អ្នកប្រើប្រាស់ជា ៤០ម៉ឺននាក់ បានស្នើសុំឥណទានតាមប្រព័ន្ធឌីជីថលរបស់ធនាគារអេស៊ីលីដា

លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា កត់សម្គាល់ឃើញថា ចាប់ពីឆ្នាំ២០២០ ចំនួនអ្នកស្នើសុំឥណទានតាមបញ្ជរ ឬទីភ្នាក់ងារទូទាំងប្រទេសរបស់ធនាគារអេស៊ីលីដា មិនសូវមាននោះទេ។ ការធ្លាក់ចុះនេះ គឺបន្ទាប់ពីអតិថិជនភាគច្រើនបានងាកមកប្រើប្រាស់សេវាស្នើសុំឥណទានតាមឌីជីថល ព្រោះវាមានភាពងាយស្រួល មិនស្មុគស្មាញ និងចំណាយពេលវេលាតិច។

បើតាមលោកបណ្ឌិត អ៊ិន ចាន់នី គិតចាប់ពីឆ្នាំ២០២០ មកទល់បច្ចុប្បន្ន ចំនួនអ្នកស្នើសុំឥណទានតាមអេឡិចត្រូនិករបស់ ធនាគាអេស៊ីលីដា មានកំណើន៤០ម៉ឺននាក់ ដែលជាចំនួនច្រើនបំផុតមិនធ្លាប់មាន។ ការកើនឡើងចំនួនអ្នកស្នើសុំឥណទានតាមឌីជីថលនេះ គឺក្រោយពេលធនាគារអេស៊ីដាបានខិតខំអភិវឌ្ឍនផលិតផល និងសេវាកម្មឌីជីថលជាបន្តបន្ទាប់ក្នុងការបម្រើអតិថិជន ឲ្យស្របតាមការរីកចម្រើននៃវិស័យបច្ចេកវិទ្យាហិរញ្ញវត្ថុ។ 

លោកបណ្ឌិត អ៊ិន ចាន់នី បានគូសបញ្ជាក់បន្ថែមថា ចំនួនអ្នកប្រើប្រាស់ប្រព័ន្ធឌីជីថលរបស់ធនាគារអេស៊ីលីដាបច្ចុប្បន្នមានរហូតដល់៩៤% ខណៈអ្នកប្រើប្រាស់សេវាទីភ្នាក់ងារ និងបញ្ជរមានតែ៦% តែប៉ុណ្ណោះ។ ទោះបីយ៉ាងនេះក្តី លោកបណ្ឌិត អ៊ិន ចាន់នី អះអាងថា ធនាគារអេស៊ីលីដានឹងបន្តពង្រីកការិយាល័យនៅតាមរាជធានីខេត្តឲ្យកាន់តែច្រើនបន្ថែមទៀតនៅឆ្នាំ២០២២ នេះ ដើម្បីឆ្លើយតបនឹងកំណើនរបស់អ្នកប្រើប្រាស់នាពេលបច្ចុប្បន្ន។ លោកបណ្ឌិត បន្ថែមថា ក្នុងចំណោមប្រាក់បញ្ញើសន្សំសរុបរបស់ធនាគារអេស៊ីលីដាជាង ៥ពាន់៤រយលានដុល្លារអាមេរិក មានការរួមចំណែក៧០% ពីអតិថិជននៅរាជធានីភ្នំពេញ រីឯទំហំឥណទានដែលមានជាង៥ពាន់លានដុល្លារអាមេរិកដូចគ្នា៧០% ត្រូវបានក្តោបក្តាប់ដោយអតិថិជនតាមបណ្តាខេត្ត។ 

របាយការណ៍ពីធនាគារជាតិនៃកម្ពុជាបង្ហាញថា  នៅឆ្នាំ២០២១គ្រឹះស្ថានធនាគារនិងហិរញ្ញវត្ថុបានធ្វើប្រតិបត្តិការទូទាត់ប្រាក់តាមអេឡិចត្រូនិកមានជិត ៧០០លានប្រតិបត្តិការ ដែលមានទំហំទឹកប្រាក់ជិត ២០០ពាន់លានដុល្លារអាមេរិកស្មើនឹង៧៨៧% នៃផលិតផលសរុប។

ក្នុងនោះ ការទូទាត់តាមប្រព័ន្ធអេឡិចត្រូនិចរបស់ធនាគារអេស៊ីលីដានៅឆ្នាំ២០២១ មានចំនួន៨៥លានប្រតិបត្តិការកើនឡើង៦១% ដែលមានទំហំទឹកប្រាក់ចំនួន៣៤ពាន់លានដុល្លារអាមេរិកកើនឡើង៩០% បើធៀបនឹងឆ្នាំ២០២០៕