាសទី១ ឆ្នាំ២០២០១ បរិមាណជួញដូរជាមធ្យមបានកើនឡើងដល់ ១១ម៉ឺនភាគហ៊ុនក្នុងមួយថ្ងៃ កើនជាង ១៣៥% ធៀបកាលពីឆ្នាំ២០២០។ ជាមួយគ្នានេះ ទំហំជួញដូរភាគហ៊ុន ជាមធ្យម កើនឡើងប្រមាណ៧០%។ តាមការរំពឹងទុករបស់ឯកឧត្តម ហុង សុហួរ នៅឆ្នាំ២០២១ ក្រុមហ៊ុនផ្សារមូលបត្រកម្ពុជានឹងទទួលបានក្រុមហ៊ុនចុះបញ្ជីលក់ភាគហ៊ុនចំនួន ៤ ទៅ៥ក្រុមហ៊ុន និងក្រុមហ៊ុនចុះបញ្ជីជាសញ្ញាបណ្ណ ប្រមាណ ២ ទៅ៣ក្រុមហ៊ុនបន្ថែមទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
